Read Papantla Totonac 1 Samuel 13 Bible Online

1 Samuel 13 - Papantla Totonac bible

1 Samuel 13

¹Saul tabatin kuarenta ana dia ku el a kuminsa reina, i el a reina trint'i dos ana riba Israel.

²Awor Saul a skohe pa su mes tres mil homber di Israel, di kualnan dos mil tabata huntu ku Saul na Mikmas i den e serunan di Bet-el, mientras ku mil tabata huntu ku Jonatan na Gabaa di Benjamin. Ma e restu di e hendenan el a manda bai, kada un na su tent.

³I Jonatan a derota e guarnishon di e filisteonan ku tabata keda na Geba, i e filisteonan a tende di esaki. E ora ei Saul a laga supla trompet den henter e tera, bisando: "Laga e hebreonan tende."

⁴I henter Israel a tende e notisia ku Saul a derota e guarnishon di e filisteonan, i tambe ku Israel a bira un abominashon pa e filisteonan. E ora ei e pueblo a wordu yama serka Saul na Gilgal.

⁵Awor e filisteonan a bin huntu pa bringa kontra Israel, trinta mil garoshi, seis mil koredo di kabai, i hende, mes numeroso ku e santu ku tin kantu di laman; i nan a bin i a kampa na Mikmas, pariba di Bet-aven.

⁶Ora ku e hombernan di Israel a mira ku nan tabata den perta (pasobra e pueblo tabata bou di hopi preshon), e pueblo a skonde den kueba, den mondi-sera, den baranka, den buraku i den pos.

⁷Tambe algun di e hebreonan a krusa Jordan drenta tera di Gad i Galaad. Ma pa loke ta Saul, e tabata na Gilgal ainda, i henter e pueblo tabata siguie na temblamentu.

⁸Awor Saul a warda shete dia, konforme e tempu stipula ku Samuel a pone, ma Samuel no a bin Gilgal; i e pueblo tabata plama bai lagu'e.

⁹Pesei Saul a bisa: "Trese e ofrenda kima i e ofrendanan di pas pa mi." I el a ofrese e ofrenda kima.

¹⁰I a sosode ku asina ku el a kaba di ofrese e ofrenda kima, ata Samuel a yega; i Saul a sali pa kontr'e i pa salud'e.

¹¹Ma Samuel a bisa: "Ta kiko bo a hasi?" I Saul a bisa: "Komo ku mi a mira ku e pueblo tabata plama bai lagami, i ku bo no a bin denter di e dianan stipula, i ku e filisteonan tabata reuni na Mikmas,

¹²pesei mi a bisa: 'Awor e filisteonan lo baha bin kontra mi na Gilgal, i mi no a buska e fabor di SENOR.' Asina mi a sinti mi mes obliga di ofrese e ofrenda kima."

¹³I Samuel a bisa Saul: "Bo a aktua na manera bobo; bo no a warda e mandamentu di SENOR bo Dios ku El a ordenabo, sino awor SENOR lo a stablese bo reino riba Israel pa semper.

¹⁴Ma awor bo reino lo no permanese. SENOR a buska pa Su mes un homber konforme Su mes kurason, i SENOR a nombr'e komo gobernante riba Su pueblo, pa motibu ku bo no a kumpli ku loke SENOR a ordenabo."

¹⁵E ora ei Samuel a lanta i for di Gilgal a subi bai Gabaa di Benjamin. I Saul a konta e hendenan ku tabata serka dje, mas o menos seis shen homber.

¹⁶Awor Saul ku su yu homber Jonatan, i e pueblo ku tabata huntu ku nan, tabata keda na Geba di Benj amin, mientras ku e filisteonan tabata kampa na Mikmas.

¹⁷Anto e sakeadonan a sali for di e kampamentu di e filisteonan den tres grupo; un grupo a kohe e kaminda di Ofra bai tera di Sual,

¹⁸i e di dos grupo a kohe e kaminda di Bet-horon, i e di tres grupo a kohe e kaminda di e region ku tin bista ofer di e vaye di Zeboim, den direkshon di desierto.

¹⁹Awor no por a hana ni un smet den henter e tera di Israel, pasobra e filisteonan tabata bisa: "Pa e hebreonan no traha spada ni lansa."

²⁰Asina henter Israel a baha bai serka e filisteonan, kada un pa laga mula su plug, su chapi, su hacha i su machete.

²¹I e preis tabata dos terser parti di un siklo pa e plugnan, e chapinan, e forkinan i e hachanan, i pa laga sleip e machetenan.

²²Asina a sosode ku riba e dia di bataya no tabatin ni spada ni lansa den man di ningun di e hendenan ku tabata huntu ku Saul i Jonatan; solamente Saul i su yu homber Jonatan tabatin nan.

²³I e guarnishon di e filisteonan a sali bai na e pasada di Mikmas.