Read pokomo Matayo 17 Bible Online

Matayo 17 - pokomo bible

Matayo 17

¹Ḅaad̯a ya nsiku ntandahu, Yesu kamuhwaa Pet̯ero, Yakobo na Yohana ndugujwe Yakobo na kanuka nao wao heket̯u kapfaa nao murimani dzuu.

²Hali wakwakumuyowani, Yesu kaperuka shufa. Hu usowe uḍabva kuyangaa dza hiḍi dzuwa na haya mavwaziye yahenda meupe pee!

³Iyo saa kut̯upuka *nabii Musa na Eliya na waḍabva kunena nae.

⁴D̯ubva Pet̯ero kamwamba Yesu, “Ḅwana, ni urembo kwamba swiswi hupfo hapfa. Ikiwa kwamba kuona vyema nambaka mapaa mahahu. Modza ḍyako, modza ḍya Musa na modza ḍya Eliya.”

⁵Ela asidzakwisa kunena, kudza wingu dzeupe ḍiwafinikiziyeḍyo. Makisa kuyawa idzwi na humu winguni ḍikyamba, “Huyu ni Mwanangu mutsakwa, nitsakizijwee nae muno. Musikiiyeni jeje.”

⁶Wepfosikia hiḍi idzwi, hawa wanafund̯i washooga muno hat̯a wagwa mutsangani funama.

⁷Yesu kawendea kawahora kawamba, “Nukani, namutseshooga.”

⁸Na wepfokwira wamuona Yesu jeje heket̯u.

⁹Makisa wepfowakisuka na hapfaḍe murimani, Yesu kawaamuru kawamba, “Haya muoneyeo ntamuruhusa ya kuyamusumwiiya yuḍejwonse hat̯a saa yangu mimi *Mwana jwa Ad̯amu nidzeyofufujwa kuyawa kwa wafu.”

¹⁰Hawa wanafund̯i wamuuza wamwamba, “Ḅwana, mani kut̯i awa waalimu wa *Sharia wanakaa na kwamba ni had̯i nabii Eliya adze d̯ura?”

¹¹Yesu kawambukuya kawamba, “Gula ni ḍugha kwamba ni had̯i Eliya adze d̯ura ili ayaelekanye mambo yonse.

¹²Ela nyakumwambiani kwamba Eliya kamakudza hangu iiḍe, ela wantu ntawakumuhambuya kwamba ndiye. Na wamuhendea kula aina ya dzambo zuka dza watsakiyevyo. Dza vivyo, si hat̯a kae hat̯a nami Mwana jwa Ad̯amu wajwakunikuntisa d̯ina.”

¹³Ndookomu hawa wanafund̯i waimuka kwamba ekinena dzuu ya Yohana Mut̯opya.

¹⁴D̯ubva wepfosuka hukuḍe nsi kwe t̯ut̯a ya wantu iyoikiwainda, kunuka muntu mumodza na humuḍe wantuni kenda kamuvunzia nkuhi Yesu na kamwamba,

¹⁵“Ḅwana, mufwiye t̯ei huyu muurani wangu. Ana kifofo na chakumusumbuwani muno. Saa zonse anakaa na kugwa mohoni ambu madzini.

¹⁶Nimuyeha kwa hawa wanafund̯iwo ela ntawakuweza kumupfoza.”

¹⁷Yesu kawambukuya kawamba, “E nywinywi mu wantu munangikiyeo na musio faro t̯i! Amevihivi nagija kukaa nanywi na kumuit̯isia hat̯a ari?” Kisa kawamba, “Haya muyeheni huyu muurani hapfa.”

¹⁸D̯ubva huyuḍe muurani epfopfiikwa, Yesu kaibusa hi mpepfo nzuka iyoikimusumbuwa na imuyawa. Na hangu hihiiḍe saa huyuḍe muurani kawa nka untu.

¹⁹Ḅaad̯aye hawa wanafund̯i wamuuza Yesu geri wamwamba, “Ḅwana, kut̯i swiswi ntahukuweza kuiyavya hiḍe mpepfo nzuka?”

²⁰Yesu kawambukuya kawamba, “Ni kwa dzambo ḍya kwamba ntamwiiwa na faro ya kut̯osa. Koro hachi nyakumwambiani, hat̯a t̯ambere mundeewa na faro iyo ndoḍo sawa sawa na mbeju ya tsare,[67] mundeweza kuwambia hu murima huu muwambe, ‘Kuka na hapfa wende hapfaḍe!’ Nao undeekuka. Koro ntakundeewa na ḍiḍeḍyonse ḍya kumushinda.”[68]

²²Wepfokuwa Galilaya amaale, nsiku modza Yesu kawamba wanafund̯iwe, “Mimi Mwana jwa Ad̯amu nidzangizwa mikononi mwa wantu

²³wadzeoniyaga. Ela nsiku ya hahu nafufuka kuyawa kwa wafu.” Epfowambia hivi, hawa wanafund̯i wanjijwa ni ngiru muno.

²⁴Yesu na wanafund̯iwe wepfofika mudzi wa Kaperinaumi, hawa wantu weonahwaa kuwa kwa dzambo ḍye *Hekalu wamwendea Pet̯ero wamuuza wamwamba, “Ayu mwaalimu jwenu nkakae na kuipfa kuwa ḍya Hekalu hat̯a?”

²⁵Pet̯ero kawambukuya kawamba, “Anakaa na kuipfa.” Makisa kanjia humuḍe nyumbani ili ende akavimwambie Yesu. Ela asidzapata kuvimwambia, Yesu kamuuza kamwamba, “Nimpa mat̯aro Simioni: Dze, mahaju wanakaa na kuwaipfisa kuwa wanansi wao, ambu wanakaa na kuipfisa wageni weo kukaani humu nsini mwao?”

²⁶Pet̯ero kambukuya kamba, “Wanakaa na kuwaipfisa wageni.” Yesu kamba, “Ndookomu ni kunena kwamba hawa wanansi waa huru kutsaipfa!

²⁷Ela kwa kwamba ntahu haḍya ya kuwaudhi, enda hukuḍe ziwani ukagise loo. Nswi ya d̯ura udzeyogiza iḅaze kanwa na unaona kuruḅembe[69] modza. Ḍihwae wende ukaipfe kuwa ḍyako na ḍyangu.”