Read Papantla Totonac 1 Samuel 20 Bible Online

1 Samuel 20 - Papantla Totonac bible

1 Samuel 20

¹E ora ei David a hui bai for di Naiot na Rama, i a bin bisa Jonatan: "Ta kiko mi a hasi? Ta kiko ta mi inikidat? I ta kiko ta mi pika kontra bo tata, ku e ta buska mi bida?"

²I Jonatan a bis'e: "Di ningun manera bo no ta bai muri. Mira, mi tata no ta hasi nada, ni grandi ni chikitu, sin konfia esaki na mi. Pakiko anto mi tata lo skonde e kos aki pa mi? No ta berdat!"

³Tog David a bolbe hasi un huramentu, bisando: "Bo tata sa masha bon ku mi a hana grasia den bo bista, i el a bisa: 'No laga Jonatan sa esaki, pa e no bira tristu.' Ma di berdat, manera SENOR ta biba i manera bo alma ta biba, tin apenas un stap entre ami i morto."

⁴E ora ei Jonatan a bisa David: "Tur loke bo bisa, lo mi hasi pa bo."

⁵Asina David a bisa Jonatan: "Mira, manan ta luna nobo, i mi mester bai sinta kome ku rei. Ma lagami bai, pa mi bai skonde den kunuku te na e di tres anochi.

⁶Si bo tata sinti mi falta, bis'e: 'David a pidimi masha pa lagu'e kore bai su stat Betlehem, pasobra ayanan tin e sakrifisio anual pa henter e famia.'

⁷Si e bisa: 'Ta bon', bo sirbido lo ta for di peliger; ma si e ta hopi rabia, sabi ku el a disidi pa hasi maldat.

⁸Pesei, trata bo sirbido ku karino, pasobra bo a sera un aliansa di SENOR ku bo sirbido. Ma si tin inikidat den mi, anto matami bo mes, pasobra pakiko lo bo entregami na bo tata?"

⁹I Jonatan a bisa: "Ku esei sea leu di bo! Pasobra si di berdat mi hana sa ku mi tata a disidi pa maldat kontra bo, lo mi no a kontabo esaki?"

¹⁰E ora ei David a bisa Jonatan: "Ken lo kontami si bo tata kontestabo na un manera brutu?"

¹¹I Jonatan a bisa David: "Ban, i laga nos bai den kunuku." Asina nan dos a sali bai den kunuku.

¹²E ora ei Jonatan a bisa David: "SENOR, e Dios di Israel, sea testigu! Despues ku mi a averigua for di mi tata manan na e mesun ora aki, of riba e di tres dia, mira, si kos resulta bon pa David, lo mi no manda rospondi i lagabo sa?

¹³Ma si mi tata hana bon pa hasibo dano, ku SENOR hasi asina ku Jonatan i pio ainda, si mi no lagabo sa esaki i mandabo bai, pa bo bai na pas. I ku SENOR sea ku bo, manera E tabata ku mi tata.

¹⁴I si mi ta na bida ainda, lo bo no mustrami e miserikordia di SENOR, pa mi no muri?

¹⁵I lo bo no kita bo miserikordia for di mi kas pa semper, ni ora SENOR korta kita kada un di e enemigunan di David for di riba e superfisio di tera."

¹⁶Asina Jonatan a sera un aliansa ku e kas di David, bisando: "Ku SENOR rekeri esaki for di man di e enemigunan di David."

¹⁷I Jonatan a hasi David hura atrobe pa motibu di su amor p'e; pasobra e tabata stim'e meskos ku e tabata stima su mes bida.

¹⁸E ora ei Jonatan a bis'e: "Manan ta luna nobo, i nan lo sinti bo falta, pasobra bo asiento lo keda bashi.

¹⁹I riba e di tres dia bo mester baha bai lihe i bin na e luga kaminda bo a skonde riba e dia ku e evento ei a tuma luga, i keda banda di e piedra di Ezel.

²⁰I lo mi tira tres flecha banda di dje, komo si fuera ta riba blanku mi ta tira.

²¹I mira, lo mi manda e hoben, bisando: 'Bai buska e flechanan.' Si mi bisa e mucha spesifikamente: 'At'e flechanan ta na e banda aki di bo, bai kohe nan,' anto bin, pasobra no tin peliger pa bo, ni nada malu, manera SENOR ta biba.

²²Ma si mi bisa e hoben: 'At'e flechanan a kai mas leu di bo,' bai, pasobra SENOR a mandabo bai.

²³Pa loke ta e asunto ku abo i ami a papia di dje, mira, SENOR ta entre abo i ami pa semper."

²⁴Asina David a skonde den kunuku; i ora tabata luna nobo, rei a kai sinta pa kome.

²⁵I rei a sinta riba su asiento manera kustumber, e asiento banda di muraya; e ora ei Jonatan a lanta, i Abner a kai sinta banda di Saul, ma David su luga a keda bashi.

²⁶Sinembargo, Saul no a bisa nada e dia ei, pasobra el a pensa: "Algu lo a pas'e; e no ta limpi, siguramente e no ta limpi."

²⁷I a sosode ku su manise, e di dos dia di luna nobo, David su luga a bolbe keda bashi; pesei Saul a bisa su yu homber Jonatan: "Pakiko e yu homber di Isai no a bin kome ni ayera ni awe?"

²⁸E ora ei Jonatan a kontesta Saul: "David a pidimi masha pa lagu'e bai Betlehem,

²⁹pasobra el a bisa: 'Pa fabor, lagami bai, komo ku nos famia ta selebra un sakrifisio den stat, i mi ruman homber a ordenami pa asisti. I awor, si mi a hana grasia den bo bista, pa fabor, lagami bai pa mi bishita mi rumannan.' Pa e motibu aki e no a bin na rei su mesa."

³⁰E ora ei Saul a rabia masha ku Jonatan, i el a bis'e: "Abo, yu di un muhe perverso i rebelde! Bo a kere ku mi no sa ku bo ta skohe e yu di Isai pa bo mes berguensa i pa berguensa di bo mama su desnudes?

³¹Pasobra tanten ku e yu di Isai ta biba riba tera, ni abo ni bo reino lo no ta stables! Pesei anto, manda busk'e i tres'e serka mi, pasobra siguramente e mester muri."

³²Ma Jonatan a kontesta su tata Saul i a bis'e: "Pakiko mester mat'e? Kiko el a hasi?"

³³E ora ei Saul a tira su lansa riba dje pa mat'e; asina Jonatan a hana sa ku su tata a disidl di mata David.

³⁴E ora ei Jonatan a lanta for di mesa masha rabia mes, i e no a kome riba e di dos dia di luna nobo, komo ku e tabata tristu pa motibu di David, pasobra su tata a desonr'e.

³⁵Awor a sosode ku su siguiente mainta Jonatan a sali bai den kunuku pa e sita ku David, i tabatin un mucha homber chikitu huntu kune.

³⁶I el a bisa e mucha: "Kore, bai buska e flechanan ku mi ta tira." I segun ku e mucha tabata kore, el a tira un flecha ku a pas'e forbei.

³⁷Ora ku e mucha a yega na e luga kaminda e flecha ku Jonatan a tira tabata, Jonatan a grita e mucha i a bisa: "No ta mas leu di bo e flecha a kai?"

³⁸I Jonatan a grita e mucha: "Hasi lihe, pura, no keda para!" I e mucha di Jonatan a kohe e flecha for di abou i a bin serka su shon.

³⁹Ma e mucha no tabata sa di nada; solamente Jonatan i David tabata sa di e asunto.

⁴⁰Despues Jonatan a duna e mucha su armanan i a bis'e: "Bai, hiba nan den stat."

⁴¹Despues ku e mucha a bai, David a sali for di e banda pasuit, a tira su kurpa abou ku su kara te na suela i a buig tres biaha. I nan a sunchi otro i a yora huntu, ma David mas tantu.

⁴²I Jonatan a bisa David: "Bai na pas, komo ku nos a hura na otro den e nomber di SENOR, bisando: 'SENOR lo ta entre ami i abo, i entre mi desendientenan i bo desendientenan pa semper.'" E ora ei el a lanta i a sali bai, i Jonatan a bai den stat.