Read pokomo Matayo 8 Bible Online

Matayo 8 - pokomo bible

Matayo 8

¹Yesu kasuka na hapfaḍe murimani, na wantu wenji na wenji wekimuuḅa.

²Iyo saa kukumpuya muntu eyekuwa na ujwazi wa kwanga. Kenda kamuvunzia nkuhi Yesu na kamwamba, “Ḅwana, amaa ukitsaka nkwanipfoza?”[32]

³Yesu kamunyopezea mukono kamuhora na kamwamba, “Nakupfoza.” Makisa kamwamba, “Pfowa!” Na iyo saa huyuḍe muntu kapfowa.

⁴Kisa Yesu kamuseresa kamwamba, “Manya utsemwambia muntu yuḍejwonse dzuu ya hiḍi hiḍi dzambo. Ishinu enda kwa huyu mukohani ukadziyanganye kwakwe kwamba kupfowa na uyavye mvuugiya dza vya *Sharia ya Musa ivyonakumala kuhenda, dza ushaahiḍi kwamba kudhereswa.”

⁵Yesu epfonjia mudzi wa Kaperinaumi, kendejwa ni mukuu jwa kit̯aro cha asikari wa Kirumi.[33] Huyu mukuu kamuyomba Yesu

⁶kamwamba, “Ḅwana, huyu muhumisi jwangu kahinamfa ka nyumbani. Ni mujwazi kakuwaraghani hat̯a nkawezi kunuka na t̯at̯ani.”

⁷Yesu kamwambukuya kamwamba, “Nakudza namupfoza.”[34]

⁸Ela huyuḍe mukuu jwa asikari kamwamba, “Ḅwana, mimi sikwaa hat̯a muntu jwa kwamba wewe unjie nyumbani mwangu. Wewe nena chuuwo kimodza t̯u, na huyu muhumisi jwangu anapfowa!

⁹Koro hat̯a nami nina wakuu wangu, na nina asikari weo nsii yangu. Ninkimwambia mumodza, ‘Enda,’ nae anakwenda. Ninkyambia yungine, ‘Nzoo,’ nae anakudza. Na ninkimwambia muhumwa jwangu, ‘Henda visiku,’ nae anavihenda.”

¹⁰Yesu epfosikia hivi vya huyu mukuu aneneyevyo kamaka muno. Kisa kanena na hawa weowakimuuḅa kawamba, “Hachi nyakumwambiani, sidzaona muntu awee na faro nkuu dza hi hat̯a kahi ya Waisiraeli!

¹¹Na nyakumwambiani kwamba, wantu wenji wadzakudza kuyawa muyao dzuwa na mutso dzuwa, hangu dzuu hat̯a nsini, na wadzakaa vihako Uhajuni mwa Mbingu, wakiḍya karamu pfamodza na Iburahimu, Isaka na Yakobo.

¹²Ela hawaḍe weopangijwa kuwa wantu wa hu huu Uhaju, Muungu kadzawafat̯ula kiza cha nze, wadzekoiya na kurhigha magego.”

¹³Makisa Yesu kamwamba huyu mura jwa Kirumi, “Enda nyumbani, hivi uhikiziyevyo visakuhendeka.” Na iiḍe saa, huyuḍe muhumisi jwa huyu mura kapfowa.

¹⁴Yesu epfonjia nyumbani mwa Pet̯ero, kamuona mukwanguwe muke Pet̯ero karomokwa ni kanat̯a na kat̯ambaara.

¹⁵Yesu kamuhora hu mukono na hi kanat̯a imuyatsa. Nae kanuka kamuwekea chakuḍya Yesu.

¹⁶Ipfofika mioro, wantu wamuyehea Yesu wajwazi wenji na wenji weokuwa na mpepfo nzuka. Nae Yesu ekiziyavya hizi mpepfo nzuka na kuwapfonya wajwazi wonse kwa kut̯amuka chuuwo t̯u.

¹⁷Hivi vihendeka ili hikiḍe chuuwo cha *nabii Isaya aneneyecho kit̯imiye. Nabii Isaya ewa kamba, “Jeje kayahunwiiya majwazi yehu, na kahupfonya kuyawana na nd̯wari zehu.”

¹⁸Yesu epfoona hi t̯ut̯a ya wantu imuzingiyeyo, kawaamuru hawa wanafund̯iwe kawamba, “Nahuvukeni hiḍi ziwa hwende huḍoombe.”

¹⁹Wasidzanuka, kwenda Mwaalimu mumodza jwa Sharia kamwamba Yesu, “Mwaalimu, mimi nya t̯ayari kukuuḅa kuḍekwonse udzekokwenda.”

²⁰Ela Yesu kamwamba, “Hamabworama wana mpango zao, na nyuni wana vitsanza vyao. Ela mimi *Mwana jwa Ad̯amu, hat̯a pfantu pfa kujufinikiza yukopfe si kintu.”

²¹Mumodza jwa hawa wanafund̯i wangine weowakimuuḅa Yesu kamwamba, “Ḅwana, mimi natsaka kukuuḅa, ela niyatsa nguzi nyende nikamuzike baba.”[35]

²²Ela Yesu kamwamba, “Wewe niuḅa t̯u! Wayatse wafu wawazike wafu wao.”[36]

²³Makisa Yesu na wanafund̯iwe wanjia humuḍe chomboni na waḍabva kuvuka kwenda yombe jwa pfii jwa hiḍi ziwa.

²⁴Iyo saa kuḍabva kubiga vut̯o kali humu ziwani, na hichi chombo kiḍabva kubigwa ni mawimbi hat̯a kiḍabva kunjia madzi. Hiyo hiyo saa, ae Yesu ewa ekiyaa.

²⁵D̯ubva hawa wanafund̯iwe wamwendea wamuyamusa na madzwi wamwamba, “Ḅwana hupfonye, hwakuhihimiani!”

²⁶Yesu kawambukuya kawamba, “Kut̯i mu woga dza hivi? E nywinywi muna faro ndoḍo t̯i!” Makisa kasumama kaḍibusa hiḍi vut̯o na haya mawimbi, na iyo saa ziwa ḍyonse ḍinyamaa mya!

²⁷Hawa wanafund̯i wamaka muno hat̯a waḍabva kuuzana wao na wao wakyamba, “Huyu huyu ni muntu jwa namuna ga, jwa kwamba hat̯a vut̯o na mawimbi navyo vinamut̯ii?”

²⁸Yesu na wanafund̯iwe wepfokwojeka ḍoombe ya hiḍi ziwa, nsi ya Wagad̯ara,[37] kendejwa ni wantu wawii weokuwa na mpepfo nzuka. Hawa hawa wantu wowii wekiishi maḅeerani na wewa wazuka muno chima cha kwamba hihiiḍe njia ntaikichijwa ni yuḍejwonse.

²⁹D̯ubva wamuḅaiya madzwi Yesu wamwamba, “E Yesu Mwana jwa Muungu! Unaswini? Munamba kumakudzia kuhuhukumu kaḅila nsiku yehu[38] ntaidzafika?”

³⁰Hafufi na hapfaḍe, kwiwa gwolu nkuu ya nguyuwe iyoikiisa.

³¹D̯ubva hizi mpepfo nzuka zimuyomba Yesu zimwamba, “Ikiwa kwamba ujwakuhuyavya, ḅasi huyatse hukainjie hiḍe gwolu ya nguyuwe hiiḍe.”

³²Na Yesu kaziamuru kazyamba, “Endani!” Ndookomu hizi mpepfo nzuka ziwayawa hawaḍe wantu ziwanjia hawa nguyuwe. Iyo saa gwolu yonse ya nguyuwe id̯arama yenda igwa ḅaharini. Na nguyuwe wonse wafwa madzi tswee!

³³D̯ubva hawa wat̯unga[39] wa hawaḍe nguyuwe kudzaona hivyo, wad̯arama wenda mudzini. Wenda wawasumwiiya wantu dzuu ya hivi viwahendekeyevyo hawa nguyuwe pfamodza na hawaḍe wantu weokuwa nezi mpepfo nzuka.

³⁴Ndookomu wantu wonse humuḍe mudzini wanuka kwenda wakamuone Yesu. Na wepfomuona wamuyomba ayawe d̯aid̯oni mwao.