Read Papantla Totonac 1 Samuel 29 Bible Online

1 Samuel 29 - Papantla Totonac bible

1 Samuel 29

¹Awor e filisteonan a reuni tur nan ehersitonan na Afek, mientras ku e israelitanan tabata kampa banda di e fuente ku ta keda na Jezreel.

²I e prensnan di e filisteonan tabata pasa bai na shennan i na milnan, i David ku su hombernan tabata sigui mas patras, huntu ku Akis.

³E ora ei e komandantenan di e filisteonan a bisa: "Ta kiko e hebreonan aki ta hasi akinan?" Anto Akis a bisa e komandantenan di e filisteonan: "Esaki no ta David, sirbido di Saul, rei di Israel, esun ku tabata huntu ku mi e dianan aki, of miho bisa e ananan aki; i mi no a hana ningun falta den dje for di dia ku el a pasa pa mi banda te dia djawe."

⁴Ma e komandantenan di e filisteonan tabata rabia kune, i e komandantenan di e filisteonan a bis'e: "Manda e homber aki bai bek, pa e bolbe na e luga kaminda bo a pon'e, i no lagu'e bai bataya ku nos, pa e no bira un atversario di nos den bataya. Pasobra ku kiko e homber aki por hasi su mes aseptabel serka su senor? No ta ku kabes di e hombernan aki?

⁵Esaki no ta e David, di kende nan ta kanta den e bailenan, bisando: 'Saul a mata su milnan, i David su dies milnan'?"

⁶E ora ei Akis a yama David i a bis'e: "Manera SENOR ta biba, bo tabata hustu, i bo salida i bo entrada huntu ku mi den e ehersito ta agradabel den mi bista, pasobra for di dia ku bo a bin serka mi te dia djawe mi no a hana maldat den bo. Sinembargo, bo no ta agradabel den bista di e prensnan.

⁷Pesei awor, bolbe i bai na pas, pa bo no desagrada e prensnan di e filisteonan."

⁸I David a bisa Akis: "Ma ta kiko mi a hasi? I ta kiko bo a hana den bo sirbido for di e dia ku mi a bin den bo presensia te dia djawe, ku mi no tin mag di bai bringa kontra e enemigunan di senor mi rei?"

⁹Ma Akis a kontesta i a bisa David: "Mi sa ku bo ta agradabel den mi bista, manera un angel di Dios; sinembargo, e komandantenan di e filisteonan a bisa: 'E no mag bai bataya huntu ku nos.'

¹⁰Pesei anto, lanta mainta tempran huntu ku e sirbidonan di bo senor ku a bin ku bo, i sali bai mainta tempran, asina ku tin klaridat di dia."

¹¹Asina David a lanta tempran, e ku su hombernan, pa sali bai mainta, pa bolbe na e tera di e filisteonan. I e filisteonan a subi bai Jezreel.