Read Papantla Totonac 1 Samuel 11 Bible Online

1 Samuel 11 - Papantla Totonac bible

1 Samuel 11

¹Awor Nahas e amonita a bin rondona Jabes di Galaad; i tur e hombernan di Jabes a bisa Nahas: "Sera un aliansa ku nos i nos lo sirbibo."

²Ma Nahas e amonita a bisa nan: "Ku e kondishon aki lo mi sera un aliansa ku boso, ku lo mi saka wowo drechi di kada un di boso, i hasi esaki un reproche pa henter Israel."

³I e ansianonan di Jabes a bis'e: "Duna nos shete dia pa nos manda mensaheronan den henter e teritorio di Israel. I si no tin ningun hende pa libra nos, nos lo sali bin serka bo."

⁴Ora ku e mensaheronan a yega Gabaa di Saul i a papia e palabranan aki pa e pueblo tende, henter e pueblo a halsa nan bos i a yora.

⁵Awor mira, Saul tabata bin for di kunuku tras di e bueynan, i el a bisa: "Kiko ta pasa ku e pueblo ku nan ta yora?" Asina nan a kont'e e palabranan di e hombernan di Jabes.

⁶Ora Saul a tende e palabranan aki, e Spiritu di Dios a bin ku poder riba dje, i el a bira masha rabia.

⁷I el a kohe un par di buey, a kap nan na pida-pida i a manda nan ku e mensaheronan dor di henter e teritorio di Israel, bisando: "Esun ku no sali tras di Saul i tras di Samuel, asin'aki lo sosode ku su bueynan." E ora ei e temor di SENOR a bin riba e pueblo i nan a sali komo un solo homber.

⁸I el a konta nan na Bezek; i e yunan di Israel tabata tres shen mil i e hombernan di Juda trinta mil.

⁹I nan a bisa e mensaheronan ku a bin: "Asina boso mester bisa e hombernan di Jabes di Galaad: 'Manan, ora solo ta kayente, boso lo wordu libra.'" Ora ku e mensaheronan a bai konta e hombernan di Jabes esaki, nan a keda kontentu.

¹⁰E ora ei e hombernan di Jabes a bisa: "Manan nos lo sali bin serka boso, i boso por hasi ku nos manera boso hana ta bon."

¹¹I a sosode ku su manise Saul a parti e pueblo den tres grupo; i nan a drenta meimei di e kampamentu na e warda di mainta i a mata e amonitanan te ora ku a bira kalor. I a sosode ku esnan ku a sobrebibi a wordu plama, asina ku no a keda ni dos di nan huntu.

¹²E ora ei e pueblo a bisa Samuel: "Ta ken a puntra: 'Saul lo reina riba nos?' Trese e hombernan ei pa nos mata nan."

¹³Ma Saul a bisa: "Ni un hende lo no wordu mata riba e dia aki, pasobra awe SENOR a duna liberashon den Israel."

¹⁴E ora ei Samuel a bisa e pueblo: "Ban, laga nos bai Gilgal i renoba e reino ayanan."

¹⁵Asina henter e pueblo a bai Gilgal i aya nan a proklama Saul rei dilanti di SENOR na Gilgal. Ayanan tambe nan a ofrese sakrifisionan di ofrendanan di pas dilanti di SENOR; i ayanan Saul i tur e hombernan di Israel a regosiha grandemente.