Read pokomo Matayo 13 Bible Online

Matayo 13 - pokomo bible

Matayo 13

¹Makisa iiḍe nsiku, Yesu kanuka na hapfaḍe nyumbani kenda hukuḍe geri yeḍi ziwa kakaa chihako.

²Epfokaa karingwa ni t̯ut̯a nkuu ya wantu, nae kaona kwamba heri anjie chomboni. Epfonjia kakaa chihako, na hawa wantu wasumama hapfaḍe geri yeḍi ziwa.

³Makisa kawasumwiiya mambo menji na menji kwa mainganyo. Kawamba, “Kwiwa na muntu mumodza endeye kushat̯ani mbeju.

⁴Epfoakishat̯a, mbeju zingine zigwa njiani na ziḍigwa ni nsongo.

⁵Mbeju zingine zigwa maweni kusikokuwa na mutsanga mwinji, na zimea haraka.

⁶Ela kwa kwamba hi mitse ntaiwa na mizi yendeyeyo nsii, ipfobigwa ni dzuwa inyuuka ifwa.

⁷Zingine zigwa miwani na hi miwa nayo ikuya iishumpanya hi mimea na iiyaga.

⁸Ela mbeju zingine zigwa kuntu kwa mutsanga munono na zivyaa chima cha nseensee miyongo mihahu zaid̯i ya hiviḍe zishat̯ijwevyo. Zingine zivyaa chima cha miyongo mihandahu ambu gana, zaid̯i ya hiviḍe zishat̯ijwevyo.

⁹D̯ubva huyuḍe eye na masikio nasikiye!”

¹⁰Makisa hawa wanafund̯i wamwendea Yesu wamuuza wamwamba, “Ḅwana, kut̯i kula ukwakunenani na hawa wantu unakaa na kunena na mainganyo?”

¹¹Yesu kawambukuya kawamba, “Nywinywi muḍyaalijwa kuimanya siri ya Uhaju wa Mbinguni, ela wangine ntawakuḍyaalijwa.

¹²Koro huyuḍe eye na kintu na akikitumia, huyo anakwongezejwa zaid̯i na zaid̯i. Ela huyuḍe asiye na kintu, ḅasi hat̯a hakaḍe kachuchu ekonako pia anakapfokwa.[59]

¹³Ndiyo maana niyonanena nao na mainganyo kwa dzambo ḍya kwamba gula kuona wanaona, ela ntawahambuye kintu. Na kusikiiya wanasikiiya, ela ntawaimuke kintu.

¹⁴Ndookomu huḍe unabii wa Isaya unat̯imia kwao. Koro vyoregwa kwamba, ‘Munapfindiiya na kupfindiiya, ela ntamut̯oimuka kintu. Munachimiza na kuchimiza, ela ntamut̯oona kintu.

¹⁵Vitswa vyenu vihenda vyumu, na masikio yenu yahenda maziho. Na kuona ntamuone, koro mufinya. Ndookomu ntamusikiye, ntamuone, na wala ntamuimuke kintu. T̯ambere si hivyo, mundeniperukia mimi, nami nindemupfonya.’

¹⁶Ela nywinywi muvodhyegwa muno, koro matso yenu yanaona, na masikio yenu yanasikia.

¹⁷Koro hachi nyakumwambiani, manabii wenji pfamodza na wantu wangine wachuuwo, wat̯amani muno kuyaona haya haya mwiyokuonani nywinywi, ela ntawakuyaona. Wat̯amani kuyasikia haya mwiyokusikiani nywinywi, ela ntawakuyasikia.”

¹⁸Yesu kagija kunena na hawa wanafund̯iwe kawamba, “D̯ubva nywinywi sikiiyani maana ya hiḍi inganyo ḍya huyu muntu endeye kushat̯ani mbeju.

¹⁹Hiziḍe mbeju zigwiyezo njiani, ni dza hawaḍe wantu weonayasikiiya haya maagu ya Uhaju wa Mbinguni na wakatsayaimuka. Muzuka Shaat̯ani anakudza na kuwapfoka hiḍe mbeju ye chuuwo cha Muungu ishat̯ijweyo myojoni mwao.

²⁰Hiziḍe mbeju zigwiyezo maweni, ni dza hawaḍe wantu weonakisikiiya hichi chuo cha Muungu na iyo saa wakachipfokea na tsekea muno.

²¹Ela kwa kwamba hichi chuuwo ntachikungora myojoni mwao, faro yao ntaiwe na nguvu. Wakipatwa ni mad̯ina kwa dzambo ḍye chuuwo, iyo saa wanaziyekeza faro zao.

²²Hiziḍe mbeju zigwiyezo miwani ni dza hawaḍe weonakisikiiya chuuwo cha Muungu, ela mirumiru za maisha na makulekule ya ujabva wa huju lumwengu vinawalinga na kukishumpanya hichi chuuwo. Ndookomu hichi chuuwo ntakivyae matunda yaḍeyonse myojoni mwao.

²³Na hiziḍe mbeju zigwiyezo kwiiko na mutsanga munono, ni dza hawaḍe wantu weonakisikiiya hichi chuuwo na wakachigija na mojo mumodza. Maisha yao yanamuvyaiya Muungu matunda dza hiviḍe vya muhi wivyonavyaa mumpaka ukaara gomba.”

²⁴Yesu kadza kawasumwiiya wantu inganyo ḍingine kamba, “Uhaju wa Mbinguni unaingana na muntu ashat̯iye mbeju nyema za nganu nkondeni mwakwe.

²⁵Ela huḍe sikuwe, kula muntu epfoakiyaa, kwenda nyabvajwe hukuḍe nkondeni endeyeakishat̯a mbeju za pfaiya makisa akigonzowa.

²⁶Hi nganu ipfokuya hat̯a ikiḍabva kuyavya masuke, hiḍi pfaiya naḍyo ḍiyawiya.

²⁷Hawa wahumisi wa huyuḍe mwenye hi nkonde wamwendea na wamuuza wamwamba, ‘Ḅwana, dzaambia akuḍe nkondeni ntahwiishat̯a nganu nyeema? Mani kut̯i e nkonde idzaa pfaiya t̯ipu?’

²⁸Huyuḍe mwenye kawambukuya kawamba, ‘Hiḍyo pfaiya ḍinawa kwamba ḍishat̯wa ni nyabva.’ Nao wamuuza wamwamba, ‘Unatsaka hwende hukaḍikuye-kuye?’

²⁹Nae kawamba, ‘Moro ḍiyatseni, koro munaweza kuḍikuya-kuya pfamodza ne nganu.

³⁰Ishinu viyatseni vikuye pfamodza. Ngera ya mavuno idzepfofika nawamba hawa wahenda kazi waḍikuye-kuye hiḍi pfaiya na waḍifunge-funge malopa waḍigibvile moho. Ela nawambia kwamba hi nganu waivune na wainingiziye chihaani.’ ”

³¹Yesu kawasumwiiya inganyo ḍingine kawamba, “Uhaju wa Mbinguni nauinganya na mbeju ya tsare[60] imeeyeyo nkondeni.

³²Mbeju ya tsare ndiyo mbeju ndoḍo ya mwiso kahi ya mbeju zonse. Ela ikimea inawa muhi mukuu wa kwamba hat̯a nyuni nao wanakudza na kudzielekanyia vitsanza humu mahambini.”

³³Yesu kawasumwiiya inganyo ḍingine kawamba, “Uhaju wa Mbinguni nauinganya na hamira ya muke ahwaiyeyo akiikandia mukahe. Ingawa hu unga wiwa ni mwinji na mwinji,[61] hi hamira injia-njia, na hu unga wonse ufura hat̯a uhenda mukahe mukuu na mukuu.”

³⁴D̯ubva haya haya mayongweezo yonse, Yesu kayawasumwiiya wantu na mainganyo. Na kula epfoakisumwiiya t̯ut̯a ya wantu, ekiwasumwiiya na mainganyo.

³⁵Hivi hivi vit̯imiza huḍe unabii unenejweo ukyamba, “Nikwakuḅaani kanwa kunena, nanena nao na mainganyo. Na nawaimusya mambo yawekejweyo dza ngadzi hangu kuumbwa kwa lumwengu.”

³⁶Makisa Yesu kanuka na hapfaḍe pfe t̯ut̯a ya wantu kanjia nyumbani. Hawa wanafund̯iwe wamwendea wamwamba, “Ḅwana, hwambie maana ya hiḍi inganyo ḍya pfaiya.”

³⁷Nae kawamba, “Huyu muntu endeye kushat̯ani mbeju, ni dzami *Mwana jwa Ad̯amu.

³⁸Maana ya hi nkonde ni huju huju lumwengu. Hizi mbeju nyema ni hawaḍe wantu weo wa Uhaju wa Mbinguni. Na hiḍi pfaiya ni hawaḍe weo wa Muzuka Shaat̯ani.

³⁹Huyu nyabva endeyeakishat̯a mbeju za pfaiya, ni Shaat̯ani. Hi ngera ya mavuno, maanaye ni mwiso wa lumwengu, na hawa wantu wa kuvuna ni malaika.

⁴⁰Dza vya pfaiya ḍivyonakujwa-kujwa ḍikaundukizwa na kutsomwa, ndivyo vidzevyowahendekea wanabvise nsiku ya mwiso.

⁴¹Mimi Mwana jwa Ad̯amu nidzawahuma malaika wangu wadzeowayavya wantu wazuka wonse kuyawa Uhajuni mwangu. Wadzawaundukiza wantu wonse weonangiza wenzao nabviseni, pfamodza na hawaḍe weonahenda mazuka,

⁴²na wadzawafat̯ula mohoni. Huko huko hawa wantu wadzaiya na kurhigha magego.

⁴³Na hawaḍe weo wahachi, wadzayangaa dza hiḍi dzuwa Uhajuni mwa Baba jwao jwa yuwinguni. D̯ubva huyuḍe awee na masikio nasikiye!”

⁴⁴Yesu kawasumwiiya inganyo ḍingine kawamba, “Uhaju wa Mbinguni uingana na nkandi ya thamani nkuu muno ifitsijweyo nkondeni, na ikyenda ikionegwa ni muntu. D̯ubva kwa tsekea eyokuwa nayo, huyuḍe muntu kaifitsa kawii. Makisa kenda kaguza vyonse evyokuwa navyo, na kagala kenda kaiguya hiḍe nkonde ili hiḍe nkandi iwe yakwe.”

⁴⁵Yesu kagija kunena kamba, “Na kawii Uhaju wa Mbinguni nauinganya na muntu jwa guzi eyeakilacha lulu ya kuguya.

⁴⁶Nsiku modza kenda kaona lulu nyema muno iyoikiguzwa. D̯ubva nae akidzaakiiona kenda kaguza vyonse evyokuwa navyo, na kenda kaiguya.”

⁴⁷Yesu kasumwiiya inganyo ḍingine kamba, “Na kawii Uhaju wa Mbinguni waa dza nyavu iyonagiswa madzini na ikagiza kula aina ya kisembe.

⁴⁸Ipfonadzaa, hawa walowa wanainuha wakaiyavya gubani. Wanakaa chihako wakaḍabva kutsana-tsana hivi visembe. Hivi visembe vyema vyema wanavihwaa wakavingiza vikapfuni, ela hiviḍe visivyo maana wanavihwaa wakavifat̯ula.

⁴⁹Ḅasi hivi hivi ndivyo vidzevyowa nsiku ya mwiso. Hawa malaika wadzawat̯anya wantu wahachi na wazuka.

⁵⁰Hawaḍe wazuka wadzafat̯ulwa mohoni wadzekoiya na kurhigha magego.”

⁵¹Makisa Yesu kawauza hawa wanafund̯iwe kawamba, “Dze, avi vyonse nimusumwiiyevyo muviimuka?” Nao wamwambukuya wamwamba, “Ee, huviimuka.”

⁵²Nae kawamba, “Ḅasi kula aimanyiye hi *Sharia na ayagijiyee haya mayongweezo dzuu ya Uhaju wa Mbinguni, anawa dza muntu ayaviye nkandiye ya kae na mpya na akizitumia pfamodza.”

⁵³Yesu epfokwisa kunena haya haya mainganyo kanuka na hukuḍe

⁵⁴kagala mudzini kwao na kenda kayongweeza humuḍe *sunagogini. Wonse wamusikiiyeo wamaka muno hat̯a waḍabva kuuzana wao na wao wakyamba, “Ayu muntu ayu, hi hii mvidhyo eyonayo kaihwaa ku? Ambu amumpiye uwezo wa kuhenda haya haya mafara ya kumakisa ni ga?

⁵⁵Ae ntahukumumanya kwamba ni mwana jwa ayuḍe seremala? Dzaambia mamajwe si Maria? Awa wanduguzwe si aḍe Yakobo, Yusufu, Simioni na Yud̯a?

⁵⁶Na hat̯a awa waimbuzwe, si wantu hwiwokuishini nao humu humu mudzini? Mani azi akili na umanyi mwinji na mwinji kavihwaa ku?”

⁵⁷Ndookomu ntavikuwatsakiza na wadziza kumuhikiza. Nae Yesu epfoona hivyo kawamba, “Hangu d̯ura nabii anahilwa kula pfantu, isipfokuwa mudzini kwao na balabalani kwao!”

⁵⁸Ndookomu kwa dzambo ḍya kwamba hawa wantu ntawakumuhikiza, nae nkakuhenda mafara menji ya kumakisa.