Read Papantla Totonac 1 Samuel 23 Bible Online

1 Samuel 23 - Papantla Totonac bible

1 Samuel 23

¹E ora ei nan a konta David, bisando: "Mira, e filisteonan ta bringa kontra Keila, i nan ta plunder e plenchinan-di-bati-mainshi."

²Asina David a konsulta ku SENOR, bisando: "Mi mester bai ataka e filisteonan aki?" I SENOR a bisa David: "Bai, ataka e filisteonan i libra Keila."

³Ma David su hombernan a bis'e: "Mira, aki na Juda mes nos tin miedu. Kuantu mas anto si nos bai Keila kontra e trupanan di e filisteonan!"

⁴E ora ei David a konsulta ku SENOR un biaha mas. I SENOR a kontest'e i a bisa: "Lanta, baha bai Keila, pasobra lo Mi entrega e filisteonan den bo man."

⁵Pesei David ku su hombernan a bai Keila i a bringa kontra e filisteonan; i el a bai ku nan bestianan di kria i a kousa un gran matansa den nan. Asina David a libra e habitantenan di Keila.

⁶Awor a sosode ku ora Abiatar, yu homber di Ahimelek, a hui bai serka David na Keila, el a baha bin ku un efod den su man.

⁷Ora nan a bisa Saul ku David a bin Keila, Saul a bisa: "Dios a entregu'e den mi man, pasobra dor di drenta un stat ku dobel porta i ku bara el a sera su kurpa aden."

⁸Pesei Saul a manda yama henter e pueblo pa bai guera, pa baha bai Keila pa rondona David ku su hombernan.

⁹Awor David tabata sa ku Saul tabata plania maldat kontra dje; pesei el a bisa saserdote Abiatar: "Trese e efod akinan."

¹⁰E ora ei David a bisa: "O SENOR Dios di Israel, Bo sirbido a tende ku sigur-sigur Saul ta trata di bin Keila pa destrui e stat pa mi motibu.

¹¹E hendenan di Keila lo entregami den su man? Saul lo baha bin manera Bo sirbido a tende? O SENOR Dios di Israel, mi ta pidiBo, bisa Bo sirbido." I SENOR a bisa: "E lo baha bin."

¹²E ora ei David a bisa: "E hendenan di Keila lo entrega ami ku mi hombernan den man di Saul?" I SENOR a bisa: "Nan lo entrega boso."

¹³Anto David ku su hombernan, mas o menos seis shen, a lanta i a sali bai for di Keila, i nan a bai di un luga pa otro. Ora nan a konta Saul ku David a skapa for di Keila, el a stop di persigui nan.

¹⁴I David a keda den mondi den e luganan fortifika, i a keda den e serunan den e mondi di Zif. I tur dia Saul tabata busk'e, ma Dios no a entregu'e den su man.

¹⁵Awor mientras ku David tabata den e mondi di Zif na Hores el a bin hana sa ku Saul a sali pa busk'e pa mata.

¹⁶I Jonatan, yu homber di Saul, a lanta i a bai serka David na Hores, i a enkurash'e den Dios.

¹⁷Asina el a bis'e: "No tene miedu, pasobra man di mi tata Saul lo no hanabo, i lo bo ta rei di Israel, i net despues di bo t'ami; i mi tata Saul tambe sa esei."

¹⁸Asina nan dos a sera un aliansa dilanti di SENOR, i David a keda na Hores, mientras ku Jonatan a bai su kas.

¹⁹Despues e zifeonan a bin serka Saul na Gabaa, bisando: "No ta serka nos den e luganan fortifika di Hores, riba e seru di Hakila ku ta keda pasuit di Jeshimon, David ta skonde?

²⁰Awor anto, O rei, baha bin konforme henter e deseo di bo alma pa hasi asina; i nos parti lo ta pa entregu'e den rei su man."

²¹I Saul a bisa: "Ku SENOR bendishona boso, pasobra boso tabatin kompashon ku mi.

²²Bai awor i buska pa sa sigur unda su luga di skonde ta keda, i ta ken a mir'e ayanan; pasobra nan a bisami ku e ta masha astuto.

²³Asina wak i buska pa hana sa di tur e luganan di skonde kaminda e ta skonde, i bolbe serka mi ku informashon sigur, i lo mi bai ku boso; i lo sosode ku si e ta na e tera, lo mi busk'e entre tur e milnan di Juda."

²⁴E ora ei nan a lanta i a bai Zif dilanti di Saul. Awor David ku su hombernan tabata den e desierto di Maon, na Araba, pasuit di Jeshimon.

²⁵Ora Saul ku su hombernan a bai busk'e, nan a konta David esaki, i el a baha bin na e baranka i a keda den e desierto di Maon. I ora Saul a tende esaki, el a persigui David den e desierto di Maon.

²⁶I Saul a pasa na un banda di e seru, i David ku su hombernan na e otro banda di e seru; i David tabata pura pa skapa for di Saul, pasobra Saul ku su hombernan tabata rondona David ku su hombernan pa gara nan.

²⁷Ma un mensahero a bin serka Saul, bisando: "Bin lihe, pasobra e filisteonan a invadi e tera."

²⁸Asina Saul a stop di persigui David, i a bai kontra ku e filisteonan; pesei nan a yama e luga ei Baranka di Skapatorio.

²⁹I David a bai for di ayanan i a keda den e luganan fortifika di En-gadi.