Read Papantla Totonac 1 Samuel 5 Bible Online

1 Samuel 5 - Papantla Totonac bible

1 Samuel 5

¹Awor e filisteonan a kohe e arka di Dios i a hib'e for di Eben-ezer na Asdod.

²Anto e filisteonan a kohe e arka di Dios i a hib'e na e kas di Dagon i a pon'e banda di Dagon.

³Su manise, ora ku e asdoditanan a lanta mainta tempran, ata Dagon tabata benta abou riba su kara dilanti di e arka di SENOR. Asina nan a kohe Dagon i a bolbe pon'e na su luga.

⁴Ma su manise, ora nan a lanta mainta tempran, ata Dagon tabata benta abou riba su kara dilanti di e arka di SENOR. I Dagon su kabes i su dos plant'i mannan a wordu korta afo riba e drempel; solamente Dagon su kurpa a keda.

⁵Pesei ni e saserdotenan di Dagon, ni ningun hende ku drenta den e kas di Dagon na Asdod, no ta pone pia riba e drempel di Dagon na Asdod te dia djawe.

⁶Awor e man di SENOR tabata pisa riba e asdoditanan i El a destrosa nan i a afligi nan ku tumor, tantu Asdod komo su teritorionan.

⁷Ora ku e hombernan di Asdod a mira ku tabata asina, nan a bisa: "E arka di e Dios di Israel no mester keda serka nos, pasobra Su man ta duru riba nos i riba Dagon nos dios."

⁸Asina nan a manda yama i a reuni tur e prensnan di e filisteonan huntu i a bisa: "Kiko nos mester hasi ku e arka di e Dios di Israel?" I nan a bisa: "Laga e arka di e Dios di Israel wordu hiba bek na Gat." I nan a hiba e arka di e Dios di Israel ayanan.

⁹I a sosode ku despues ku nan a hib'e bek, e man di SENOR tabata kontra e stat ku un konfushon masha grandi mes; i El a afligi e hombernan di e stat, tantu hoben komo bieu, asina ku nan kurpa a yena ku tumor.

¹⁰Asina nan a manda e arka di Dios na Ekron. I a sosode ku ora e arka di Dios a yega Ekron, e ekronitanan a sklama, bisando: "Nan a trese e arka di e Dios di Israel aki bek serka nos pa mata nos i nos pueblo."

¹¹Pesei nan a manda yama i a reuni tur e prensnan di e filisteonan i a bisa: "Manda e arka di e Dios di Israel bai, i lagu'e bolbe na su mes luga, pa e no mata nos i nos pueblo." Pasobra den henter e stat tabatin un konfushon mortal; e man di Dios tabata masha pisa ayanan.

¹²I e hombernan ku no a muri a wordu afligi ku tumor, i e sklamashon di e stat a subi te na shelu.