Read Papantla Totonac 1 Samuel 18 Bible Online

1 Samuel 18 - Papantla Totonac bible

1 Samuel 18

¹Awor a sosode ku despues ku David a kaba di papia ku Saul, alma di Jonatan a keda uni ku alma di David, i Jonatan tabata stima David manera su mes.

²I e dia ei Saul a ten'e i no a lagu'e bolbe kas di su tata.

³Anto Jonatan a sera un aliansa ku David, pasobra e tabata stim'e manera su mes.

⁴I Jonatan a kita su mantel ku e tabatin bisti i a duna David esaki, huntu ku su armadura, ku tabata inklui su spada, su bog i su faha.

⁵Asina David a sali bai tur kaminda ku Saul a mand'e, i e tabata prospera; i Saul a nombr'e riba e hombernan di guera. I esaki tabata agradabel den bista di henter e pueblo i tambe den bista di Saul su sirbidonan.

⁶I a sosode ku ora nan tabata bin, despues ku David a kaba di mata e filisteo, e muhenan a sali for di tur e statnan di Israel pa kontra rei Saul bou di kantamentu i baliamentu, ku tamburein, ku goso i ku instrument di muzik.

⁷I e muhenan tabata kanta segun ku nan tabata toka i tabata bisa: "Saul a mata su milnan, i David su dies milnan."

⁸E ora ei Saul a rabia masha, pasobra e palabranan aki a desagrad'e, i el a bisa: "Na David nan a atribui dies milnan, ma na mi nan a atribui milnan. Ta e reino so falta awor pa e hana!"

⁹I for di e dia ei Saul tabata wak David ku deskonfiansa.

¹⁰Awor a sosode ku su manise un spiritu malu for di Dios a podera di Saul, i e tabata komporta su mes den kas manera hende razu, mientras ku David tabata toka arpa ku su man, manera kustumber; i Saul tabatin un lansa den su man.

¹¹I Saul a tira e lansa, pasobra el a pensa: "Mi ta bai pega David na muraya." Ma David a skapa for di su presensia dos biaha.

¹²Awor Saul tabatin miedu di David, pasobra SENOR tabata kune, ma El a bai for di Saul.

¹³Pesei Saul a kita David for di su presensia i a nombr'e komo su komandante di mil; i David tabata sali i drenta dilanti di e pueblo.

¹⁴I David tabata prospera den tur su kamindanan, pasobra SENOR tabata kune.

¹⁵Ora Saul a mira ku e tabata prospera grandemente, el a hana miedu di dje.

¹⁶Ma henter Israel i Juda tabata stima David, i e tabata sali i drenta nan dilanti.

¹⁷E ora ei Saul a bisa David: "At'aki mi yu muhe mayo Merab; lo mi dunabo e komo esposa; solamente, sea un homber balente pa mi i bringa e batayanan di SENOR." Pasobra Saul a pensa: "Mi man lo no ta kontra dje, ma laga man di e filisteonan ta kontra dje."

¹⁸Ma David a bisa Saul: "Ta ken mi ta, i ta kiko mi bida of mi tata su famia ta den Israel, pa mi ta rei su yerno?"

¹⁹Asina a sosode ku ora a yega e tempu ku Merab, Saul su yu muhe, mester a wordu duna na David, el a wordu duna na Adriel e meholatita komo esposa.

²⁰Awor Mikal, Saul su yu muhe, a namora di David. Ora nan a konta Saul esaki, e asunto a agrad'e.

²¹I Saul a pensa: "Lo mi dun'e na David pa e bira un trampa p'e, i pa man di e filisteonan ta kontra dje." Pesei Saul a bisa David: "Pa di dos biaha bo por bira mi yerno awe."

²²E ora ei Saul a ordena su sirbidonan: "Papia ku David na sekreto, bisando: 'Mira, rei tin delisia den bo, i tur su sirbidonan ta stimabo; pesei awor, bira rei su yerno.'"

²³Asina Saul su sirbidonan a papia e palabranan aki ku David. Ma David a bisa: "Boso ta kere ku t'asina-asina ta bira yemo di rei, siendo ku ami ta un homber pober i insignifikante?"

²⁴I e sirbidonan di Saul a hiba rospondi p'e, konforme e palabranan aki ku David a papia.

²⁵Anto Saul a bisa: "Asina boso mester bisa David: 'Rei no ta desea ningun otro premio di bruit sino shen prepusio di e filisteonan, pa tuma vengansa riba e enemigunan di rei.'" Awor Saul su plan tabata di hasi David kai pa medio di man di e filisteonan.

²⁶Ora ku e sirbidonan di Saul a konta David e palabranan aki, a agrada David pa bira yerno di rei. I prome ku e dianan a pasa

²⁷David a lanta bai, e ku su hombernan, i a mata dos shen homber di e filisteonan. E ora ei David a trese nan prepusio, i e hombernan a entrega e kantidat kompleto na rei, pa David por a bira rei su yerno. Asina Saul a dun'e su yu muhe Mikal komo esposa.

²⁸Ora Saul a mira i a komprende ku SENOR tabata ku David, i ku Mikal, Saul su yu muhe, tabata stim'e,

²⁹Saul a hana mas miedu ainda di David. Asina Saul a keda enemigu di David pa semper.

³⁰Anto e komandantenan di e filisteonan a sali pa bataya; i a sosode ku kada bes ku nan a sali, David a aktua ku mas sabiduria ku tur e sirbidonan di Saul. Asina su nomber tabata masha apresia.