Read Papantla Totonac 1 Samuel 12 Bible Online

1 Samuel 12 - Papantla Totonac bible

1 Samuel 12

¹E ora ei Samuel a bisa henter Israel: "Mira, mi a skucha boso bos den tur loke boso a bisami, i mi a nombra un rei riba boso.

²I awor, at'e rei ta kana boso dilanti; ma ami ta bieu i mi kabei ta blanku, i mira, mi yunan ta serka boso. I mi a kana boso dilanti for di mi hubentut te dia djawe.

³At'ami aki; duna testimonio kontra mi dilanti di SENOR i Su ungi. Ken su buey mi a kohe? Ken su buriku mi a kohe? Ken mi a defrouda? Ken mi a oprimi? For di ken su man mi a tuma plaka pasa bou di mesa, pa siega mi wowo kune? Lo mi debolbe esaki na boso."

⁴I nan a bisa: "Bo no a defrouda nos, ni a oprimi nos, ni a tuma nada for di man di ningun hende."

⁵I el a bisa nan: "SENOR ta testigu kontra boso, i Su ungi ta testigu riba e dia aki ku boso no a hana nada den mi man." I nan a bisa: "E ta testigu."

⁶E ora ei Samuel a bisa e pueblo: "Ta SENOR ta Esun ku a nombra Moises i Aaron i Esun ku a saka boso tatanan for di tera di Egipto.

⁷Asina anto, para firme, pa mi por rasona ku boso dilanti di SENOR tokante di tur e echonan hustu di SENOR, ku El a hasi pa boso i boso tatanan.

⁸"Ora Jakob a bai Egipto i boso tatanan a sklama na SENOR, SENOR a manda Moises i Aaron, kendenan a saka boso tatanan for di Egipto i a stablese nan den e luga aki.

⁹"Ma nan a lubida SENOR nan Dios, pesei El a bende nan den man di Sisara, kapitan di e ehersito di Hazor, i den man di e filisteonan i den man di e rei di Moab, i nan a bringa kontra nan.

¹⁰I nan a sklama na SENOR i a bisa: 'Nos a peka, pasobra nos a bandona SENOR i a sirbi e Baalnan i e Astarot; ma libra nos awor for di man di nos enemigunan, i nos lo sirbiBo.'

¹¹E ora ei SENOR a manda Jerobaal, Barak, Jefte i Samuel, i a libra boso for di man di boso enemigunan tur ront, asina ku boso a biba den siguridat.

¹²"Ora boso a mira ku Nahas, rei di e yu hombernan di Amon, a bin kontra boso, boso a bisami: 'No, un rei mester reina riba nos,' apesar ku SENOR boso Dios tabata boso rei.

¹³Pesei anto, at'aki e rei ku boso a skohe, ku boso a pidi, i mira, SENOR a pone un rei riba boso.

¹⁴Si boso teme SENOR i sirbié, i skucha Su bos i no rebeldia kontra e ordu di SENOR, e ora ei tantu boso komo e rei ku ta reina riba boso lo sigui SENOR boso Dios.

¹⁵I si boso no kier skucha e bos di SENOR, ma ta rebeldia kontra e ordu di SENOR, e ora ei e man di SENOR lo ta kontra boso, meskos ku e tabata kontra boso tatanan.

¹⁶"Pesei awor, para firme i mira e kos grandi aki ku SENOR lo hasi dilanti di boso wowo.

¹⁷No ta tempu di kosecha di trigo awor? Lo mi yama na SENOR pa E manda strena i awaseru. E ora ei boso lo sa i mira ku boso maldat ku boso a hasi den bista di SENOR ta grandi, ora boso a pidi un rei pa boso mes."

¹⁸Asina Samuel a yama na SENOR, i SENOR a manda strena i awaseru e dia ei; i henter e pueblo a hana gran temor pa SENOR i pa Samuel.

¹⁹E ora ei henter e pueblo a bisa Samuel: "Pidi SENOR bo Dios pa bo sirbidonan, pa nos no muri, pasobra na tur nos pikanan nos a anadi e maldat aki di pidi un rei pa nos mes."

²⁰I Samuel a bisa e pueblo: "No tene miedu. Boso a komete tur e maldat aki berdat; sinembargo, no bira bai i keda sin sigui SENOR, ma sirbi SENOR ku henter boso kurason.

²¹I boso no mester bira bai, pasobra e ora ei boso lo bai tras di kosnan bano ku no ta di probecho ni ta libra, pasobra nan ta banidat.

²²Pasobra SENOR lo no bandona Su pueblo pa motibu di Su gran nomber, pasobra a agrada SENOR pa hasi boso un pueblo pa Su mes.

²³Ademas, pa loke t'ami, leu sea di mi di peka kontra SENOR dor di stop di hasi orashon pa boso; ma lo mi instrui boso den e kaminda bon i rekto.

²⁴Solamente, teme SENOR i sirbié den berdat ku henter boso kurason, pasobra konsidera ki kosnan grandi El a hasi pa boso.

²⁵Ma si boso sigui hasi maldat, tantu boso komo boso rei lo perese."