Read Papantla Totonac 1 Samuel 22 Bible Online

1 Samuel 22 - Papantla Totonac bible

1 Samuel 22

¹Asina David a bai for di ayanan i a hui bai den e kueba di Adulam; i ora su ruman hombernan i henter e kas di su tata a tende di esaki, nan a baha bai ayanan serka dje.

²I tur hende ku tabata afligi, tur hende ku tabatin debe i tur hende ku tabata malkontentu, a reuni serka dje; i el a bira nan kapitan. Awor tabatin mas o menos kuater shen homber huntu kune.

³I for di ayanan David a bai Mizpa di Moab i el a bisa rei di Moab: "Pa fabor, laga mi tata i mi mama bin keda serka bo te ora mi hana sa kiko Dios ta bai hasi pa mi."

⁴E ora ei el a laga nan serka rei di Moab; i nan a keda serka dje tur e tempu ku David tabata den e luga fortifika.

⁵I profeta Gad a bisa David: "No keda den e luga fortifika; sali i bai tera di Juda." Asina David a bai i a drenta e mondi-sera di Haret.

⁶Awor Saul a tende ku David i e hombernan ku tabata huntu kune a wordu deskubri. I Saul tabata sinta na Gabaa bou di e palu di tamarisko riba e luga haltu, ku su lansa den su man, i tur su sirbidonan tabata para ront di dje.

⁷I Saul a bisa su sirbidonan ku tabata para ront di dje: "Tende awor, O benjaminitanan! E yu homber di Isai lo duna tur di boso tereno i kunuku di wendruif? Lo e hasi tur di boso komandante di milnan i komandante di shennan?

⁸Pasobra boso tur a konspira kontra mi, asina ku no tin ningun hende ku ta spiertami ora mi yu homber sera un aliansa ku e yu homber di Isai; i no tin ningun di boso ku tin duele di mi of ku ta spiertami ku mi yu homber a instiga mi sirbido kontra mi pa skonde pa ataka, manera ta e kaso riba e dia djawe."

⁹E ora ei Doeg e edomita, kende tabata para serka e sirbidonan di Saul, a kontesta i a bisa: "Mi a mira e yu homber di Isai ta bin Nob serka Ahimelek, yu homber di Ahitob.

¹⁰I Ahimelek a konsulta ku SENOR pa David, a dun'e provishonnan i a dun'e e spada di e filisteo Goliat."

¹¹E ora ei rei a manda un hende pa yama saserdote Ahimelek, yu homber di Ahitob, i henter e kas di su tata, e saserdotenan ku tabata na Nob; i nan tur a bin serka rei.

¹²I Saul a bisa: "Skucha awor, yu homber di Ahitob." I el a kontesta: "At'ami aki, mi senor."

¹³E ora ei Saul a bis'e: "Pakiko bo a konspira kontra mi, abo ku e yu homber di Isai, dor di dun'e pan i un spada, i dor di konsulta ku Dios p'e, pa e lanta kontra mi dor di skonde pa ataka, manera ta e kaso riba e dia djawe?"

¹⁴E ora ei Ahimelek a kontesta rei i a bisa: "I ta ken entre tur bo sirbidonan ta fiel manera David, ku asta ta rei su yerno, ku ta kapitan riba bo soldanan-di-guardia i ku ta onra den bo kas?

¹⁵Ta awe numa mi a kuminsa konsulta ku Dios p'e? Di ningun manera! No laga rei kulpa su sirbido di nada, ni ningun hende di e kas di mi tata, pasobra bo sirbido no sa apsolutamente nada di henter e asunto aki."

¹⁶Ma rei a bisa: "Siguramente lo bo muri, Ahimelek, abo i henter e kas di bo tata!"

¹⁷I rei a bisa e soldanan-di-guardia ku tabata atend'e: "Bira i mata e saserdotenan di SENOR, pasobra nan man tambe ta ku David i pasobra nan tabata sa ku e tabata hui i no a partisipa esaki na mi." Ma e sirbidonan di rei no kier a saka nan man pa ataka e saserdotenan di SENOR.

¹⁸E ora ei rei a bisa Doeg: "Abo bira i ataka e saserdotenan." I Doeg e edomita a bira i a ataka e saserdotenan; i e dia ei el a mata ochent'i sinku homber ku tabatin e efod di lino bisti.

¹⁹I el a dal Nob, e stat di e saserdotenan, ku filo di spada, tantu homber komo muhe, mucha i yu na pechu; tambe buey, buriku i karne el a dal ku filo di spada.

²⁰Ma un yu homber di Ahimelek, yu homber di Ahitob, ku yama Abiatar, a skapa i a hui bai serka David.

²¹I Abiatar a bisa David ku Saul a mata e saserdotenan di SENOR.

²²E ora ei David a bisa Abiatar: "E dia aya, ora ku Doeg e edomita tabata ayanan, mi tabata sa ku siguramente e lo a konta Saul. Ta ami ta kousa di e morto di tur persona di e kas di bo tata.

²³Keda serka mi, no tene miedu, pasobra esun ku ta buska bo bida ta buska mi bida tambe; serka mi bo ta for di peliger."