Read Papantla Totonac 1 Samuel 16 Bible Online

1 Samuel 16 - Papantla Totonac bible

1 Samuel 16

¹Awor SENOR a bisa Samuel: "Te ki dia bo ta keda yora Saul, siendo ku Mi a rechas'e komo rei riba Israel? Yena bo kachu ku zeta i bai; lo Mi mandabo serka Isai e betlehemita, pasobra Mi a skohe un rei pa Mi mes for di su yu hombernan."

²Ma Samuel a bisa: "Kon mi ta hasi bai? Ora Saul tende di esaki, e lo matami." I SENOR a bisa: "Hiba un bishe muhe ku bo i bisa: 'Mi a bin pa ofrese sakrifisio na SENOR.'

³I invita Isai pa e sakrifisio, i lo Mi mustrabo kiko pa hasi. I bo mester ungi pa Mi esun ku Ami indikabo."

⁴Asina Samuel a hasi loke SENOR a bisa, i a bin Betlehem. I e ansianonan di e stat a bin na temblamentu pa kontra kune i a bisa: "Ta na pas bo ta bin?"

⁵I el a bisa: "Si, na pas; mi a bin pa ofrese sakrifisio na SENOR. Santifika boso mes i bin huntu ku mi na e sakrifisio." Tambe el a santifika Isai i su yu hombernan, i a invita nan na e sakrifisio.

⁶I a sosode ku ora nan a drenta, el a wak Eliab i a pensa: "Siguramente SENOR Su ungi ta para dilanti di djé."

⁷Ma SENOR a bisa Samuel: "No wak su aparensia ni e haltura di su estatura, pasobra Mi a rechas'e; pasobra Dios no ta mira manera hende ta mira, pasobra hende ta wak aparensia di pafo, ma SENOR ta wak kurason."

⁸E ora ei Isai a yama Abinadab i a hasie pasa dilanti di Samuel. I el a bisa: "SENOR no a skohe esun aki tampoko."

⁹Despues Isai a hasi Sama pasa. I el a bisa: "SENOR no a skohe esun aki tampoko."

¹⁰Asina Isai a hasi shete di su yu hombernan pasa dilanti di Samuel. Ma Samuel a bisa Isai: "SENOR no a skohe esakinan."

¹¹I Samuel a bisa Isai: "Ta esakinan ta tur e yunan?" I el a bisa: "Falta esun di mas chikitu ainda, i mira, e ta kuida e karnenan." E ora ei Samuel a bisa Isai: "Manda busk'e; pasobra nos lo no sinta na mesa te ora ku e yega aki."

¹²Asina Isai a manda busk'e i a tres'e paden. Awor e tabatin kabei kora, bunita wowo i nechi aparensia. I SENOR a bisa: "Lanta, ungie, pasobra esaki t'e."

¹³E ora ei Samuel a kohe e kachu di zeta i a ungie den presensia di su rumannan; i e Spiritu di SENOR a bin ku poder riba David for di e dia ei padilanti. I Samuel a lanta bai Rama.

¹⁴Awor e Spiritu di SENOR a bai for di Saul, i un spiritu malu for di SENOR tabata teroris'e.

¹⁵E ora ei Saul su sirbidonan a bis'e: "At'awor, un spiritu malu for di Dios ta terorisabo.

¹⁶Laga nos senor awor duna ordu na bo sirbidonan ku ta bo dilanti. Laga nan buska un homber ku sa toka arpa bon; i lo sosode ku ora e spiritu malu for di Dios ta riba bo, e lo toka e arpa ku su man, i lo bo sinti miho."

¹⁷Asina Saul a bisa su sirbidonan: "Buska pa mi awor un homber ku por toka bon, i tres'e serka mi."

¹⁸E ora ei un di e hobennan a kontesta i a bisa: "Ata, mi a mira un yu homber di Isai e betlehemita, kende ta un bon musiko, un homber poderoso i balente, un guerero, un homber ku ta prudente den su palabranan, i un nechi homber; i SENOR ta kune."

¹⁹Asina Saul a manda mensaheronan serka Isai i a bisa: "Manda pa mi bo yu David, kende ta serka e tou di karne."

²⁰Anto Isai a kohe un buriku karga ku pan, un saku-di-kueru ku bina aden i un yu di kabritu, i ku su yu David el a manda nan pa Saul.

²¹E ora ei David a bin serka Saul i a sirbie; i Saul tabata stim'e masha, i el a bira su kargado di arma.

²²I Saul a manda bisa Isai: "Laga David keda awor den mi sirbishi, pasobra el a hana grasia den mi bista."

²³Asina a sosode ku ki ora ku e spiritu malu for di Dios a bin riba Saul, David tabata kohe e arpa i tok'e ku su man. E ora ei Saul tabata hana alivio i tabata sinti su mes miho; i e spiritu malu tabata bai for di dje.