Read Papantla Totonac 1 Samuel 28 Bible Online

1 Samuel 28 - Papantla Totonac bible

1 Samuel 28

¹Awor a sosode ku den e dianan ei e filisteonan a mobilisa nan ehersitonan pa guera, pa bringa kontra Israel. I Akis a bisa David: "Komprende bon ku ta ku mi bo mester sali bai bataya, abo ku bo hombernan."

²I David a bisa Akis: "Masha bon, lo bo hana sa kiko bo sirbido por hasi." Anto Akis a bisa David: "Masha bon, lo mi hasibo mi warda espalda pa henter mi bida."

³Awor Samuel a muri kaba, i henter Israel a lamenta su morto i a der'e na Rama, su mes stat. I Saul a saka esnan ku tabata montado i spiritista for di e tera.

⁴Asina e filisteonan a reuni nan mes i a bin kampa na Sunem; i Saul a reuni henter Israel i nan a kampa na Gilboa.

⁵Ora Saul a mira e kampamentu di e filisteonan, el a hana miedu, i su kurason tabata tembla masha.

⁶Ora Saul a konsulta ku SENOR, SENOR no a kontest'e, ni pa medio di sono, ni pa medio di Urim, ni pa medio di profeta.

⁷E ora ei Saul a bisa su sirbidonan: "Buska pa mi un muhe ku ta montado, pa mi bai serka dje i konsulta kune." I su sirbidonan a bis'e: "Mira, na Endor tin un muhe ku ta montado."

⁸E ora ei Saul a disfrasa su mes dor di bisti otro pana, i a bai, e ku dos homber huntu kune; i anochi nan a yega serka e muhe. I Saul a bisa: "Pa fabor, invoka un spiritu pa mi, i lanta pa mi esun ku mi mentabo su nomber."

⁹Ma e muhe a bis'e: "Mira, bo mes sa kiko Saul a hasi, kon el a korta tur esnan ku ta montado i spiritista kita for di e tera. Pakiko anto bo ta pone un trampa pa mi bida pa kousa mi morto?"

¹⁰Anto Saul a hur'e pa SENOR, bisando: "Manera SENOR ta biba, lo no bin ningun kastigu riba bo pa e kos aki."

¹¹E ora ei e muhe a bisa: "Ken mi mester lanta pa bo?" I el a bisa: "Lanta Samuel pa mi."

¹²Ora ku e muhe a mira Samuel, el a dal un gritu duru; i e muhe a papia ku Saul, bisando: "Pakiko bo a ganami? Ta bo mes ta Saul!"

¹³I rei a bis'e: "No tene miedu; ma kiko bo ta mira?" I e muhe a bisa Saul: "Mi ta mira un ser dibino ta sali for di tera."

¹⁴I Saul a bis'e: "Kon su figura ta?" I e muhe a bisa: "Un homber bieu ta sali bin ariba, ku un mantel na su kurpa." I Saul a komprende ku tabata Samuel, i el a tira su kurpa abou i a buig ku su kara te na suela.

¹⁵E ora ei Samuel a bisa Saul: "Pakiko bo a molestiami dor di hasimi bin?" I Saul a kontesta: "Mi ta den gran angustia, pasobra e filisteonan ta hasi guera kontra mi, i Dios a bai for di mi i no ta kontestami mas, ni pa medio di profeta, ni pa medio di sono; pesei mi a yamabo, pa bo lagami sa kiko mi mester hasi."

¹⁶I Samuel a bisa: "Pakiko bo ta puntrami anto, siendo ku SENOR a bai for di bo i a bira bo atversario?

¹⁷I SENOR a hasi manera El a papia pa medio di mi, pasobra SENOR a sker e reino kit'e for di bo man i a dun'e na bo prohimo, na David.

¹⁸Komo ku bo no a obedese SENOR i no a ehekuta Su rabia ardiente kontra Amalek, pesei SENOR a hasi e kos aki ku bo awe.

¹⁹Ademas, SENOR lo entrega Israel tambe huntu ku bo den man di e filisteonan; pesei manan abo i bo yu hombernan lo ta huntu ku mi. Tambe SENOR lo entrega e ehersito di Israel den man di e filisteonan!"

²⁰I mesora Saul a kai tur su largu riba suela, masha spanta pa motibu di e palabranan di Samuel; e no tabatin forsa mas tampoko, pasobra henter dia i henter anochi e no a kome.

²¹I e muhe a bin serka Saul i a mira ku e tabata morto spanta, i el a bis'e: "Mira, bo sirbiente a obedesebo, i mi a riska mi bida i a skucha bo palabranan ku bo a papia ku mi.

²²Pesei awor tambe, pa fabor, skucha e bos di bo sirbiente, i lagami pone un pida pan bo dilanti, pa bo kome i tin forsa ora bo ta sigui bo kaminda."

²³Ma el a nenga i a bisa: "Mi no kier kome." Sinembargo, su sirbidonan huntu ku e muhe a insist!, i el a skucha nan. Asina el a lanta for di suela i a kai sinta riba kama.

²⁴I e muhe tabatin un bishe gorda den kas, i el a mat'e mesora. I el a kohe harina, a mans'e, i a traha pan sin zurdeg kune.

²⁵Anto el a trese esaki pa Saul ku su sirbidonan, i nan a kome. Despues nan a lanta i a bai e mesun anochi ei.