Read pokomo Matayo 27 Bible Online

Matayo 27 - pokomo bible

Matayo 27

¹Chamukoche magurani, hawa wakohani wakuu wonse pfamodza na hawa wazee wa gasa, wahuna kwamba Yesu ni had̯i ayagwe.

²D̯ubva wamufunga-funga na wamupfiika kwa Pilato, eyekuwa liwali jwa Kirumi jwa ḍyimbo ḍya Yud̯aya.

³Yud̯a Isikariota, yani huyu amuḍawanyie Yesu, epfoona ya kwamba Yesu kahukumigwa kuyagwa, kadziut̯i muno. Kayahwaa hayaḍe mawe miyongo mihahu ya fwedha eyopfegwa, kayagalicha kwa hawa wakohani wakuu na hawa wazee wa gasa.

⁴Epfokwenda kawamba, “Mimi nihenda nabvise, koro nimuḍawanya muntu asiye tsowa.” Ela wao wamwambukuya wamwamba, “D̯ubva hivyo hivyo vihumud̯a na swiswi? Si shauri yako?”

⁵Ndookomu Yud̯a kaziwafat̯ulia hizi fwedha humuḍe Hekaluni na kayawa kenda kadziyaga kwa kudzihuḍa na nkamba.

⁶Hawa wakohani wakuu wazitsowa-tsowa hizi fwedha ela wamba, “Si sharia kuzihwaa hizi fwedha hizi na huzingize kwa hi nkandi ya *Hekalu, koro ni fwedha ziyavijwezo kwa dzambo ḍya kukwiha mwazi.”

⁷Ndookomu waḍiyowezanya hiḍi hiḍi dzambo na wahuna kwamba wazigwiiye nkonde ya kuzikia wageni. Hi hii nkonde ikihanigwa Nkonde ya Muumba Nyungu.

⁸Na hangu hizihiziḍe ngera hat̯a hi hii saasambi, hihiiḍe nkonde iḍabva kuhanigwa Nkonde ya Mwazi.

⁹Hivi hivi vihendeka ili hikiḍe chuuwo cha *nabii Yeremia aneneyecho kit̯imiye. Koro nabii Yeremia ewa kamba, “Wahwaa[96] mawe miyongo mihahu ya fwedha, Yani hichi chima cha hawa Waisiraeli, waoneyecho kwamba ndiyo hi ḅei ya sawa ya kumuguzia nayo.

¹⁰Hizi hizi fwedha wazigwiiya Nkonde ya Muumba Nyungu, dza vya Ḅwana aamuriyevyo.”[97]

¹¹D̯ubva Yesu kasumamiswa usoni ya Pilato, eyekuwa liwali jwa Kirumi. Na Pilato kamuuza Yesu kamwamba, “Wewe ndiwe ayu Haju jwa Wayahud̯i?” Yesu kamwambukuya kamwamba, “Kuvinena wewe mwenye!”

¹²Ela hawa wakohani wakuu na wayongozi wangine wepfoyavya haya masit̯aki yao dzuu ya Yesu, Yesu nkakwambukuya chuuwo kiḍechonse.

¹³Pilato kamuuza Yesu kamwamba, “Munamba aya mambo yonse weyokukusit̯akini nayo nkukwakuyasikiani hat̯a?”

¹⁴Ela Yesu kanyamaa mya, nkakwambukuya chuuwo hat̯a kimodza. Ndookomu Pilato kamaka muno.

¹⁵Hizihiziḍe ngera, huyu liwali ewa kabarat̯a kwamba kula jila ya *Pasaka anafunguya mufungwa mumodza akamuyatsa huru. Ela huyu jwa kufungujwa ni had̯i awe kwamba katsanwa ni hawa wantu.

¹⁶Huhuḍe wakati kwiwa mufungwa mumodza eyeakihanigwa Baraba.[98] Huyu huyu muntu ewa kamanyikana muno kwa dzambo ḍya kuhenda mazuka.

¹⁷D̯ubva Pilato kawauza hawa wantu wat̯ut̯aiyeo kawamba, “Munatsaka nimumufungwiiye ga? Nimumufungwiiye Baraba ambu Yesu eyenakwambigwa kwamba ndiye huyu *Kirist̯o?”

¹⁸Pilato ewa kanena hivi kwa kwamba, ewa kamanya tswee kwamba hawa wayongozi wa Kiyahud̯i, wekimusit̯aki Yesu kwa kwamba wekimuonea wivu.

¹⁹Na si hayo t̯u, Pilato epfokaa kitini pfakwe pfa kuyavia hukumu, mukaziwe ewa kamuyehea ḍaamisa kamwamba, “Manya utsemuhenda dzambo zuka ḍiḍeḍyonse huyo muntu huyo asiye tsowa. Yeo hu mojo wangu unjia yuhangaiko yukuu muno. Koro siku nihangaishwa ni ndoho nzuka muno dzuu ya huyo huyo muntu.”

²⁰Hawa wakohani wakuu pfamodza na hawa wazee wa gasa, waitsunziirya hi t̯ut̯a ili wamuyombe Pilato kwamba amufunguye Baraba, ela Yesu ayagwe.

²¹Pilato kaiuza hi t̯ut̯a ya wantu kawamba, “Kahi ya Baraba na Yesu, munatsaka nimumufungwiiye ga?” Na wonse wamba, “Baraba!”

²²Pilato kawauza kawii kawamba, “Mani ayu Yesu eyenahanwa Kirist̯o munatsaka nimuhendedze?” Na wonse waholoka wamba, “Napfatsikwe!”

²³Pilato kawamba, “Mimi sikwakuonani tsowa ahendeeḍyo t̯i!” Ela hi t̯ut̯a igija kuḅaa madzwi ikyamba, “Napfatsikwe! Napfatsikwe!”

²⁴Pilato kaona kwamba nkakwakudhumburya kintu, na kumakujumukani fuḍyo. D̯ubva kahwaa madzi kanawa mikono usoni ya hi t̯ut̯a yonse, na kamba, “Mimi sinaalat̯ika kwa dzambo ḍya kifo cha huyu huyu muntu. Mukimuyaga ni shauri yenu.”

²⁵Na hawa wantu waholoka wamba, “Hu mwaziwe nawiiye dzuu yehu na wana wehu!”

²⁶Ndookomu Pilato kamufunguya Baraba na kaamuru kwamba Yesu abigwe na lucha. Na wepfomubiga wakisa kamuyavya akapfatsikwe.

²⁷Hawa asikari wangine wa Pilato wamuhwaa Yesu na wanjia nae humuḍe uani mwe nkambi yao, na wadziana kit̯aro chonse cha asikari.

²⁸Wamuvuya nguo na wamuvwika lot̯a ḍya ranji ya zazi.

²⁹Waelekanya na kiyemba cha miwa na wakimuvwika kitswani, makisa wahwaa nsimbo waimugijisa mukono wa kuyume. Wakisa waḍabva kumuvunzia nkuhi na kumubaladhaiya wakimwamba, “Kwa naghea, Haju jwa Wayahud̯i?”

³⁰Kisa wamukamia mahe na waimudhara hi nsimbo weyoimugijisa na wamubiga nayo ya kitswa!

³¹Wepfomubaladhaiya hat̯a wakifuruma, waḍimuvuya hiḍi lot̯a weḍyomuvwika na wazimuvwika hizi nguoze. Makisa wanuka nae kwenda wakamupfatsike.

³²Hawa asikari wepfowakyenda na Yesu wakamupfatsike, wat̯ongana na muntu mumodza jwa kuyawa mudzi wa Ukirene eyeakihanwa Simioni. Nao wamusharut̯isa autsukuye hu muhi wa mpatsa wa Yesu.

³³Wenda hat̯a wepfofika pfantu pfepfopfakihanwa Goligata, yani, “Pfantu pfa pfaa ḍya Kitswa,”

³⁴wamumpa Yesu mvinyo itsanganyijweyo na nyongo nkali. Ela epfoit̯at̯a kadziza kuinwa.

³⁵Wamupfatsika muhini mwa mpatsa makisa wazigawana hizi nguoze kwa kuzibigia kura.

³⁶Kisa wakaa chihako waḍabva kumwamia.[99]

³⁷Makisa wahwaa kiḅao chorejwecho haya masit̯aki yakwe na wakibiga hapfaḍe muhini mwa mpatsa, dzuu ye kitswache. Hichi kiḅao chamba, “Huyu Ni Yesu Haju Jwa Wayahud̯i.”

³⁸Hawa asikari wapfatsika na wevi[100] wawii pfamodza na Yesu. Mumodza wamupfatsika mukono kuyume wa Yesu, na yungine wamupfatsika mukono tsonso.

³⁹Wantu weowakichia na hafufi wekimwambia vyuuwo vya kinyaya na kusukusa vitswa vyao kumubaladhaiya.

⁴⁰Wamwamba, “Dzaambia nkukwamba unaweza kuikomoa ai Hekalu na uimbake na nsiku ntahu? Haya ikiwa kwamba wewe u Mwana jwa Muungu ḍugha, hunatsaka kuviona! Suka na hapfo muhini mwa mpatsa na udzipfonye!”

⁴¹Hawa wakohani wakuu na waalimu wa *Sharia pfamodza na hawa wazee wangine, nao pia wamubaladhaiya Yesu wamba,

⁴²“Kapfonya wangine ela nkawezi kudzipfonya mwenye! At̯i huyu huyu ndiye ayu haju jwa Waisiraeli? Akisuka na hapfa muhini mwa mpatsa saambi hunamuhikiza!

⁴³At̯i kamuserefat̯a Muungu! Haya ikiwa kwamba Muungu kamutsaka ḍugha, mani d̯ubva nkamupfonya, nae ekidzihana Mwana jwa Muungu le?”

⁴⁴Hat̯a hawaḍe wevi[101] wapfatsikijweo pfamodza na Yesu nao pia wamubaladhaiya dza vivyo.

⁴⁵Ipfofika saa ntandahu za musikahi, nsi yonse ifungiiya kiza cha go mumpaka saa kenda.

⁴⁶Na ipfofika chima cha saa kenda, Yesu kaḅaa idzwi kuu kamba, “Eli, Eli, lama sabakitani?” Yani, “Muungu jwangu, Muungu jwangu, kut̯i kuniyatsa?”

⁴⁷Wantu wangine weosumama hapfaḍe hafufi wepfosikia hivi vya Yesu aneneevyo wamba, “Huyu muntu huyu kakumuhanani nabii Eliya.”

⁴⁸Mumodza jwao kad̯arama haraka kenda kahwaa yavuyavu kaḍilingila na muhi. Makisa kaḍit̯opya kwa mvinyo ibushaiyeyo na kaḍimugijia Yesu ili anwe.

⁴⁹Ela hawaḍe wangine wamwamba, “Muyatse, nahuyowe kwamba Eliya anakudza anamupfonya ḍugha ambu hat̯a?”[102]

⁵⁰Makisa Yesu kaḅaa idzwi kuu kawii kisa kahuna nsoho.

⁵¹Pfapfo, huju yukangadzi jufungijwejo humuḍe Hekaluni juḅaika na kahi, hangu dzuu mumpaka nsii. Hi nsi yonse ihehema na myamba iḅaika,

⁵²na hat̯a mbeera zipfenuka. Na ḅaad̯a ya Yesu kufufuka kuyawa kwa wafu, wantu wenji wa Muungu wafwiyeo, nao pia wafufuka na wenda wanjia mudzi mudheru wa Yerusalemi. Na hawa hawa wantu waonegwa ni wantu wenji.[103]

⁵³

⁵⁴Huyu mukuu jwa asikari na hawaḍe wonse weowakimwamia Yesu, wepfoona hu muhehemo wa nsi pfamodza na hayaḍe yonse yahendekeeyo, wanjijwa ni oga muno na wamba, “Hachi huyu ewa ni Mwana jwa Muungu ḍugha!”

⁵⁵Kwiwa na wake wenji weowakichimiza na jwa kuye. Wewa ni hawaḍe wake weomuuḅa Yesu hangu ḍyimbo ḍya Galilaya kwa dzambo ḍya kumuhumikia.

⁵⁶Wangine wao wewa ni Maria Magid̯alena, Maria mamajwe Yakobo na Yusufu, pfamodza na mukaza Zebed̯ayo, yani mamajwe Yakobo na Yohana.

⁵⁷Ipfofika mioro, kudza muntu jabva mumodza jwa kuyawa mudzi wa Arimataya, eyeakihanwa Yusufu. Huyu huyu muntu ewa ni mumodza jwa hawaḍe wamuhikiziyeo Yesu.

⁵⁸Kenda kwa Pilato na kamuyomba apfegwe ruhusa ya kuuzika hu mwii wa Yesu. Na Pilato kaamuru kwamba aupfegwe.

⁵⁹D̯ubva Yusufu kenda kauhwaa hu mwii wa Yesu kaulinga-linga na sand̯a mpya

⁶⁰makisa kaungiza mbeerani.[104] Hi hii mbeera iwa nza Yusufu jeje mwenye ait̯ukuriyeo mwambani, na iwa ni mpya. D̯ubva epfout̯ambaarya hu mwii wa Yesu akisa, kaperuya-peruya iwe kuu kaḍifinikiza hapfaḍe muḍyangoni pfe mbeera, na kagonzowa.

⁶¹Hiyo hiyo saa, Maria Magid̯alena pfamodza na huyuḍe Maria yungine wewa wakaa chihako hafufi ne mbeera wakuyowani.

⁶²Ipfofika chamukoche, yani nsiku ya d̯ura ya hi jila ya Pasaka, hawa wakohani wakuu na *Mafarisayo wenda wakanene na Pilato.

⁶³D̯ubva wepfofika wamwamba, “Ḅwana, hukumbuka kwamba huyuḍe muntu munsuwe asidzafwa ewa kamba anafwa, ela nsiku ya hahu anafufuka kuyawa kwa wafu.

⁶⁴Ndookomu hudzia kukuyomba uyavye amuri kwamba hi mbeeraye yamijwe mumpaka nsiku ya hahu. Hunatsaka yamijwe ili hawa wanafund̯iwe watsekwendaukwiwa hu mwiiwe, makisa waḍabve kunena kwamba kafufuka kuyawa kwa wafu. Koro dzambo dzaḍyo ḍikihendeka, hi nsuwe idzeyod̯achaa inawa nzuka kuchia hiḍe ya d̯ura!”

⁶⁵Pilato kawambukuya kawamba, “Hwaani asikari mwende mukayamie hi mbeera dza mudzevyoweza.”

⁶⁶Ndookomu nao wenda waḍingiza muhuri hiḍi iwe ḍiwekejweḍyo hapfaḍe muḍyangoni pfe mbeera, na waweka na kit̯aro cha asikari wa kwamia.