Read Papantla Totonac 1 Samuel 8 Bible Online

1 Samuel 8 - Papantla Totonac bible

1 Samuel 8

¹I a sosode ku ora Samuel a bira bieu, el a nombra su yu hombernan komo hues riba Israel.

²Awor nomber di su primogenito tabata Joel, i nomber di esun di dos, Abias; nan tabata huzga na Beerseba.

³Sinembargo, su yu hombernan no a kana den su pasonan, ma a desvia bai tras di ganashi desonesto i a tuma plaka pasa bou di mesa i a perverti hustisia.

⁴E ora ei tur e ansianonan di Israel a bin huntu i a bin serka Samuel na Rama,

⁵i nan a bis'e: "Mira, bo a bira bieu, i bo yunan no ta kana den bo kamindanan. Awor nombra un rei pa nos pa huzga nos, manera tur otro nashon tin."

⁶Ma esaki tabata desagradabel den bista di Samuel ora nan a bisa: "Duna nos un rei pa huzga nos." I Samuel a hasi orashon na SENOR.

⁷I SENOR a bisa Samuel: "Skucha bos di e pueblo den tur loke nan ta bisabo, pasobra no ta abo nan a rechasa, sino ta Ami nan a rechasa di ta rei riba nan.

⁸Meskos ku nan a hasi for di dia ku Mi a saka nan for di Egipto te dia djawe--esta, ku nan a bandonaMi i a sirbi otro diosnan--asina nan ta hasiendo ku bo tambe.

⁹Awor anto, skucha nan bos; sinembargo, spierta nan solemnemente i konta nan kon e rei ku lo reina riba nan lo hasi."

¹⁰Asina Samuel a papia tur e palabranan di SENOR ku e pueblo ku a pidie un rei.

¹¹I el a bisa: "Asina e rei ku lo reina riba boso lo hasi: e lo kohe boso yu hombernan i pone nan pa su mes den su garoshinan i entre su koredonan di kabai, i nan lo kore dilanti di su garoshinan.

¹²I e lo nombra pa su mes komandantenan di milnan i di sinkuentanan, i algun pa plug su tera i pa kosecha su kosecha i pa traha su armanan di guera i ekipo pa su garoshinan.

¹³Tambe e lo kohe boso yu muhenan pa ta trahado di perfume, i pa ta koki i trahado di pan.

¹⁴I e lo kohe e miho parti di boso kunukunan i di boso plantashonnan di wendruif i boso hofinan di oleifi duna su sirbidonan.

¹⁵I e lo kohe un desimo parti di boso simia i di boso plantashonnan di wendruif i duna su ofisialnan i su sirbidonan.

¹⁶Tambe e lo kohe boso sirbidonan homber i boso sirbidonan muhe i boso hobennan di mas miho i boso burikunan, i uza nan pa hasi su trabou.

¹⁷E lo kohe un desimo parti di boso kria di bestia chikitu, i boso mes lo bira su sirbidonan.

¹⁸Anto e dia ei boso lo sklama pa motibu di boso rei ku boso a skohe pa boso mes, ma SENOR lo no kontesta boso e dia ei."

¹⁹Sinembargo, e pueblo a nenga di skucha bos di Samuel; i nan a bisa: "No, tog mester tin un rei riba nos,

²⁰pa nos tambe ta manera tur otro nashon, pa nos rei huzga nos i sali bai nos dilanti i bringa nos batayanan."

²¹Awor despues ku Samuel a kaba di tende tur e palabranan di e pueblo, el a ripiti nan pa SENOR tende.

²²I SENOR a bisa Samuel: "Skucha nan bos i nombra un rei pa nan." E ora ei Samuel a bisa e hombernan di Israel: "Kada un bai su mes stat."