Read pokomo Matayo 3 Bible Online

Matayo 3 - pokomo bible

Matayo 3

¹Hizihiziḍe ngera, Yohana Mut̯opya kanuka na kaḍabva kusumwiiya yuwanda jwa Yud̯aya

²akyamba, “Pfyehuzani mama, koro Uhaju wa Mbinguni umaawa hafufi.”[9]

³Yohana ndiye huyu jwa *nabii Isaya aneneye dzuuye, epfokwamba, “Ni muntu eyekulalabvani yuwandani akyamba, ‘Ielekanyeni njia ya Ḅwana, na muyarongaarye machiyoye.’ ”

⁴Yohana ekivwaa vwazi ḍyelekanyijweḍyo na nsinga za ngamia,[10] na ekidzifunga mulao wa nchingo chunoni mwakwe. Chakuḍyache kiiwa ni maghere[11] na uchi.

⁵Wantu kuyawa Yerusalemi, na kula ḍanda ya ḍyimbo ḍya Yud̯aya na ḍanda zonse zizokuwa geri ya tsana ya Yorod̯ani wekyenda na kumusikiiya.

⁶Na hawaḍe waungamiyeo nabvise zao, Yohana kawat̯opya tsana ya Yorod̯ani.

⁷Ela epfoona *Mafarisayo na *Masad̯ukayo wenji na wenji nao wakumwendeani awat̯opye, kawabusa kawamba, “E nywinywi kivyazi cha nyoka! Ni ga amwambiyee kwamba munaweza kuid̯arama e hukumu ya Muungu iyokudzani?

⁸Ikiwa kwamba mupfyehuza mama ḍugha, ḅasi ishini maisha ya kuyanga kwamba muziyatsa nabvise zenu.

⁹Na wala namutsedzit̯aria kwamba mu wadheru usoni kwa Muungu kwa kwamba mu kivyazi cha Iburahimu. Koro hachi nyakumwambiani, Muungu anaweza kuyahwaa haya mawe haya, na ayapfyehuze kuwa yuvyee jwa Iburahimu.

¹⁰Na sasa hiḍi shoka ḍimakwisa kuwekwa t̯ayari. D̯ubva kula muhi usiwovyaa matunda mema unakentwa na unakwangukijwa mohoni.”

¹¹Yohana kagija kunena kamba, “Mimi nyakumut̯opyani na madzi, kuyanga kwamba muziyatsa nabvise zenu. Ela huyuḍe eyekudzani nyuma yangu kadzamut̯opya na Ruhu Mudheru na moho. Jeje ana uwezo mukuu kunichia mimi, chima cha kwamba sinamala hat̯a kutsukuya viyahuvye.[12]

¹²Mikononi mwakwe kagija yutseo jwa kuvut̯ia. Kaa t̯ayari kudzaivut̯ya hi bvaro na aḍisafise hiḍi hanga. Hi bvaro nyema anaihwaa anaingiza chihaani, ela haya mapfapfi anayangiza mohoni nayo yanapfya moho usiozimika.”

¹³Hizihiziḍe ngera, Yesu kanuka na ḍyimbo ḍya Galilaya kenda hat̯a tsana ya Yorod̯ani ili akat̯opyegwe ni Yohana.

¹⁴D̯ura Yohana kaḍema kudziza kamba, “Wewe ndiwe wiyenamala kunit̯opya mimi, awe unanidzia nikut̯opye mimi kawii?”

¹⁵Ela Yesu kamwambukuya kamwamba, “Kwe hi saasambi viyatse viwe dzevi hivi, koro ihumala kuhenda kula chicho cha sawa usoni kwa Muungu.” Ndookomu Yohana nae kamut̯opya.

¹⁶Yesu epfot̯opyegwa akisa t̯u, kayawa na humuḍe madzini. Ḅwikira hizi mbingu zipfenuka na kamuona Ruhu jwa Muungu akwakumusukiani dza ndiwa na kenda kamuhama.

¹⁷Makisa kusikika idzwi kuyawa yuwinguni ḍikyamba, “Huyu ni mwanangu mutsakwa, nitsakizijwee nae muno.”