Read Papantla Totonac 1 Samuel 19 Bible Online

1 Samuel 19 - Papantla Totonac bible

1 Samuel 19

¹Awor Saul a bisa su yu homber Jonatan i tur su sirbidonan pa mata David. Ma Jonatan, yu homber di Saul, tabatin gran apresio pa David.

²Pesei Jonatan a bisa David: "Mi tata Saul ta buskabo pa mata. Pesei awor, pa fabor, sea alerta manan mainta, i keda na un luga sekreto i bai skonde.

³I lo mi sali bai para banda di mi tata den sabana kaminda bo ta, i lo mi papia ku mi tata tokante di bo; si mi hana sa kualke kos, lo mi bisabo."

⁴Anto Jonatan a papia bon di David ku su tata Saul i a bis'e: "No laga rei peka kontra su sirbido David, komo ku e no a peka kontra bo, i komo ku su echonan tabata di gran benefisio pa bo.

⁵Pasobra el a riska su bida i a mata e filisteo, i SENOR a obra un gran liberashon pa henter Israel; bo a mira esaki i bo a regosiha. Pakiko anto lo bo peka kontra sanger inosente dor di mata David sin motibu?"

⁶I Saul a skucha e bos di Jonatan, i Saul a hasi un huramentu: "Manera SENOR ta biba, e lo no wordu mata."

⁷E ora ei Jonatan a yama David, i Jonatan a kont'e tur e palabranan aki. I Jonatan a hiba David serka Saul, i e tabata den su presensia manera antes.

⁸Ora tabatin guera atrobe, David a sali i a bai bringa kontra e filisteonan, i a derota nan ku un gran matansa, asina ku nan a hui su dilanti.

⁹Awor tabatin un spiritu malu for di SENOR riba Saul ora ku e tabata sinta den su kas ku su lansa den su man. I David tabata toka arpa ku su man.

¹⁰I Saul a purba pega David na muraya ku e lansa, ma David a kita bai for di Saul su presensia, asina ku el a dal e lansa den muraya. I David a hui i a skapa e anochi ei.

¹¹E ora ei Saul a manda mensaheronan na David su kas pa vigil'e i pa mat'e den ora di mainta. Ma Mikal, David su esposa, a avis'e: "Si bo no skapa bo bida awe nochi, lo bo wordu mata manan."

¹²Asina Mikal a laga David baha dor di un bentana; i el a hui i a skapa.

¹³I Mikal a kohe e imagen pon'e riba e kama, i a pone un klechi di lana di kabritu na kabes di e kama i a habri un pana riba dje.

¹⁴Ora Saul a manda mensaheronan pa kohe David, Mikal a bisa: "E ta malu."

¹⁵E ora ei Saul a manda mensaheronan serka David, bisando: "Tres'e serka mi riba su kama, pa mi mat'e."

¹⁶Ora ku e mensaheronan a drenta, mira, ta e imagen tabata riba e kama, ku e klechi di lana di kabritu na kabes di e kama.

¹⁷Anto Saul a bisa Mikal: "Pakiko bo a ganami asin'aki i a laga mi enemigu bai, asina ku el a skapa?" I Mikal a bisa Saul: "El a bisami: 'Lagami bai! Pakiko mi mester matabo?'"

¹⁸Awor David a hui i a skapa, i el a bai serka Samuel na Rama i a kont'e tur loke Saul a hasi kune. Anto e ku Samuel a bai keda na Naiot.

¹⁹I nan a konta Saul, bisando: "Mira, David ta na Naiot na Rama."

²⁰E ora ei Saul a manda mensaheronan pa kohe David, ma ora nan a mira e grupo di profeta ta profetisa, ku Samuel para na kabes, e Spiritu di Dios a bin riba e mensaheronan di Saul, i nan tambe a profetisa.

²¹I ora nan a bisa Saul esaki, el a manda otro mensaheronan, i nan tambe a profetisa. Asina Saul a bolbe manda mensaheronan pa di tres biaha, i nan tambe a profetisa.

²²E ora ei Saul mes a bai Rama i a yega te na e pos grandi ku ta keda na Seku, i a hasi pregunta, bisando: "Unda Samuel i David ta?" I un hende a bisa: "Mira, nan ta na Naiot na Rama."

²³I el a bai ayanan, na Naiot na Rama; i e Spiritu di Dios a bin riba dje tambe, asina ku el a sigui su kaminda, profetisando kontinuamente, te ora ku el a yega Naiot na Rama.

²⁴I e tambe a kita su pana, i e tambe a profetisa dilanti di Samuel i a kai drumi abou sunu henter e dia ei i henter e anochi ei. Pesei nan ta bisa: "Saul tambe ta entre e profetanan?"