Read Papantla Totonac 1 Samuel 2 Bible Online

1 Samuel 2 - Papantla Totonac bible

1 Samuel 2

¹E ora ei Ana a hasi orashon i a bisa: "Mi kurason ta regosiha den SENOR; mi kachu ta halsa den SENOR. Mi boka ta papia ku kurashi kontra mi enemigunan, pasobra mi ta alegra den Bo salbashon.

²"No tin ningun santu manera SENOR, di berdat, no tin ningun otro fuera di Bo, tampoko no tin ningun baranka manera nos Dios.

³"No gaba mas ku tantu orguyo, no laga arogansia sali for di bo boka; pasobra SENOR ta un Dios di konosementu, i serka djé akshonnan ta wordu pisa.

⁴"E bognan di e poderosonan ta kibra na pida-pida, ma e debilnan ta faha ku forsa.

⁵Esnan ku tabata barika yen ta hur nan mes pa pan, ma esnan ku tabatin hamber no tin hamber mas. Asta esun steril ta duna lus na shete yu, ma esun ku tin hopi yu ta debilita.

⁶"SENOR ta mata i ta duna bida; E ta hasi baha den Seol i ta hasi lanta.

⁷SENOR ta hasi pober i ta hasi riku; E ta rebaha, tambe E ta halsa.

⁸E ta lanta e pober for di den stof, E ta hisa esun den nesesidat for di e monton di shinishi, pa pone nan sinta huntu ku e nobelnan i ereda un puesto di onor. "Pasobra e pilarnan di e tera ta di SENOR, i El a pone mundu riba nan.

⁹E ta warda e pianan di Su santunan, ma e malbadonan ta wordu silensia den skuridat. "Pasobra no ta pa medio di forsa un hende ta prevalese.

¹⁰Esnan ku lucha ku SENOR lo wordu kibra na pida-pida; kontra nan E lo strena den e shelunan, SENOR lo huzga e finnan di tera. I E lo duna forsa na Su rei i lo halsa e kachu di Su ungi."

¹¹E ora ei Elkana a bai su kas na Rama. Ma e mucha homber tabata sirbi SENOR dilanti di saserdote Eli.

¹²Awor e yu hombernan di Eli tabata hombernan perverso; nan no tabata konose SENOR,

¹³ni e kustumber di e saserdotenan pa ku e pueblo. Ora ku un homber tabata ofrese un sakrifisio, e sirbido di e saserdote tabata bin ora ku e karni tabata herebe ku un forki di tres punta den su man.

¹⁴E ora ei e tabata hinka esaki den e panchi of ketel of wea of paila; tur loke ku e forki trese ariba, e saserdote tabata tuma pa su mes. Asina nan tabata hasi na Silo ku tur e israelitanan ku tabata bin ayanan.

¹⁵Tambe, prome ku nan kima e vet, e sirbido di e saserdote tabata bin i bisa e homber ku tabata ofrese e sakrifisio: "Duna e saserdote karni pa hasa riba kandela, pasobra e lo no tuma karni herebe for di bo, solamente karni kuru."

¹⁶I si e homber bis'e: "Laga nan kima e vet prome, kaba kohe kuantu ku bo ta desea," e ora ei e tabata bisa: "No, bo mester dunami e karni awor; i si no, lo mi kit'e ku forsa."

¹⁷Asina e pika di e hobennan tabata masha grandi mes dilanti di SENOR, pasobra e hombernan tabata menospresia e ofrenda di SENOR.

¹⁸Awor Samuel tabata sirbi dilanti di SENOR--un mucha ku un efod di lino bisti.

¹⁹I su mama tabata traha un mantel chikitu p'e i tabata trese esaki tur ana p'e ora ku e tabata bin ku su esposo pa ofrese e sakrifisio di tur ana.

²⁰E ora ei Eli tabata bendishona Elkana i su esposa, i e tabata bisa: "Ku SENOR dunabo yunan for di e muhe aki na luga di esun ku el a dedika na SENOR." I nan a bai nan mes kas.

²¹I SENOR a bishita Ana; i el a konsebi i a duna lus na tres yu homber i dos yu muhe. I e mucha homber Samuel a krese dilanti di SENOR.

²²Awor Eli tabata hopi bieu; i el a tende tur loke su yu hombernan tabata hasi ku henter Israel, i kon nan tabata drumi ku e muhenan ku tabata sirbi na entrada di e tent di reunion.

²³I el a bisa nan: "Pakiko boso ta hasi kosnan asina, e kosnan malu ku mi ta tende di tur e hendenan aki?

²⁴No, mi yunan; pasobra e notisia ku mi ta tende e pueblo di Dios ta plama tur ront no ta bon.

²⁵Si un hende hasi pika kontra un otro, Dios lo intermedia p'e; ma si un hende hasi pika kontra SENOR, ken lo intersede p'e?" Ma nan no kier a skucha e bos di nan tata, pasobra SENOR tabata kier a mata nan.

²⁶Awor e mucha homber Samuel tabata krese den estatura i den grasia, tantu serka SENOR komo serka hende.

²⁷E ora ei un homber di Dios a bin serka Eli i a bis'e: "Asina SENOR ta bisa: 'Mi no a revela Mi mes klaramente na e kas di bo tata, tempu ku nan tabata bou di sklabitut na e kas di Farao na Egipto?

²⁸I no ta nan Mi a skohe for di tur e tribunan di Israel pa ta Mi saserdotenan, pa subi na Mi altar, pa kima sensia, pa bisti efod Mi dilanti? I no ta e kas di bo tata Mi a duna tur e ofrendanan di kandela di e yunan di Israel?

²⁹Pakiko bo ta despresia Mi sakrifisio i Mi ofrenda ku Mi a ordena den Mi luga di biba, i ta onra bo yu hombernan mas ku Mi, dor di hasi boso mes gordo ku e miho di tur ofrenda di Mi pueblo Israel?'

³⁰"Pesei e SENOR Dios di Israel ta deklara: 'Di berdat, Mi a bisa ku bo kas i e kas di bo tata lo kana Mi dilanti pa semper'; ma awor SENOR ta deklara: 'Ku esei sea leu di Mi, pasobra esnan ku onraMi, lo Mi onra, i esnan ku despresiaMi, lo ta poko apresia.

³¹Mira, e dianan ta bin ku lo Mi kibra bo forsa i forsa di e kas di bo tata, asina ku nunka lo no tin un homber bieu den bo kas.

³²I lo bo mira e aflikshon di Mi luga di biba, apesar di tur e bon ku Mi ta hasi pa Israel; i nunka mas lo no tin un homber bieu den bo kas.

³³Sinembargo, lo Mi no kita tur bo hombernan for di Mi altar, pa bo wowonan faya di yoramentu i bo alma keda tristu, i tur desendiente di bo kas muri den e flor di nan hubentut.

³⁴'I esaki lo ta e senal pa bo tokante di loke ta bai sosode ku bo dos yu hombernan, Ofni i Finees: nan tur dos lo muri riba e mesun dia.

³⁵Ma lo Mi lanta pa Mi mes un saserdote fiel, kende lo hasi segun loke ta den Mi kurason i den Mi alma; i lo Mi traha p'e un kas duradero, i e lo kana dilanti di Mi ungi pa semper.

³⁶I lo sosode ku kada un ku keda den bo kas lo bin i buig p'e pa un pida plata of un pan, i lo bisa: "Pa fabor, ponemi den un di e sirbishinan saserdotal, pa mi por kome pida pan.