Read pokomo Matayo 18 Bible Online

Matayo 18 - pokomo bible

Matayo 18

¹Hihiiḍe ngera, wanafund̯i wa Yesu wamwendea na wamuuza wamwamba, “Ḅwana, kahi yehu, adzeewa mukuu jwa mwiso Uhajuni mwa Mbingu ni ga?”

²Yesu kahana mwana mumodza na kamuweka kahi yao,

³na kanena nao kawamba, “Hachi nyakumwambiani, ntamuwezi kuunjia Uhaju wa Mbingu, musidzaperuka muwe dza vyana vichuchu.

⁴Yuḍejwonse eyenadzisusya nsii dza mwana kachuchu, huyo anawa mukuu Uhajuni mwa Mbingu.

⁵Na yuḍejwonse adzemupfokea mwana kachuchu dza huyu kwa dzambo ḍyangu, huyo kanipfokea mimi.

⁶Ela yuḍejwonse adzeemugisa nabviseni mumodza jwa hawa weo dza wana vichuchu wanihikiziyeo, huyo anamala kufungwa iwe ḍya kupaazia ot̯ini na afat̯ulwe ḅaharini.

⁷Wadzawa na d̯ina iyodze hawaḍe weonangiza wenzao nabviseni. Gula maḍemo ni had̯i yadze, ela huyuḍe eyenangiza wantu maḍemoni kadzakunta d̯ina nkuu muno!

⁸D̯ubva ikiwa kwamba mukonowo ambu kuguuḍyo ḍinakungiza nabviseni, ḍikente uḍifat̯ule. Koro ni heri kupata maisha ya kuunga na yuungo ukiwa na mukono mumodza ambu ukiwa na kirema, kuliko kuwa na mikono miwii ambu maguu mawii, makisa ufat̯ulwe mohoni.

⁹Na ikiwa kwamba dzitsoḍyo ḍinakungiza nabviseni, ḍikuye uḍifat̯ule. Koro ni heri kupata maisha ya kuunga na yuungo ukiwa nsongo, kuliko kuwa na matso yako mawii kisa ufat̯ulwe *mohoni.

¹⁰D̯ubva manyani mutsebalifa hat̯a mumodza jwa hawa hawa wantu wanihikiziyeo, weo dza wana vichuchu. Koro hachi nyakumwambiani, hawa malaika wao saa zonse waa usoni pfa Baba jwangu jwa mbinguni.”[70]

¹²Yesu kawauza hawa wanafund̯iwe kawamba, “Ikiwa kwamba muntu ana mbuzi gana, na mbuzi modza yaara maisoni, anahendadze? Nkaaziyatsa aziḍe mbuzi miyongo kenda na kenda kukuḍe maisoni na anaḍabva kuilacha aiḍe mbuzi modza yaarieyo?

¹³Na hachi nyakumwambiani, adzepfoiona anawa na tsekea nkuu kwa dzambo ḍya hiyo hiyo mbuzi modza yaarieyo, kuliko hiziḍe mbuzi miyongo kenda na kenda zisizokwaara.

¹⁴Dza vivyo, Baba jwenu jwa mbinguni nkanatsaka hat̯a mumodza jwa hawa weo dza wana vichuchu hawa aare.”

¹⁵Yesu kagija kuyongweeza kamba, “Ikiwa kwamba muhikiza mwenziwo kakutsowea, mwendeye sirini ukamwambiye hiḍi tsowa ahendeyeḍyo. Ikiwa kwamba kakusikia na kagwa matsowa, ḅasi unawa kwamba kumuudzya njiani.

¹⁶Ela ikiwa kwamba kadziza kukusikia, hwaa muntu mumodza ambu wawii wende ukanene nae kawii, ili kula udzechonena kiwe kwamba kina mashaahiḍi wawii ambu wahahu.

¹⁷Ikiwa kwamba amaale kadziza kusikia, enda ukamusit̯aki tsanganikoni. Na akidziza kuḍisikia hiḍi tsanganiko, ḅasi muntu dzae muhwaeni dza mulumwengu ambu hat̯a dza muhwaa kuwa.[71]

¹⁸Hachi nyakumwambiani, ḍiḍeḍyonse mudzeḍyoḍifunga hapfa lumwenguni ḍinawa kwamba ḍifungwa hat̯a mbinguni. Na ḍiḍeḍyonse mudzeḍyoḍifunguya hapfa lumwenguni ḍinawa kwamba ḍifungujwa hat̯a mbinguni.

¹⁹Na kawii nyakumwambiani kwamba, hat̯a mukiwa wawii na mukihuna kuyombea dzambo ḍiḍeḍyonse, Baba jwangu jwa mbinguni anamuhendea.

²⁰Koro mwipfonatsanganika wawii ambu wahahu kwa sari ḍyangu, nami nawa pfamodza nanywi.”

²¹Makisa Pet̯ero kamwendea Yesu kamuuza kamwamba, “Ḅwana, ndugu yangu akinitsowea, namala kumuyatsia myeedha myengaa? Akinitsowea myeedha mifungahe, nami ni kumuyatsia myeedha mifungahe?”

²²Yesu kamwambukuya kamwamba, “Si myeedha mifungahe t̯u! Ela ni umuyatsie hat̯a myeedha miyongo mifungahe myeedha mifungahe.[72]

²³Ninena hivi kwa kwamba Uhaju wa Mbinguni uingana na haju mumodza eyeakitsaka kuhenda hesaḅu ya haya marando eyoakiwaḍai hawa wahumisiwe.

²⁴D̯ubva epfoakihenda hivi, kadzakayehejwa muhumisijwe mumodza eyeakimuḍai mamilioni[73] ya fwedha.

²⁵Kwa kwamba hiḍiḍe rando ḍiwa ni kuu muno, huyuḍe muhumisi nkakuweza kuḍiipfa. D̯ubva huyuḍe haju kayavya amuri kwamba huyuḍe muhumisi aguzwe jeje, mukaziwe, wanawe na vyonse evyokuwa navyo, ili kwamba hizi fwedha ziweze kuipfia hiḍi rando.

²⁶Ela huyuḍe muhumisi kamugwiya maguuni huyuḍe haju na kamuyomba kamwamba, ‘Ḅwana, e ad̯o nakuyomba uniit̯isiye amaale. Hachi nazikuipfa zonse!’

²⁷Huyu haju kamufwiya t̯ei huyuḍe muhumisi na kamuyatsia hiḍi rando ḍyonse eḍyokuwa naḍyo, na kamwamba ende zakwe.

²⁸Huyuḍe muhumisi nae ekiḍai muhumisi mwenziwe fwedha kachuchu.[74] D̯ubva epfoyawa na hapfaḍe pfa huyu haju, kenda kat̯ongana na huyuḍe mwenziwe eyeakimuḍai. Akidza akit̯ongana nae kamugija hiḍi gororo na kanjia kumuhuḍani na kumwamba, ‘Natsaka uḍiniipfe hiḍi rando ḍyangu saambi!’

²⁹Huyuḍe muntu kadzigisa maguuni pfa huyuḍe muhumisi na kamuyomba kamwamba, ‘E ad̯o ndugu yangu, nakuyomba uniit̯isiye kachuchu t̯u, naḍikuipfa hiḍi randoḍyo ḍyonse!’

³⁰Ela huyuḍe muhumisi nkakumufwiya t̯ei hat̯a kachuchu. Ishinu kaamuru kwamba afungwe gerenzani hat̯a adzepfokwisa kuḍiipfa hiḍi randoḍye.

³¹Hawaḍe wahumisi wangine wepfovisikia hivi, wasikia viwi muno na wenda wavimusumwiiya huyu haju hiviḍe vyonse vichiiyevyo-chiiyevyo.

³²Huyu haju kamuhana kawii huyuḍe muhumisi na kamwamba, ‘Yani katsi wewe u muhumisi muzuka dzevihivi? Kuniyomba nikuyatsiye, nami nikuyatsia hiḍi rando ḍyako ḍyonse wiḍyokuwa naḍyo.

³³Ela katsi wewe hat̯a t̯ei kachuchu nku kintu! Kut̯i nkukumuyatsia huyu mwenziwo dza hiviḍe nikuyatsiiyevyo hiḍi rando kuu na kuu wiḍyokuwa naḍyo?’

³⁴D̯ubva huyuḍe haju kareja muno na kaamuru kwamba huyuḍe muhumisi afungwe gerenzani hat̯a adzepfokwisa kuḍiipfa hiḍi rando ḍyonse eḍyokuwa naḍyo.

³⁵Ndookomu nyakumwambiani kwamba, mukitsayatsiana nywinywi kwa nywinywi na myojo yenu yonse, Baba jwangu jwa yuwinguni anamuhenda dzevihivi.”