Read Papantla Totonac 1 Samuel 25 Bible Online

1 Samuel 25 - Papantla Totonac bible

1 Samuel 25

¹Awor Samuel a muri; i henter Israel a bin huntu i a tene rou p'e i a der'e na su kas na Rama. I David a lanta i a bai na e desierto di Paran.

²Awor tabatin un homber na Maon ku tabatin su negoshi na Karmel; i e homber tabata masha riku mes, i e tabatin tres mil karne i mil kabritu, ku e tabata pela na Karmel.

³Nomber di e homber tabata Nabal i nomber di su esposa, Abigail. I e muhe tabata inteligente i bunita di aparensia, ma e homber tabata brutu i di mala fe, i e tabata di e kas di Kaleb.

⁴Anto David a tende den e mondi ku Nabal tabata pela su karnenan.

⁵Asina David a manda dies hoben, i David a bisa e hobennan: "Subi bai na Karmel, bishita Nabal i salud'e den mi nomber;

⁶i asina boso lo bisa: 'Bida largu na bo, pas sea ku bo, pas sea ku bo kas, i pas sea ku tur loke bo tin.

⁷'I awor mi a tende ku bo tin peladonan di karne; awor bo wardadonan di karne tabata serka nos i nos no a trata nan malu, ni nan no a sinti falta di nada durante di tur e dianan ku nan tabata na Karmel.

⁸Puntra bo hobennan i nan lo kontabo. Pesei, laga mi hobennan hana grasia den bo bista, pasobra nos a bin riba un dia di fiesta. Pa fabor, duna bo sirbidonan i bo yu David loke bo tin na man.'"

⁹Ora ku e hobennan di David a yega, nan a papia ku Nabal konforme tur e palabranan aki den e nomber di David; anto nan a keda warda.

¹⁰Ma Nabal a kontesta e sirbidonan di David i a bisa: "Ta ken ta David? I ta ken ta e yu di Isai? Awendia tin hopi sirbido ku ta hui bai for di nan shon.

¹¹Mi mester kohe mi pan, mi awa i mi karni ku mi a mata pa mi peladonan di karne, i duna esaki na hombernan ku mi no sa for di unda nan ta bin?"

¹²Asina e hobennan di David a bira riba mesun pia bai bek; i nan a bin konta David tur e palabranan aki.

¹³I David a bisa su hombernan: "Boso tur faha boso spada." Asina tur su hombernan a faha nan spada. I David tambe a faha su spada, i mas o menos kuater shen homber a subi bai tras di David, mientras ku dos shen a keda pa kuida e ekipahe.

¹⁴Ma un di e hobennan a konta Abigail, esposa di Nabal, bisando: "Mira, David a manda mensaheronan for di den desierto pa saluda nos shon; i el a despresia nan.

¹⁵Tog e hombernan tabata masha bon pa nos, i nos no a wordu trata malu, ni nos no a sinti falta di nada durante di e tempu ku nos tabata bai bin huntu ku nan, tempu ku nos tabata den e sabananan.

¹⁶Nan tabata un muraya pa nos di dia i anochi, tur e tempu ku nos tabata huntu ku nan ta kuida e karnenan.

¹⁷Pesei anto, sabi i konsidera kiko bo mester hasi, pasobra tin maldat plania kontra nos shon i kontra henter su kas; i e ta un homber asina perverso ku ningun hende no por papia kune."

¹⁸E ora ei Abigail a hasi lihe-lihe i a kohe dos shen pan, dos saku-di-kueru ku bina aden, sinku karne prepara kaba, sinku midi di mainshi tosta, shen troshi di rasenchi i dos shen klompi di figo, i a karga nan riba buriku.

¹⁹I el a bisa su sirbidonan: "Bai mi dilanti; mira, mi ta bin boso tras." Ma e no a konta su esposo Nabal nada.

²⁰I a sosode ku ora e tabata kore riba su buriku ta baha bin dor di e parti skondi di e seru, ata David ku su hombernan tabata baha bin den su direkshon; i el a topa ku nan.

²¹Awor David a bisa: "Siguramente ta en bano mi a proteha tur loke e homber aki tin den desierto, asina ku e no tabata falta nada di tur loke tabata pertenese na dje; i el a debolbemi malu pa bon.

²²Ku Dios hasi asina ku e enemigunan di David, i pio ainda, si pa manan mainta mi laga un solo homber na bida di tur esnan ku ta pertenese na dje."

²³Ora Abigail a mira David, el a baha lihe-lihe for di su buriku, i a tira su kurpa abou dilanti di David, i a buig ku su kara te na suela.

²⁴I el a tira su kurpa abou na pia di David i a bisa: "Laga e kulpa ta riba ami so, mi senor. I pa fabor, laga bo sirbiente papia ku bo, i skucha e palabranan di bo sirbiente.

²⁵Pa fabor, ku mi senor no hasi kaso di Nabal, e homber perverso aki, pasobra manera su nomber ta, asina e ta. Nabal ta su nomber i banidat ta kompan'e; ma ami, bo sirbiente, no a mira e hobennan ku mi senor a manda.

²⁶"Pesei anto, mi senor, manera SENOR ta biba, i manera bo alma ta biba, siendo ku SENOR a wardabo di drama sanger i di tuma vengansa pa bo mes ku bo mes man, awor anto, ku bo enemigunan i esnan ku ta plania maldat kontra mi senor sea manera Nabal.

²⁷I awor, ku e regalo aki ku bo sirbiente a trese pa mi senor wordu duna na e hobennan ku ta kompana mi senor.

²⁸Pa fabor, pordona e transgreshon di bo sirbiente, pasobra siguramente SENOR lo stablese un kas permanente pa mi senor, pasobra mi senor ta bringa e batayanan di SENOR, i maldat lo no wordu hana den bo den tur bo dianan.

²⁹I si kualkier hende lanta pa persiguibo i pa buska bo bida, e ora ei e bida di mi senor lo ta mara den e bonder di e bibunan huntu ku SENOR bo Dios; ma e bida di bo enemigunan E lo zwai tir'afo, manera ta tira piedra for di saku di un slenger.

³⁰I lo sosode ku ora SENOR hasi pa mi senor konforme tur e bon ku El a papia tokante di bo, i stablesebo komo gobernante di Israel,

³¹esaki lo no kousa tristesa ni remordementu di kurason pa mi senor, pa motibu ku mi senor a drama sanger inosente of ku mi senor a tuma vengansa pa su mes. Ora SENOR trata bon ku mi senor, korda riba bo sirbiente."

³²E ora ei David a bisa Abigail: "Bendishona sea e SENOR Dios di Israel, Kende a mandabo e dia aki pa kontra ku mi,

³³i bendishona sea bo disernimentu, i bendishona sea abo mes, kende a kitami awe di drama sanger i di tuma vengansa pa mi mes ku mi mes man.

³⁴Sinembargo, manera e SENOR Dios di Israel ta biba, Kende a wardami di hasibo dano, si bo no a bin lihe pa kontra ku mi, siguramente lo no a keda Nabal ni un homber prome ku dia habri."

³⁵Asina David a risibi for di su man loke ku el a trese p'e, i David a bis'e: "Bai bo kas na pas. Mira, mi a skuchabo i a konsede bo petishon."

³⁶Anto Abigail a bin serka Nabal, i mira, e tabata na su kas ta tene un bankete, manera bankete di rei. I Nabal su kurason tabata alegre, pasobra e tabata hopi burachi; pesei Abigail no a kont'e apsolutamente nada prome ku dia a habri.

³⁷Ma a sosode ku mainta, ora Nabal su wayaba a pasa, su esposa a kont'e e kosnan aki, i su kurason a para den su kurpa, asina ku el a bira manera un piedra.

³⁸I mas o menos dies dia despues a sosode ku SENOR a afligi Nabal, i el a muri.

³⁹Ora David a tende ku Nabal tabata morto, el a bisa: "Bendishona sea SENOR, Kende a pleita e kousa di mi reproche for di man di Nabal, i a warda Su sirbido for di maldat. Tambe SENOR a debolbe e maldat di Nabal riba su mes kabes." E ora ei David a manda un proposishon pa Abigail, pa tum'e komo su esposa.

⁴⁰Ora ku e sirbidonan di David a bin serka Abigail na Karmel, nan a papia kune, bisando: "David a manda nos serka bo, pa tumabo komo su esposa."

⁴¹I el a lanta i a buig ku su kara te na suela i a bisa: "Mira, bo sirbiente ta un kria pa laba pia di mi senor su sirbidonan."

⁴²E ora ei lihe-lihe Abigail a lanta i a subi un buriku, huntu ku su sinku sirbientenan ku tabata atend'e; i el a sigui e mensaheronan di David, i a bira su esposa.

⁴³Tambe Ahinoam di Jezreel David a tuma, i nan tur dos a bira su esposa.

⁴⁴Awor Saul a duna su yu muhe Mikal, David su esposa, na Palti, yu homber di Lais, kende tabata di Galim.