Read Papantla Totonac 1 Samuel 4 Bible Online

1 Samuel 4 - Papantla Totonac bible

1 Samuel 4

¹Asina e palabra di Samuel a yega na henter Israel. Awor Israel a sali bai pa kontra ku e filisteonan den bataya i a kampa banda di Eben-ezer, mientras ku e filisteonan a kampa na Afek.

²I e filisteonan a pone nan mes den ordu di bataya pa kontra ku Israel. Ora ku e bataya a plama bira mas grandi, Israel a wordu derota dilanti di e filisteonan, kendenan a mata mas o menos kuater mil homber riba e tereno di bataya.

³Ora ku e pueblo a bin den e kampamentu, e ansianonan di Israel a bisa: "Pakiko SENOR a derota nos awe dilanti di e filisteonan? Laga nos trese pa nos mes for di Silo e arka di e aliansa di SENOR, pa e bin meimei di nos i libra nos di e poder di nos enemigunan."

⁴Asina e pueblo a manda mensahe na Silo, i for di aya nan a trese e arka di e aliansa di e SENOR di ehersitonan, Kende ta sinta ariba di e kerubinnan; i e dos yu hombernan di Eli, Ofni i Finees, tabata ayanan ku e arka di aliansa di Dios.

⁵I a sosode ku ora e arka di e aliansa di SENOR a bin den e kampamentu, henter Israel a dal un gritu duru, asina ku tera a tembla.

⁶I ora ku e filisteonan a tende e zonidu di e gritu, nan a bisa: "Ta kiko e zonidu di e gritu duru aki den e kampamentu di e hebreonan ta nifika?" E ora ei nan a komprende ku e arka di SENOR a yega den e kampamentu.

⁷I e filisteonan a hana miedu, pasobra nan a bisa: "Dios a bin den e kampamentu." I nan a bisa: "Ai di nos! Pasobra nunka antes un kos asin'aki no a yega di sosode.

⁸Ai di nos! Ken lo libra nos for di man di e diosnan poderoso aki? Esakinan ta e diosnan ku a suta e egipsionan ku tur sorto di plaga den desierto.

⁹Tuma kurashi i sea homber, O filisteonan, pa boso no bira esklabu di e hebreonan, manera nan tabata boso esklabu; pesei, sea homber i bringa."

¹⁰Asina e filisteonan a bringa, i Israel a wordu derota, i kada homber a hui bai na su tent i e matansa tabata masha grandi mes; pasobra di Israel a kai trinta mil solda-na-pia.

¹¹I nan a kohe e arka di Dios; i e dos yu hombernan di Eli, Ofni i Finees, a muri.

¹²Awor riba e mesun dia ei un homber di Benjamin a kore for di e fila di bataya bai Silo, ku su pananan gesker i ku tera riba su kabes.

¹³Ora ku el a yega, ata, Eli tabata sinta riba su asiento banda di kaminda, sperando ansiosamente, pasobra su kurason tabata tembla pa kousa di e arka di Dios. Ora ku e homber a drenta den e stat i a konta loke a pasa, henter e stat a dal un gritu.

¹⁴Ora ku Eli a tende e zonidu di e gritamentu, el a bisa: "Ta kiko e boroto aki ta nifika?" Anto e homber a bin pura-pura i a konta Eli.

¹⁵Awor Eli tabatin nobent'i ocho ana i su wowo a bira skur, asina ku e no por a mira.

¹⁶I e homber a bisa Eli: "Ami ta esun ku a bin for di e fila di bataya. Di berdat, awe mi a hui for di e fila di bataya." I Eli a bisa: "Kon kos a bai, mi yu?"

¹⁷E ora ei esun ku a trese e notisia a kontesta i a bisa: "Israel a hui dilanti di e filisteonan i tabatin tambe un gran matansa meimei di e pueblo, i tambe bo dos yu hombernan, Ofni i Finees, a muri, i e arka di Dios a wordu kaptura."

¹⁸I a sosode ku ora el a menshona e arka di Dios, Eli a kai ku lomba for di su asiento banda di e porta di stat, i a kibra su nek i el a muri, pasobra e tabata bieu i pisa. Asina Eli a huzga Israel kuarenta ana.

¹⁹Awor su nuera, esposa di Finees, tabata na estado i serka di duna lus; i ora ku el a tende e notisia ku nan a kohe e arka di Dios i ku su suegro i su esposo a muri, el a sak abou i a duna lus, pasobra su dolonan di parto a lanta.

²⁰I ora ku e tabata muriendo e muhenan ku tabata para banda di dje a bis'e: "No tene miedu, pasobra bo a duna lus na un yu homber." Ma e no a kontesta ni a pone atenshon.

²¹I el a yama e mucha Ikabod, bisando: "E gloria a bai for di Israel," pasobra nan a kohe e arka di Dios i pa motibu di su suegro i su esposo.

²²I el a bisa: "E gloria a bai for di Israel, pasobra nan a kohe e arka di Dios."