Read Papantla Totonac 1 Samuel 24 Bible Online

1 Samuel 24 - Papantla Totonac bible

1 Samuel 24

¹Awor a sosode ku ora Saul a stop di persigui e filisteonan, nan a kont'e, bisando: "Mira, David ta den e desierto di En-gadi."

²E ora ei Saul a kohe tres mil homber skohi for di henter Israel i a bai buska David ku su hombernan dilanti di e Barankanan di e Kabritunan di Mondi.

³I na kaminda el a yega na e kuranan di karne, kaminda tabatin un kueba; i Saul a drenta pa hasi su nesesidat. Awor David ku su hombernan tabata sinta den e partinan mas paden di e kueba.

⁴I e hombernan di David a bis'e: "Mira, esaki ta e dia di kual SENOR a bisabo: 'Mira, mi ta bai entrega bo enemigu den bo man, i lo bo hasi kune manera bo ta hana ta bon.'" E ora ei David a lanta i ketu-ketu a korta zom di Saul su mantel kit'afo.

⁵I despues a sosode ku David su konsenshi tabata molesti'e, pasobra el a korta zom di Saul su mantel kit'afo.

⁶Pesei el a bisa su hombernan: "Ku esaki sea leu di mi di hasi un kos asin'aki ku mi senor, SENOR Su ungi, di lanta mi man kontra dje, siendo ku e ta SENOR Su ungi."

⁷I David a reprende su hombernan ku e palabranan aki i no a permit! nan lanta kontra Saul. I Saul a lanta, a sali for di e kueba i a sigui su kaminda.

⁸Despues David a lanta i a sali for di e kueba i a grita Saul, bisando: "Mi senor rei!" I ora Saul a drai wak, David a tira su kurpa abou i a buig ku su kara te na suela i a mustra reverensia.

⁹I David a bisa Saul: "Pakiko bo ta skucha e palabranan di hende ora nan bisa: 'Mira, David ta buska pa hasibo dano'?

¹⁰Ata, riba e dia aki bo wowo a mira ku SENOR a entregabo awe den mi man den e kueba, i algun di mi hendenan a bisa pa matabo; ma mi a hana duele di bo, i mi a bisa: 'Lo mi no lanta mi man kontra mi senor, pasobra e ta SENOR Su ungi.'

¹¹Awor mi tata, mira! Si, mira e zom di bo mantel den mi man! Pasobra komo mi a korta zom di bo mantel kit'afo, ma no a matabo, komprende i mira ku no tin maldat ni rebeldia den mi man, i mi no a peka kontra bo, ounke ku bo ta skonde warda pa kita mi bida.

¹²Ku SENOR huzga entre abo i ami, i ku SENOR tuma vengansa pa mi kontra bo, ma mi man lo no ta kontra bo.

¹³Manera e proverbio di e bieunan ta bisa: 'For di e malbado ta sali maldat', ma mi man lo no ta kontra bo.

¹⁴"Tras di ken rei di Israel a sali? Ta ken bo ta persigui? Un kacho morto, un purga?

¹⁵Pesei, SENOR sea hues i huzga entre abo i ami; i ku E mira i pleita mi kaso, i librami for di bo man."

¹⁶Awor a sosode ku ora David a kaba di papia e palabranan aki ku Saul, Saul a bisa: "Ta bo bos esaki, mi yu David?" E ora ei Saul a halsa su bos i a yora.

¹⁷I el a bisa David: "Abo ta mas hustu ku mi, pasobra abo a trata bon ku mi, mientras ku ami a trata malu ku bo.

¹⁸I awe bo a deklara ku bo a hasi bon na mi, ku SENOR a entregami den bo man i tog bo no a matami.

¹⁹Pasobra si un hende hana su enemigu, lo e lagu'e bai sano i salvo? Pesei, ku SENOR rekompensabo ku bon pa loke bo a hasi pa mi riba e dia aki.

²⁰I awor, mira, mi sa ku siguramente lo bo bira rei, i ku e reino di Israel lo keda stablest den bo man.

²¹Pesei awor, hurami pa SENOR ku lo bo no korta kita mi desendientenan afo despues di mi, i ku lo bo no destrui mi nomber for di e kas di mi tata."

²²I David a hura na Saul. I Saul a bai su kas, ma David ku su hombernan a subi bai na e luga fortifika.