Read Papantla Totonac 1 Samuel 17 Bible Online

1 Samuel 17 - Papantla Totonac bible

1 Samuel 17

¹Awor e filisteonan a reuni nan ehersitonan pa bataya; i nan a reuni na Soko, ku ta pertenese na Juda, i nan a kampa entre Soko i Azeka, na Efes-damim.

²Anto Saul ku e hombernan di Israel a reuni i a kampa den e vaye di Ela, i a pone nan mes den ordu di bataya pa enfrenta e filisteonan.

³I e filisteonan a para riba e seru na esun banda, mientras ku Israel a para riba e seru na e otro banda, ku e vaye meimei di nan.

⁴E ora ei un kampeon ku yama Goliat, for di Gad, a sali for di e ehersitonan di e filisteonan. Su haltura tabata seis kodo i un span di man.

⁵I e tabatin un helm di brons riba su kabes, i e tabatin un korasa di skama di brons bisti, ku tabata pisa sinku mil siklo di brons.

⁶E tabatin tambe protekshon di brons na su pianan i un yabalina di brons riba su skouder.

⁷I e kabu di su lansa tabata manera un balki di wefdo-di-tela, i e punta di su lansa tabata di seis shen siklo di heru; su kargado di eskudo tabata kana su dilanti.

⁸I el a para grita e trupanan di Israel i bisa nan: "Pakiko boso ta sali pa pone boso mes den ordu di bataya? No ta un filisteo mi ta i no ta sirbidonan di Saul boso ta? Skohe un homber pa boso mes i lagu'e baha bin serka mi.

⁹Si e por bringa ku mi i matami, e ora ei nos lo bira boso sirbido; ma si mi prevalese kontra dje i mat'e, e ora ei boso lo bira nos sirbido i sirbi nos."

¹⁰E filisteo a bolbe bisa: "Awe mi ta reta e trupanan di Israel; dunami un homber, pa nos bringa ku otro."

¹¹Ora Saul i henter Israel a tende e palabranan aki di e filisteo, nan a keda desmaya i a hana hopi miedu.

¹²Awor David tabata yu homber di e efrateo di Betlehem na Juda ku tabata yama Isai, i e tabatin ocho yu homber. I den e dianan di Saul, Isai tabata bieu i di edat avansa.

¹³I e tres yu hombernan mas grandi di Isai a sigui Saul den bataya. I nomber di su tres yu hombernan ku a bai den bataya tabata Eliab, e primogenito, esun di dos Abinadab, i esun di tres Sama.

¹⁴I David tabata esun di mas chikitu. Awor e tresnan di mas grandi tabata sigui Saul,

¹⁵ma David tabata bai bin for di serka Saul pa kuida su tata su tou di karne na Betlehem.

¹⁶I e filisteo tabata bin dilanti mainta i atardi, kuarenta dia largu, i tabata presenta su mes.

¹⁷Awor Isai a bisa su yu homber David: "Kohe awor pa bo rumannan un efa di e mainshi tosta aki i e dies pannan aki, i kore bai na e kampamentu serka bo rumannan.

¹⁸Hiba tambe e dies keshinan aki pa e komandante di mil, i mira kon ta bai ku bo rumannan, i trese notisia di nan.

¹⁹Pasobra Saul i nan, ku tur e hombernan di Israel, ta den e vaye di Ela ta bringa kontra e filisteonan."

²⁰Asina David a lanta mainta tempran, a laga e tou di karne serka un wardado, i a kohe e karga i a bai, manera Isai a orden'e. I el a yega na e kampamentu ora ku e ehersito tabata sali den ordu di bataya, gritando e gritu di guera.

²¹Anto Israel i e filisteonan a pone nan mes den ordu di bataya, ehersito kontra ehersito.

²²E ora ei David a laga su ekipahe bou di kuido di e wardado di ekipahe, i a kore bai na e fila di bataya i a drenta pa saluda su rumannan.

²³Mientras ku e tabata papia ku nan, at'e kampeon, e filisteo di Gat ku tabata yama Goliat, tabata bin for di e ehersito di e filisteonan, i el a papia e mesun palabranan aki; i David a tende nan.

²⁴Ora tur e hombernan di Israel a mira e homber, nan a hui p'e i a hana masha hopi miedu mes.

²⁵I e hombernan di Israel a bisa: "Bo a mira e homber ku ta bin ei? Siguramente e ta bin pa reta Israel. I lo t'asina ku e homber ku mat'e, esei rei lo enrikese ku gran rikesa, i lo dun'e su yu muhe i hasi e kas di su tata liber den Israel."

²⁶E ora ei David a papia ku e hombernan ku tabata para banda di dje, bisando: "Kiko lo wordu hasi pa e homber ku mata e filisteo aki i kita e reproche for di Israel? Pasobra ta ken e filisteo insirkumsida aki ta, ku e ta reta e ehersitonan di e Dios bibu?"

²⁷I e pueblo a kontest'e konforme e mesun palabra aki, bisando: "Asina lo wordu hasi pa e homber ku mat'e."

²⁸Awor David su ruman mayo Eliab a tende ora ku e tabata papia ku e hombernan; i Eliab a rabia masha ku David i el a bisa: "Pakiko bo a bin? I serka ken bo a laga e par di karnenan ei den desierto? Mi konose bo arogansia i e maldat di bo kurason, pasobra ta pa mira e bataya bo a bin."

²⁹Ma David a bisa: "Kiko mi a hasi awor? No tabata djis un pregunta mi a hasi?"

³⁰E ora ei el a kita bai for di dje i a bai serka un otro i a hasi e mesun pregunta; i e pueblo a kontesta e mesun kos ku prome.

³¹Ora ku e hendenan a tende e palabranan ku David a papia, nan a konta Saul; i el a manda yam'e.

³²I David a bisa Saul: "No laga kurason di ningun hende desmaya pa su kousa; bo sirbido lo bai i bringa ku e filisteo aki."

³³E ora ei Saul a bisa David: "Bo no ta kapas pa bai kontra e filisteo aki pa bringa kune; abo ta un hoben ainda, ma e ta un guerero for di su hubentut."

³⁴Ma David a bisa Saul: "Bo sirbido tabata kuida e karnenan di su tata. Ora ku un leon of un ber tabata bin kohe un lamchi for di e tou,

³⁵mi tabata sali su tras i atak'e i reskata e lamchi for di su boka; i ora ku e tabata lanta kontra mi, mi tabata gar'e na su barba i dal e mata.

³⁶Bo sirbido a yega di mata tantu leon komo ber, i e filisteo insirkumsida aki lo ta manera un di nan, pasobra el a reta e ehersitonan di e Dios bibu."

³⁷I David a bisa: "E SENOR, Kende a librami for di gara di leon i for di gara di ber, E lo librami for di man di e filisteo aki." I Saul a bisa David: "Bai, i ku SENOR sea ku bo."

³⁸E ora ei Saul a bisti David su mes pananan i a pone un helm di brons riba su kabes, i el a bistie un korasa.

³⁹I David a faha Saul su spada riba su korasa i a trata di kana, pasobra nunka e no a test nan. E ora ei David a bisa Saul: "Mi no por bai ku esakinan, pasobra nunka mi no a test nan." I David a kita nan.

⁴⁰I el a kohe su garoti den su man; i el a skohe pa su mes sinku piedra lizu for di roi i a pone nan den e saku di su tas di wardado ku e tabatin. Ma su slenger el a tene den su man, i el a aserka e filisteo.

⁴¹E ora ei e filisteo a kana bin i a aserka David, ku e kargado di eskudo su dilanti.

⁴²Ora ku e filisteo a wak i a mira David, el a menospresi'e, pasobra e tabata un hoben ainda, ku kabei kora, i di nechi aparensia.

⁴³I e filisteo a bisa David: "Ta kacho mi ta, ku bo ta bin ku palu riba mi?" I e filisteo a maldishona David den e nomber di su diosnan.

⁴⁴Tambe e filisteo a bisa David: "Bin serka mi, i lo mi duna bo karni na e parhanan di shelu i na e bestianan di mondi."

⁴⁵E ora ei David a bisa e filisteo: "Bo ta bin riba mi ku spada, ku lansa i ku yabalina, ma ami ta bin riba bo den e nomber di e SENOR di ehersitonan, e Dios di e ehersitonan di Israel, Kende bo a reta.

⁴⁶Awe SENOR lo entregabo den mi man, i lo mi dal bo mata i kita bo kabes afo. I awe lo mi duna e kadavernan di e ehersito di e filisteonan na e parhanan di shelu i na e bestianan salbahe di mundu, pa henter mundu sa ku tin un Dios na Israel,

⁴⁷i pa henter e asamblea aki por sa ku SENOR no ta libra ku spada ni ku lansa; pasobra e bataya ta di SENOR i E lo entrega boso den nos man."

⁴⁸Anto a sosode ku ora e filisteo a lanta i a hala serka pa kontra ku David, David a kore bai lihe na e fila di bataya pa kontra ku e filisteo.

⁴⁹I David a hinka su man den su tas, a kohe un piedra for di dje i a tira e piedra ku e slenger i a dal e filisteo na su frenta. I e piedra a keda klaba den su frenta, asina ku el a kai bok'abou riba suela.

⁵⁰Asina David a prevalese riba e filisteo ku un slenger i un piedra, i el a dal e filisteo mata; ma David no tabatin spada den su man.

⁵¹E ora ei David a kore bai para banda di e filisteo i a kohe e filisteo su spada, sak'e for di su balina i a mat'e, i a kita su kabes afo kune. I ora ku e filisteonan a mira ku nan kampeon tabata morto, nan a hui.

⁵²I e hombernan di Israel i Juda a lanta, a grita i a persigui e filisteonan te na e vaye i te na e portanan di Ekron. I e filisteonan ku nan a mata a keda tira riba e kaminda pa Saaraim, pa Gat i Ekron.

⁵³I e yunan di Israel a bolbe despues di a persigui e filisteonan i a plunder nan kampamentunan.

⁵⁴Anto David a kohe e filisteo su kabes i a hiba esaki Jerusalem, ma e filisteo su armanan el a pone den su mes tent.

⁵⁵Awor ora Saul a mira David ta sali bai kontra e filisteo, el a bisa Abner, komandante di e ehersito: "Abner, ta ken su yu e hoben aki ta?" I Abner a bisa: "Manera bo ta biba, O rei, mi no sa."

⁵⁶I rei a bisa: "Buska pa hana sa ta ken su yu e hoben aki ta."

⁵⁷I ora David a bolbe despues di a mata e filisteo, Abner a koh'e hiba dilanti di Saul, ku e filisteo su kabes den su man ainda.

⁵⁸I Saul a bis'e: "Ta ken su yu bo ta, hoben?" I David a kontesta: "Mi ta yu di bo sirbido Isai e betlehemita."