Read pokomo Matayo 14 Bible Online

Matayo 14 - pokomo bible

Matayo 14

¹Hizihiziḍe ngera, haju *Herod̯e[62] kapata maagu dzuu ya haya mambo makuu ya Yesu eyoakihenda.

²D̯ubva kanena na hawa wakuu weokuwa nsii yakwe kawamba, “Jibaḍi huyo anawa ni Yohana Mut̯opya kafufuka kuyawa kwa wafu. Ndiyo maana anaweza kuhenda mafara ya kumakisa dzayohayo.”

³Herod̯e kanena hivi kwa kwamba ewa kamugija Yohana Mut̯opya na kamungiza gerenzani ili aweze kumutsakiza mukaziwe. Huyu huyu mukaziwe eyeakihanigwa Herod̯ia, d̯ura ewa ni muyamuwe, koro ewa mukaza Filipo, na hali Filipo na Herod̯e wewa ni ndugu. Herod̯e ewa kamuhwaa Herod̯ia na hali Filipo ewa ka mojo.

⁴Yohana epfoona hivi vya Herod̯e ahendeyevyo, ekikaa na kumwambia Herod̯e kut̯wa kwamba ni matsowa kumuhwaa mukaza ndugujwe.

⁵Nae Herod̯e ekitsaka kumuyaga Yohana, ela ekishooga kwamba kundejumuka fuḍyo, koro wantu wonse wehikiza kwamba Yohana ni *nabii.

⁶Ela nsiku modza Herod̯e epfoakihenda jila ya kukumbuka kuvyajwa kwakwe, mwanamuke jwa Herod̯ia kavina urembo muno usoni ya hawa wageni wonse. Hivi vya huyu mwanamuke aviniyevyo vimutsakiza Herod̯e muno,

⁷hat̯a kaḍya kiyapfo usoni ya hawa wageniwe kwamba anamuhendea huyu mwanamuke kiḍechonse adzechotsaka.

⁸D̯ubva kwa kwamba huyuḍe mwanamuke ewa kambijwa ni mamajwe hiviḍe vya kunena, kamwendea babajwe kamwamba, “Baaba, natsaka unimpe saambi hichi kitswa cha Yohana Mut̯opya kikiwa chuureni!”

⁹Kudzasikia hivi, haju Herod̯e kadziut̯i kwa hivi aneneyevyo. Ela kwa kwamba ewa kamamuyapfia huyu mwanamuke usoni ya wageniwe, kaamuru kwamba mwanamukewe akipfegwe kitswa cha Yohana ḍugha.

¹⁰Ndookomu Yohana kahunwa kitswa humuḍe gerenzani,

¹¹na hiki kitswache kingizwa chuureni kipfiikijwa huyu mwanamuke. Huyu mwanamuke nae kachimupfiikia mamajwe.

¹²Makisa hawa wanafund̯i wa Yohana wenda wauhwaa hu mwii wa Yohana wauzika, na wenda wavimusumwiiya Yesu.

¹³Yesu epfovisikia,[63] kanuka na hapfaḍe, kanjia chomboni na kenda kuntu chit̯u, ili aweze kuwa jeje heket̯u. Ela wantu wepfomanya hukuḍe ekoakyenda wanuka na midzini mwao, na wamuhunikanyia na maguu.

¹⁴Yesu akwakwojekani kaona t̯ut̯a nkuu na nkuu ya wantu. Na epfowaona, kawasikit̯ikia muno na kanjia kupfonyani hawaḍe weokuwa wajwazi.

¹⁵Ipfofika mioro, hawa wanafund̯i wamwendea Yesu wamwamba, “Ḅwana, imaawa mioro muno na hapfa ni pfantu chit̯u. Wambe hawa wantu wende midzini wakadzigwiiye chakuḍya.”

¹⁶Yesu kawambukuya kawamba, “Ae ina haḍya ga ya kwamba wende wakadzilachie chakuḍya? Anywi ntamunawapfa?”

¹⁷Nao wamwambukuya wamwamba, “Aswi huna kintu ga? Hwivyonavyo vyonse ni mikahe mitsano na nswi mbii t̯u!”

¹⁸Yesu kawamba, “Viniyeheyeni hapfa.”

¹⁹Makisa kawaamuru hawa wantu wakae vihako hapfaḍe kitsangeni. Kisa Yesu kaihwaa hiḍe mikahe myotsano na hiziḍe nswi zombii. Kayowa mbinguni dzuu na kavivodhya. Makisa kaivunza-vunza hi mikahe na kaiwapfa hawa wanafund̯iwe pfamodza na hizi nswi, nao waviwagawiya hawa wantu.

²⁰Wonse waḍya hat̯a wanjia kuviyowani na matso. Na hawa wanafund̯i wavitsowa-tsowa hivi viḍinku visaiyevyo na wadzaza vikapfu kumi na viwii.

²¹Hawaḍe waḍiyeo wewa hafufi wayume elefu nsano pfasipfo kut̯ala wake na wana.

²²Makisa Yesu kawamba wanafund̯iwe wanjie chomboni wayongowe wavuke huḍoombe, huku jeje akiwa kuḍamanani ne t̯ut̯a ya wantu.

²³Akisa kuḍamana nao, kapfaa murimani dzuu jeje heket̯u akayombe. Hat̯a kiza kipfonjia, Yesu amaale ewa ndiye jeje heket̯u hukuḍe murimani.

²⁴Ao wanafund̯iwe wewa wamafika kuye. Hichi chombo chao chikibigwa ni mawimbi makali muno, kwa kwamba kwikibiga vut̯o kali.

²⁵Hafufi na bworu ya magura,[64] Yesu kawendea wanafund̯iwe akiwa kwenendani dzuu ya madzi.

²⁶Wakidzawakimuona kakwenendani dzuu ya madzi, wanjijwa ni oga na waḍabva kuḅaa madzwi, koro wechamba ni ruhu nzuka.

²⁷Ela iyo saa Yesu kanena nao kawamba, “Dzipfeni mojo, ndimi, namutseshooga!”

²⁸Pet̯ero kamwamba Yesu, “Ḅwana, ikiwa kwamba ndiwe ḍugha, niamuru nami nyenende dzuu ya haya madzi nikudziye.”

²⁹Na Yesu kamwamba, “Nzoo!” D̯ubva Pet̯ero kasuka na humuḍe chomboni na kaḍabva kwenenda dzuu ya haya madzi akimwendea Yesu.

³⁰Ela epfoona namuna ya hiḍi vut̯o ḍivyokuwa kali, Pet̯ero kanjijwa ni oga na kaḍabva kuzama. Iyo saa kaḅaa idzwi kuu kamba, “Ḅwana, nipfonya!”

³¹Na pfapfo Yesu kamupfiikia mukono kamugija na kamwamba, “E wewe wiye na faro ndoḍo! Kut̯i wiwa nkukuniserefat̯a?”

³²D̯ubva wepfonjia humuḍe chomboni t̯u, hiḍi vut̯o ḍinyamaa.

³³Makisa hawa wanafund̯i wamuvunzia nkuhi Yesu wamwamba, “Hakika wewe u Mwana jwa Muungu ḍugha.”

³⁴Yesu na wanafund̯iwe wavuka hiḍi ziwa wenda wojeka nsi ya Genezareti.

³⁵Hawa wantu wepfomuhambuya kwamba ni Yesu, wad̯achasa maagu nsi yonse. Ndookomu wamuyehea wajwazi wao wonse weokuwa nao hiḍihiḍiḍe gaga ili awapfonye.

³⁶Na wamuyomba awaruhusu hawa wajwazi nangaa wauhore hu mutse wa hiḍi vwaziḍye t̯u, ili wapate kupfowa. Na wonse wamuhoreyeo wapfona.