Read Papantla Totonac 1 Samuel 6 Bible Online

1 Samuel 6 - Papantla Totonac bible

1 Samuel 6

¹Awor e arka di SENOR tabata den e tera di e filisteonan pa shete luna.

²I e filisteonan a manda yama e saserdotenan i e adivinadonan, bisando: "Kiko nos mester hasi ku e arka di SENOR? Bisa nos kon nos mester mand'e su luga bek."

³I nan a bisa: "Si boso debolbe e arka di e Dios di Israel, no mand'e bashi; ma siguramente boso mester manda un ofrenda pa kulpa p'E. E ora ei boso lo kura i boso lo hana sa ta pakiko Su man no a kita for di boso."

⁴E ora ei nan a bisa: "Ki ofrenda pa kulpa nos mester manda p'E?" I nan a bisa: "Sinku tumor di oro i sinku raton di oro, segun e kantidat di e prensnan di e filisteonan, pasobra e mesun plaga tabatin riba boso tur i riba boso prensnan.

⁵Asina boso mester traha modelo di boso tumornan i modelo di boso ratonnan ku ta destrui e tera, i boso mester duna gloria na e Dios di Israel; podise E lo slek Su man for di riba boso, boso diosnan i boso tera.

⁶Pakiko anto boso ta hasi boso kurason duru, manera e egipsionan i Farao a hasi nan kurason duru? Ora ku El a trata duru ku nan, no t'asina ku nan a permiti e pueblo bai, i nan a bai?

⁷"Pesei anto, kohe i prepara un garoshi nobo i dos baka di lechi ku no a karga yugo nunka ainda; i gancha e bakanan na e garoshi i kita nan bishenan for di nan hiba kas.

⁸I kohe e arka di SENOR i pon'e riba e garoshi; i pone e artikulonan di oro ku boso ta manda p'E komo un ofrenda pa kulpa den un kaha banda di dje. Anto mand'e bai; lagu'e bai.

⁹I wak, si e subi pa e kaminda di su mes teritorio bai Bet-semes, anto ta E a hasi nos e maldat grandi aki. Ma si no, e ora ei nos lo sa ku no ta Su man a afligi nos; ta pa kasualidat esaki a sosode ku nos."

¹⁰Anto e hombernan a hasi asina, i a kohe dos baka di lechi i a gancha nan na e garoshi i a sera nan bishenan na kas.

¹¹I nan a pone e arka di SENOR riba e garoshi, i tambe e kaha ku e ratonnan di oro i e modelonan di nan tumornan.

¹²I e bakanan a kohe e kaminda direkto den direkshon di Bet-semes; nan a pasa riba e kaminda grandi, i tabata grita segun ku nan tabata bai, i nan no a bira bai ni na man drechi ni na man robes. I e prensnan di e filisteonan a sigui nan te na e frontera di Bet-semes.

¹³Awor e hendenan di Bet-semes tabata kosecha nan trigo den e vaye, i nan a hisa kara mira e arka i a bira kontentu di mir'e.

¹⁴I e garoshi a yega den e kunuku di Josue e bet-semita, i a keda para einan kaminda tabatin un piedra grandi; i nan a spleit e palu di e garoshi i a ofrese e bakanan komo un ofrenda kima na SENOR.

¹⁵I e levitanan a baha e arka di SENOR i e kaha ku tabata huntu kune, ku tabata kontene e artikulonan di oro, i a pone nan riba e piedra grandi; i e hombernan di Bet-semes a ofrese ofrendanan kima i a ofrese sakrifisionan na SENOR e dia ei.

¹⁶I ora ku e sinku prensnan di e filisteonan a mira esaki, nan a bolbe Ekron e mesun dia.

¹⁷I esakinan ta e tumornan di oro ku e filisteonan a debolbe komo un ofrenda pa kulpa na SENOR: un pa Asdod, un pa Gaza, un pa Askalon, un pa Gat, un pa Ekron;

¹⁸i e ratonnan di oro, segun e kantidat di tur e statnan di e filisteonan ku tabata pertenese na e sinku prensnan, tantu di e statnan fortifika komo di e pueblitonan di kunuku. E piedra grandi ku nan a pone e arka di SENOR ariba ta un testimonio te dia djawe den e kunuku di Josue e bet-semita.

¹⁹I El a mata algun di e hombernan di Bet-semes, pasobra nan a wak den e arka di SENOR. El a mata di henter e pueblo sinkuenta mil i setenta homber, i e pueblo a lamenta, pasobra SENOR a dal e pueblo ku un gran matansa.

²⁰I e hombernan di Bet-semes a bisa: "Ken por para dilanti di SENOR, e Dios santu aki? I serka ken lo E bai despues di nos?"

²¹Asina nan a manda mensaheronan serka e habitantenan di Kiriat-jearim, bisando: "E filisteonan a debolbe e arka di SENOR; baha bin koh'e hiba serka boso."