Read Papantla Totonac 1 Samuel 14 Bible Online

1 Samuel 14 - Papantla Totonac bible

1 Samuel 14

¹Awor e dia a yega ku Jonatan, yu homber di Saul, a bisa e hoben ku tabata karga su arma: "Ban, laga nos krusa bai na e guarnishon di e filisteonan ku ta keda na e otro banda." Ma e no a bisa su tata.

²I Saul tabata keda den e distriktonan net pafo di Gabaa, bou di e palu di granatapel ku tin na Migron. I e hendenan ku tabata huntu kune tabata mas o menos seis shen homber,

³i Ahias, yu homber di Ahitob, ruman homber di Ikabod, yu homber di Finees, yu homber di Eli, saserdote di SENOR na Silo, tabatin un efod bisti. I e pueblo no tabata sa ku Jonatan a bai.

⁴I entre e pasadanan, dor di kualnan Jonatan kier a krusa bai na e guarnishon di e filisteonan, tabatin un baranka ku punta skerpi na esun banda, i un baranka ku punta skerpi na e otro banda; i nomber di esun tabata Boses, i nomber di e otro Sene.

⁵Esun punta tabata para parti nort enfrente di Mikmas, e otro parti suit enfrente di Geba.

⁶Anto Jonatan a bisa e hoben ku tabata karga su arma: "Ban, laga nos krusa bai na e guarnishon di e insirkumsidanan aki; podise SENOR lo obra pa nos, pasobra nada no por stroba SENOR di salba, tantu pa medio di hopi komo pa medio di poko."

⁷I su kargado di arma a bis'e: "Hasi tur loke ta den bo kurason; bai numa, pasobra mi ta ku bo konforme bo deseo."

⁸E ora ei Jonatan a bisa: "Mira, nos lo krusa bai serka e hombernan i presenta nos mes na nan.

⁹Si nan bisa nos: 'Warda te ora nos bin serka boso', e ora ei nos lo keda para na nos luga i lo no subi bai serka nan.

¹⁰Ma si nan bisa: 'Subi bin serka nos,' e ora ei nos lo subi bai, pasobra SENOR a entrega nan den nos man, i esaki lo ta e senal pa nos."

¹¹I ora nan tur dos a presenta nan mes na e guarnishon di e filisteonan, e filisteonan a bisa: "Mira, tin hebreo ta sali for di e burakunan ku nan a bai skonde aden."

¹²Asina e hombernan di e guarnishon a yama Jonatan i su kargado di arma i a bisa: "Subi bin serka nos i nos lo bisa boso algu." I Jonatan a bisa su kargado di arma: "Subi bin mi tras, pasobra SENOR a entrega nan den man di Israel."

¹³E ora ei Jonatan a subi riba man ku pia, ku su kargado di arma su tras; i e filisteonan tabata kai dilanti di Jonatan, i su kargado di arma tabata mata algun su tras.

¹⁴I e prome matansa ei ku Jonatan i su kargado di arma a hasi tabata di mas o menos binti homber, den un mitar bender di tera.

¹⁵I tabatin un temblamentu den e kampamentu, den e sabana i meimei di henter e pueblo. Asta e guarnishon i e sakeadonan tabata tembla; i tera tabata sakudi, asina ku esaki a bira un temblamentu masha grandi mes.

¹⁶Awor Saul su soldanan-di-guardia na Geba di Benjamin a wak, i mira, e multitut a dirti bai; i nan tabata kana bai p'aki p'aya.

¹⁷I Saul a bisa e pueblo ku tabata huntu kune: "Awor, konta i wak ta ken a bai for di nos." I ora nan a konta, mira, Jonatan i su kargado di arma no tabat'ei.

¹⁸E ora ei Saul a bisa Ahias: "Trese e arka di Dios aki." Pasobra e tempu ei e arka di Dios tabata serka e yunan di Israel.

¹⁹I a sosode ku mientras Saul tabata papia ku e saserdote, e boroto den e kampamentu di e filisteonan a kontinua i a oumenta; pesei Saul a bisa e saserdote: "Kita bo man."

²⁰E ora ei Saul i henter e pueblo ku tabata huntu kune a reuni i a yega na e luga di bataya; i mira, spada di kada homber tabata kontra su kompanero, i tabatin un konfushon masha grandi mes.

²¹Awor e hebreonan ku tabata serka e filisteonan pa hopi tempu kaba i ku a bai huntu ku nan tur ront den e kampamentu--nan tambe a bai na banda di e israelitanan ku tabata huntu ku Saul i Jonatan.

²²Ora tur e hombernan di Israel ku a skonde den e serunan di Efrain a tende ku e filisteonan a hui, nan tambe a persigui nan di serka den e bataya.

²³Asina SENOR a libra Israel e dia ei, i e bataya a plama pasa Bet-aven bai.

²⁴Awor e hombernan di Israel a hana nan mes bou di hopi preshon riba e dia ei, pasobra Saul a pone e pueblo bou di un huramentu, bisando: "Maldishona sea e homber ku kome kuminda prome ku nochi sera i prome ku mi tuma vengansa riba mi enemigunan." I pa e motibu ei ningun hende di e pueblo no a purba nada di kuminda.

²⁵I henter e pueblo di e tera a drenta e mondi-sera; i tabatin miel abou na suela.

²⁶Ora ku e pueblo a drenta e mondi-sera, mira, tabatin miel ta kore; ma ningun homber no a hiba su man na su boka, pasobra e pueblo tabata teme e huramentu.

²⁷Ma Jonatan no a tende ku su tata a pone e pueblo bou di huramentu; pesei el a saka punta di e bara ku e tabatin den su man i a dop e den e panal di miel, i a hiba su man na su boka, i su wowonan a klaria.

²⁸E ora ei un di e hendenan di e pueblo a bis'e: "Bo tata a pone e pueblo bou di un huramentu strikto, bisando: 'Maldishona sea e homber ku kome kuminda awe.'" Pesei e pueblo tabata kansa.

²⁹E ora ei Jonatan a bisa: "Mi tata a trese problema den e tera. Mira awor kon mi wowonan a klaria, pasobra mi a purba un tiki di e miel aki.

³⁰Kuantu mas miho lo tabata si e pueblo lo a kome libremente awe di e botin ku nan a kohe di nan enemigunan! Pasobra awor e matansa entre e filisteonan no ta grandi."

³¹I riba e dia ei nan a derota e filisteonan for di Mikmas te na Ajalon. I e pueblo tabata morto kansa.

³²I e pueblo a basha bai riba e botin, i a kohe karne, buey i bishe i a mata nan riba suela; i e pueblo a kome e bestianan ku sanger ku tur.

³³E ora ei nan a konta Saul, bisando: "Mira, e pueblo ta peka kontra SENOR dor di kome karni ku sanger ku tur." I el a bisa: "Boso a aktua ku traishon; lora un piedra grandi trese serka mi awe."

³⁴I Saul a bisa: "Boso plama meimei di e pueblo i bisa nan: 'Kada un di boso trese su buey of su karne pa mi, i mat'e aki i kome; i no peka kontra SENOR dor di kome karni ku sanger ku tur.'" Asina e anochi ei kada un di e pueblo a trese su buey huntu kune i a mat'e einan.

³⁵I Saul a traha un altar na SENOR; esaki tabata e prome altar ku el a traha na SENOR.

³⁶E ora ei Saul a bisa: "Laga nos bai tras di e filisteonan den anochi i kohe botin for di nan te ora dia habri, i no laga ni un hende di nan keda na bida." I nan a bisa: "Hasi tur loke ta parsebo bon." Pesei e saserdote a bisa: "Laga nos hala serka di Dios akinan."

³⁷I Saul a konsulta ku Dios: "Bo kier mi baha bai tras di e filisteonan? Lo Bo entrega nan den man di Israel?" Ma Dios no a kontesta Saul riba e dia ei.

³⁸I Saul a bisa: "Hala serka aki, boso tur ku ta kabesante di e pueblo, i investiga i mira kon e pika aki a sosode awe.

³⁹Pasobra manera SENOR, Kende ta libra Israel, ta biba, asta si ta den mi yu Jonatan e pika ta, e mester muri sigur." Ma ningun hende di henter e pueblo no a kontest'e.

⁴⁰E ora ei el a bisa henter Israel: "Boso lo ta na un banda, i ami ku mi yu Jonatan lo ta na e otro banda." I e pueblo a bisa Saul: "Hasi loke ta parsebo bon."

⁴¹Pesei Saul a bisa SENOR, e Dios di Israel: "Duna un lot perfekto." I e lot a kai riba Saul i Jonatan, ma e pueblo a sali liber.

⁴²I Saul a bisa: "Tira lot entre ami i mi yu Jonatan." I e lot a kai riba Jonatan.

⁴³E ora ei Saul a bisa Jonatan: "Bisami kiko bo a hasi." E ora ei Jonatan a kont'e i a bisa: "Di berdat, mi a purba un tiki miel na punta di e bara ku mi tabatin den mi man. At'ami aki, ta ami mester muri!"

⁴⁴I Saul a bisa: "Ku Dios hasi asina ku mi i pio ainda, pasobra sigur-sigur bo ta bai muri, Jonatan."

⁴⁵Ma e pueblo a bisa Saul: "Jonatan, kende a logra e gran liberashon aki den Israel, mester muri? Di ningun manera! Manera SENOR ta biba, ni un drachi di su kabei lo no kai na suela, pasobra awe el a traha huntu ku Dios." Asina e pueblo a reskata Jonatan, i e no a muri.

⁴⁶Despues Saul a stop di persigui e filisteonan, i e filisteonan a bai nan mes luga.

⁴⁷Awor despues ku Saul a kaba di tuma reinado di Israel pa su mes, el a bringa kontra tur su enemigunan na tur banda: kontra Moab, e yu hombernan di Amon, Edom, e reinan di Soba i e filisteonan; i unda ku el a bira, el a kastiga nan.

⁴⁸I el a aktua ku kurashi i a derota e amalekitanan, i a libra Israel for di man di esnan ku a plunder nan.

⁴⁹Awor e yu hombernan di Saul tabata Jonatan, Isui i Malkisua; i nomber di su dos yu muhenan tabata esakinan: nomber di e mayo Merab i nomber di esun mas chikitu Mikal.

⁵⁰I nomber di Saul su esposa tabata Ahinoam, yu muhe di Ahimaas. I nomber di e kapitan di su ehersito tabata Abner, yu homber di Ner, Saul su tio.

⁵¹I Kis tabata tata di Saul, i Ner, tata di Abner, tabata yu homber di Abiel.

⁵²Awor e guera kontra e filisteonan tabata severo durante di tur e dianan di Saul; i ki ora ku Saul a mira un homber fuerte of un homber balente, el a tuma esaki pa su ehersito.