Read pokomo Matayo 11 Bible Online

Matayo 11 - pokomo bible

Matayo 11

¹D̯ubva Yesu epfokwisa kuwaḍama hawa wanafund̯iwe kumi na wawii, kanuka kenda midzi ingine ya hizihiziḍe ḍanda akasumwiiye na kuyongweeza.

²Yohana Mut̯opya epfosikia na gerenzani dzuu ya haya mambo ya *Kirist̯o eyoakihenda, kahuma wanafund̯iwe kwakwe.

³Kawamba, “Endani mukamuuze kwamba jeje ndiye ayu Masiya[50] hwiyekuyoweeyani kwamba anakudza, ambu huindiiye muntu yungine?”

⁴D̯ubva wepfokwenda wakimuuza, Yesu kawambukuya kawamba, “Galani kwa Yohana mukamusumwiiye haya musikiiyeyo na muoneyeo.

⁵Mwambeni ntumbu matso wakuonani, vihewi wakwenendani, wajwazi wa kwanga wakupfozwani, makurud̯ud̯u wakusikiani, wantu wafwiyeo wakufufujwani, na makowesa wakusumwiijwani haya maagu mema.[51]

⁶Na kawii mwambeni, kula asiye kajela nami kavodhyegwa.”

⁷Hawa wanafund̯i wa Yohana wepfowakinuka, Yesu kaḍabva kunena ne t̯ut̯a ya wantu dzuu ya Yohana. Kawauza kawamba, “Mwipfokwenda kumusikiiya Yohana akuḍe yuwandani, mwikit̯aria kuona muntu eyedze? Mwikit̯aria kwendaona muntu eye dza yuḍanzi jwijonabigwa ni mpepfo jukadzivut̯ia ḅasi?

⁸Ambu mwikit̯ara kwamba mwendaona muntu avwaiye nguo nyema nyema? Moro, weonavwaa dzevyohivyo ni wantu weonakaa madzumbani mwa mahaju.

⁹Mwikit̯aria kwamba mwendaona muntu eyedze? Ntamwiikwenda kuona nabii? Ḅasi hachi nyakumwambiani, mwenda muona muntu eye hat̯a zaid̯i ya nabii!

¹⁰Koro Yohana ndiye anenejwee humu matsoroni kwamba kadzahumigwa. Haya matsoro yamba, ‘T̯ayowa, namuhuma ntumi jwangu usoni yako, adzeielekanya njiayo.’

¹¹Hachi nyakumwambiani, kahi ya wanaad̯amu wonse waishiyeo, ntakudzawa na yuḍejwonse eye mukuu kumuchia Yohana Mut̯opya. Ela huyuḍe eye muḍoḍo jwa mwiso Uhajuni mwa Mbinguni, ni mukuu kumuchia Yohana.

¹²Hangu ngera ya Yohana aḍabviyeyo kusumwiiya hat̯a hi hii saasambi, haya maagu dzuu ya Uhaju wa Mbinguni yakupfingwani kula pfantu. Na hao hao wantu weokuyapfingani, wakutsakani kuukuya Uhaju wa Mbingu na nguvu.

¹³Koro haya matsoro yasumwiiya dzuu ya kudza kwohuu Uhaju hat̯a kaḅila Yohana nkadzaḍabva kusumwiiya.

¹⁴Na ikiwa kwamba mwaa t̯ayari kuvihikiza hivi vya hawa manabii waneneyevyo,[52] ḅasi Yohana Mut̯opya ndiye huyu Eliya at̯aḅirijwee kwamba njwakudza.

¹⁵D̯ubva kula awee na masikio nasikiye.”

¹⁶Yesu kagija kunena kamba, “Mani d̯ubva wantu dzawahawa niwainganye na? Waa dza vit̯aro vya wana weokutsezani moroni. Hawa wana wa hiki kit̯aro kimodza wawalalabvia hawa wana wa hikiḍe kit̯aro kingine wawamba,

¹⁷‘Nywinywi humwimbia meya ya kwamba muvine, ela ntamukuvina. Humwimbia meya ya masikit̯iko, ela vivyo ntamukusikit̯ika!’

¹⁸Ninena hivi kwa kwamba Yohana Mut̯opya epfokudza, ekifunga kut̯wa na wala nkakunwa mvinyo, na wantu wamba kwamba ewa na mpepfo nzuka.

¹⁹Nami *Mwana jwa Ad̯amu nidza, na naḍya na kunwa mvinyo na wantu, na wantu wananyamba mimi ni mwambi na ni murumi. Na pia wananyamba kwamba mimi ni ḅamu jwa *wahwaa kuwa na wantu wangine wanabvise! Ela nyakumwambiani, mvidhyo iyonayawa kwa Muungu inaonekana kuwa ya hachi kuuḅana na mahendo ya hawaḍe weonawa na hi hii mvidhyo.”

²⁰Makisa Yesu kaḍabva kunena na ukali dzuu ya wantu wa midzi asumwiiyeyo na akihenda mambo menji ya mafara. Kanena na ukali kwa kwamba ewa kasumwiiya na kuhenda mambo menji ya kumakisa kahi yao, ela hat̯a vivyo ntawakupfyehuza mama.

²¹D̯ubva kamba, “Mudzawa na d̯ina iyodze nywinywi wantu wa midzi ya Korazini na Betisaiḍa! T̯ambere hayaḍe mafara ya kumakisa yahendejweyo kwenu yandeewa kwamba yahendegwa midzi ya Turo na Sidoni, saa hizi wenye wandeewa kwamba wavwaa magunia na kudzihiiya ivu hangu iiḍe na iiḍe, kuyanga kwamba wapfyehuza mama!

²²Hachi nyakumwambiani, nsiku ya hukumu idzepfofika, Muungu kadzawafwia t̯ei zaid̯i wantu wa midzi ya Turo na Sidoni kuliko nywinywi!

²³Na nywinywi wantu wa Kaperinaumi, hat̯a mukiḍema kudzikuzya mumpaka mufike mbinguni, munasuswa nsii mumpaka lumwengu jwa wafu! Koro t̯ambere hayaḍe mafara ya kumakisa yahendejweyo kwenu yandeewa kwamba yahendegwa mudzi wa Sod̯oma, Sod̯oma ntaindenangwa!

²⁴Ela hachi nyakumwambiani, nsiku ya hukumu idzepfofika, Muungu anawafwia t̯ei zaid̯i wantu wa Sod̯oma kuliko nywinywi!”

²⁵Makisa Yesu kayomba kamba, “Nakuyaviza ḍuḍa e Baba, wiye Haju jwa yuwinguni na nsi yonse. Nakuyaviza ḍuḍa kwa kwamba hi hachi kuiwafitsa hawaḍe weonadzihwaa kwamba ni makaro na wamanyi, na kuiwapfenwiiya wantu weo dza vyana vichuchu!

²⁶Ndivyo Baaba, kuona vyema kuhenda hivi hivi koro vikutsakiza.”

²⁷Makisa Yesu kamba, “Baba kanimpa mawezo dzuu ya kula kintu. Ntaku yuḍejwonse amumanyiye huyu Mwana, lamud̯a Baba jeje heket̯u. Na ntaku yuḍejwonse amumanyiye huyu Baba lamud̯a huyu Mwana na hawaḍe wonse wa huyu Mwana atsaniyeo kumuyanganya huyu Baba kwao.”

²⁸Yesu kagija kunena kamba, “Nzoni kwangu nywinywi nyonse mwiwokuhangaikani na muzihopfejweo ni mizigo, nami namumpa kusoha.

²⁹Dziwekeni nsii yangu na mudziyongweeze kuyawa kwangu. Koro mimi ni mumpowe na nina mojo mununu. Mukihenda hivi, ndipfo munapata kuingamaa myojo.

³⁰Maanaye hizi amuri zangu nizonamumpa ni mvodho na haya mambo niyonamwambia ni rahisi kuyauḅa.”[53]