Read Papantla Totonac 1 Samuel 26 Bible Online

1 Samuel 26 - Papantla Totonac bible

1 Samuel 26

¹E ora ei e zifeonan a bin serka Saul na Gabaa, bisando: "No ta riba e seru di Hakila, pariba di Jeshimon, David ta skonde?"

²Asina Saul a lanta i a baha bai den e desierto di Zif, i huntu kune tres mil homber skohi di Israel, pa buska David den e desierto di Zif.

³I Saul tabata kampa den e seru di Hakila, ku ta keda pariba di e desierto, banda di e kaminda, i David tabata keda den e desierto. Ora ku el a mira ku Saul tabata bin su tras den desierto,

⁴David a manda spion i a hana sa ku di berdat Saul tabata bin.

⁵E ora ei David a lanta i a bin na e luga, kaminda Saul tabata kampa. I David a mira e luga kaminda Saul i Abner, yu homber di Ner, komandante di su ehersito, tabata drumi; i Saul tabata drumi meimei di e kampamentu, i e pueblo tabata kampa ront di dje.

⁶E ora ei David a kontesta i a bisa Ahimelek e heteo i Abisai, yu homber di Sarvia, Joab su ruman homber, bisando: "Ken kier baha bai ku mi serka Saul den e kampamentu?" I Abisai a bisa: "Ami ta bai ku bo."

⁷Asina David ku Abisai a bin serka e pueblo den anochi, i mira, Saul tabata drumi na sono meimei di e kampamentu, ku su lansa hinka den suela banda di su kabes; i Abner ku e pueblo tabata drumi ront di dje.

⁸Anto Abisai a bisa David: "Awe Dios a entrega bo enemigu den bo man; pesei awor, pa fabor, lagami pegu'e den tera ku e lansa, den un hinka; i lo mi no tin mester di hasie pa di dos biaha."

⁹Ma David a bisa Abisai: "No mat'e, pasobra ken por saka su man kontra SENOR Su ungi i keda sin kulpa?"

¹⁰Tambe David a bisa: "Manera SENOR ta biba, siguramente SENOR lo dal e, of su dia di muri lo yega, of e lo bai den bataya i perese.

¹¹SENOR wardami di saka mi man kontra SENOR Su ungi; ma awor, pa fabor, kohe e lansa ku ta banda di su kabes i e butishi di awa, i laga nos ban."

¹²Asina David a kohe e lansa i e butishi di awa for di banda di Saul su kabes, i nan a bai; ma ningun hende no a mira ni a ripara esaki, ni ningun hende no a spierta, pasobra nan tur tabata na sono, pasobra un sono profundo for di SENOR a kai riba nan.

¹³E ora ei David a krusa bai na e otro banda i a bai para na un distansia riba kabes di e seru, ku un espasio grandi meimei di nan.

¹⁴I David a yama e pueblo i Abner, yu homber di Ner, bisando: "Abner, bo no ta kontesta?" E ora ei Abner a kontesta i a bisa: "Ta ken bo ta, abo ku ta yamando rei?"

¹⁵Pesei David a bisa Abner: "No ta homber bo ta? I ta ken ta manera bo na Israel? Pakiko anto bo no a proteha senor bo rei? Pasobra un hende di e pueblo a bin pa mata senor bo rei.

¹⁶E kos aki ku bo a hasi no ta bon. Manera SENOR ta biba, siguramente boso tur mester muri, pasobra boso no a proteha boso senor, SENOR Su ungi. I awor, wak unda rei su lansa ta, i e butishi di awa ku tabata banda di su kabes."

¹⁷E ora ei Saul a rekonose David su bos i a bisa: "Ta bo bos esaki, mi yu David?" I David a bisa: "Ta mi bos, senor mi rei."

¹⁸Tambe el a bisa: "Pakiko mi senor ta persigui su sirbido asina? Ta kiko mi a hasi? Of ta ki maldat tin den mi man?

¹⁹Pesei awor, pa fabor, laga senor mi rei skucha e palabranan di su sirbido. Si ta SENOR a instigabo kontra mi, lagu'E asepta un ofrenda; ma si ta hende, maldishona nan ta dilanti di SENOR, pasobra awe nan a kitami di tin parti den e erensia di SENOR, bisando: 'Bai, sirbi otro diosnan.'

²⁰Asina anto, no laga mi sanger kai abou na suela leu for di e presensia di SENOR, pasobra rei di Israel a sali bin pa buska un purga, manera hende ta yag riba un patrishi den e serunan."

²¹E ora ei Saul a bisa: "Mi a peka. Bin bek, mi yu David, pasobra lo mi no hasibo dano mas, komo ku awe mi bida tabata presioso den bo bista. Mira, mi a hasi kos di loko i a komete un eror grave."

²²I David a kontesta i a bisa: "Ata e lansa di rei! Awor, laga un di e hobennan bin akinan i tum'e.

²³I SENOR lo rekompensa kada homber pa su hustisia i su fieldat, pasobra awe SENOR a entregabo den mi man, ma mi no tabata kier a saka mi man kontra SENOR Su ungi.

²⁴Awor mira, manera bo bida tabata di gran balor den mi bista awe, ku mi bida tambe por ta di gran balor den bista di SENOR, i ku E librami di tur angustia."

²⁵E ora ei Saul a bisa David: "Bendishona bo ta, mi yu David; lo bo logra hopi i siguramente lo bo prevalese." Asina David a sigui su kaminda, i Saul a bai bek na su luga.