Read Papantla Totonac 1 Samuel 10 Bible Online

1 Samuel 10 - Papantla Totonac bible

1 Samuel 10

¹E ora ei Samuel a kohe e butishi di zeta, a bash'e riba Saul su kabes, a sunch'e i a bisa: "SENOR no a ungibo pa ta gobernante di Su erensia?

²Awe ora bo bai for di mi, lo bo hana dos homber pega ku Raquel su graf, den e teritorio di Benjamin na Selsa. I nan lo bisabo: 'Nan a hana e burikunan ku bo a bai buska. Awor mira, bo tata no ta preokupa mas pa e burikunan, ma ta preokupa pa bo, bisando: "Kiko mi por hasi pa mi yu?"'

³"E ora ei lo bo sigui bai for di ayanan i lo bo yega na e palu di eik di Tabor, i ayanan tres homber ku ta bai serka Dios na Bet-el lo kontra ku bo; un ta karga tres yu di kabritu, un otro ta karga tres pan i un otro ta karga un saku-di-kueru ku bina aden;

⁴i nan lo saludabo i dunabo dos pan ku lo bo asepta for di nan man.

⁵"Despues lo bo bin na e seru di Dios kaminda e guarnishon filisteo ta; i lo sosode ku asina bo yega aya na e stat, lo bo topa un grupo di profeta ta baha for di e luga haltu ku arpa, tamburein, fluit i lirio nan dilanti, i nan lo ta profetisando.

⁶E ora ei e Spiritu di SENOR lo bin riba bo ku poder, i lo bo profetisa huntu ku nan i wordu kambia den un hende diferente.

⁷I ora ku e senalnan aki yega na bo, hasi pa bo mes loke e okashon ta rekeri, pasobra Dios ta ku bo.

⁸"I bai Gilgal mi dilanti, i mira, lo mi baha bin serka bo pa ofrese ofrendanan kima i sakrifika ofrendanan di pas. Ma bo mester spera shete dia te ora mi bin serka bo i mustrabo kiko bo mester hasi."

⁹E ora ei a sosode ku ora Saul a bira su lomba pa bai laga Samuel, Dios a kambia su kurason; i tur e senalnan ei a wordu kumpli riba e dia ei.

¹⁰Ora nan a yega aya na e seru, ata un grupo di profeta a bin kontr'e; i e Spiritu di Dios a bin riba dje ku poder, asina ku el a profetisa meimei di nan.

¹¹I a sosode ku ora tur esnan ku tabata konos'e antes a mira ku awor e tabata profetisa huntu ku e profetanan, nan a bisa otro: "Kiko a pasa ku e yu homber di Kis? Saul tambe ta meimei di e profetanan?"

¹²I un homber ku tabata ayanan a kontesta i a bisa: "Awor ta ken ta nan tata?" Pesei esaki a bira un proverbio: "Saul tambe ta meimei di e profetanan?"

¹³Despues ku Saul a kaba di profetisa, el a bai na e luga haltu.

¹⁴Awor Saul su tio a bisa Saul i su sirbido: "Unda boso a bai?" I el a bisa: "Nos a bai buska e burikunan. Ora nos a mira ku no por a hana nan, nos a bai serka Samuel."

¹⁵I Saul su tio a bisa: "Pa fabor, kontami kiko Samuel a bisa boso."

¹⁶Asina Saul a bisa su tio: "El a bisa nos klaramente ku e burikunan a wordu hana." Ma Saul no a bis'e tokante di e asunto di e reino ku Samuel a menshona.

¹⁷Despues Samuel a yama e pueblo huntu dilanti di SENOR na Mizpa;

¹⁸i el a bisa e yunan di Israel: "Asina SENOR, e Dios di Israel, ta bisa: 'Mi a saka Israel for di Egipto i Mi a libra boso for di man di e egipsionan i for di poder di tur e reinonan ku tabata oprimi boso.'

¹⁹Ma awe boso a rechasa boso Dios, Kende ta libra boso di tur boso kalamidatnan i boso angustianan; i boso a bisa: 'No, pone un rei riba nos!' Awor pesei, presenta boso mes dilanti di SENOR segun boso tribunan i segun boso milnan."

²⁰Asina Samuel a hasi tur e tribunan di Israel hala serka, i e tribu di Benjamin a wordu tuma pa medio di lot.

²¹E ora ei el a hasi e tribu di Benjamin hala serka segun su famianan, i e famia di Matri a wordu tuma. I Saul, yu homber di Kis, a wordu tuma; ma ora nan a busk'e, nan no por a han'e.

²²Pesei nan a bolbe puntra SENOR: "E homber a bin aki kaba?" I SENOR a bisa: "At'e ta skonde tras di e ekipahe."

²³Asina nan a kore tres'e for di einan; i ora ku e tabata para meimei di e pueblo, e tabata, for di su skouder p'ariba, mas haltu ku kualkier hende di e pueblo.

²⁴I Samuel a bisa henter e pueblo: "Boso ta mira esun ku SENOR a skohe? Siguramente no tin ningun hende manera e den henter e pueblo." Asina henter e pueblo a grita, bisando: "Biba rei!"

²⁵E ora ei Samuel a splika e pueblo e ordenansanan di e reino, i a skirbi nan den e buki i a pone esaki dilanti di SENOR. I Samuel a manda henter e pueblo bai, kada un pa su kas.

²⁶I Saul tambe a bai su kas na Gabaa; i e hombernan balente, kende nan kurason Dios a toka, a bai kune.

²⁷Ma hombernan perverso a bisa: "Kon e homber aki por libra nos?" I nan a menospresi'e i no a trese ningun regalo p'e. Ma Saul a keda ketu.