Read pokomo Matayo 9 Bible Online

Matayo 9 - pokomo bible

Matayo 9

¹Yesu kanjia chomboni na kavuka yombe jwa pfii jwa hiḍi ziwa na kenda mudzini kwao Kaperinaumi.

²Hukuḍe kapfiikijwa muntu ahinamfiye atsukwiijwe na t̯at̯a. Yesu epfoona faro ya hawaḍe wantu wamutsukwiiyeo, kamwamba huyu ahinamfiye, “Mwanangu,[40] dzipfe mojo, nabvisezo kuziyatsijwa.”

³D̯ubva waalimu wangine wa *Sharia waḍabva kunena na mojoni[41] wakyamba, “Huyu muntu huyu kakukufuruni t̯i!”

⁴Yesu epfohambuya hiviḍe wevyowakit̯ara, kawauza kawamba, “Kut̯i nywinywi mwakunit̯ariani mambo mazuka dzayohayo?

⁵Koro vivodho vya kunena ni vi? Kumwamba huyu muntu, ‘Nabvisezo kuziyatsijwa?’ Ambu kumwamba, ‘Nuka wenende?’

⁶Natsaka kumuyanga kwamba mimi *Mwana jwa Ad̯amu nina mamulaka ya kuyatsia wantu nabvise humu lumwenguni.” Kisa kamwamba huyu muntu ahinamfiye, “Nuka wima, hwaa hiḍi t̯at̯aḍyo wende nyumbani.”

⁷Na huyuḍe muntu kanuka kenda nyumbani.

⁸Wantu wonse weokuwapfo wanjijwa ni oga na waḍabva kumushad̯a Muungu kwa kumumpa mwanaad̯amu uwezo mukuu dzohuu.

⁹Yesu epfonuka na hapfaḍe, kendakaona *muhwaa kuwa mumodza eyeakihanigwa Matayo.[42] Ewa kakaa chihako humuḍe mwa hi ofisi ya kuhwaiya kuwa. Yesu kamwamba, “Niuḅa!” Nae Matayo kanuka kamuuḅa.

¹⁰Ḅaad̯aye, Yesu na wanafund̯iwe wenda nyumbani kwa Matayo wakaḍye chakuḍya. Wepfokaa kuḍyani, wahwaa kuwa wenji na wantu wangine weonahwajwa kuwa wanabvise, nao wakaa chanoni kuḍyani pfamodza nao.

¹¹Hawa *Mafarisayo wepfoona hivi, wawauza hawa wanafund̯iwe wawamba, “Kut̯i ayu mwaalimu jwenu kakuḍyani na wahwaa kuwa na wantu wangine wanabvise?”

¹²Yesu epfowasikia, kawambukuya kawamba, “Weo na matsea ntawanalacha muriit̯a. Weonalacha muriit̯a ni hawaḍe weo wajwazi.

¹³Endani mukalache maana ya haya matsoro yambiiyeyo, ‘Mimi si haḍya ya mvuugiya zenu, ela natsaka mukifwiyana t̯ei nywinywi kwa nywinywi.’ Koro mimi sikudzia wantu weonadziona kwamba ni wahachi, ela nidzia wanabvise.”

¹⁴Nsiku modza wanafund̯i wangine wa Yohana Mut̯opya wamwendea Yesu na wamuuza wamwamba, “Kut̯i swiswi na Mafarisayo hunakaa na kufunga, ela wanafund̯iwo ntawakae na kufunga?”

¹⁵Yesu kawambukuya kawamba, “Waalikijweo harusini wanawezadze kuwa na masikit̯iko huku huyu ḅwana harusi akiwa ka pfamodza nao? Nsiku idzafika, ambapfo huyu ḅwana harusi kadzanujwa kahi yao. Hapfo ndipfo wadzepfofunga.

¹⁶Ntaku muntu eyenahuna kiraka kuyawa kwa nguo mpya, akakingiza kwa nguo ijariyeyo. Koro akihenda dzavyo, hiki kiraka che nguo mpya kidzepfoḍabva kunyaa, kinainuha hi nguo ya kae, ndookomu nayo inaḅaika zaid̯i.

¹⁷Dza vivyo, ntaku muntu eyenangiza mvinyo mpya kwa mifuko ya nchingo[43] ya kae. Koro akihenda dzavyo, hi mifuko ya nchingo inaḅaika ne mvinyo inahika. Mvinyo mpya inangizwa kwa mifuko ya nchingo mipfya! Na muntu akihenda hivi, ndipfo hi mifuko ne mvinyo ntaviwezi kunangika.”

¹⁸Yesu epfoakinena hivi, kendejwa ni muntu mumodza eyekuwa mukuu jwa *sunagogi. Huyuḍe muntu epfokwenda kamuvunzia nkuhi Yesu na kamwamba, “Ḅwana, mwanamuke wangu kahuna nsoho saambi. Ela nimanya kwamba ukyenda ukimupfaza mukono anafufuka.”

¹⁹D̯ubva Yesu na hawa wanafund̯iwe wanuka wagijana na huyuḍe muntu.

²⁰Wepfowakyenda, wadzijwa ni muke eyekuwa na ujwazi wa kukakanyika mwazi. Hu huu ujwazi ewa kamakaa nao kwa myaka kumi na miwii. Huyu muke ewa kamamat̯a kamba, “Amaa nikyenda nikiuhora au mutse weḍi lot̯a ḍya Yesu saapfowa?” D̯ubva kenda na nyuma kenda kauhora hu mutse wa hiḍi lot̯a ḍya Yesu.

²²Yesu kaperuka kamuona na kamwamba, “Maama, dzipfe mojo, faroyo ikupfoza.” Na pfapfo huyuḍe muke kapfowa.

²³Yesu epfofika hapfaḍe nyumbani pfa huyuḍe mukuu jwa sunagogi, kaona t̯ut̯a ya wantu weowakiiya na wangine weowakikwimba na nzumari.[44]

²⁴Kawamba, “Yawani nyonse! Huyu mwana nkakufwa, kakuyaani t̯u!” Ela hawaḍe wantu waḍabva kumutseka Yesu koro wemanya kwamba kafwa ḍugha.

²⁵D̯ubva hawaḍe wantu wepfoyawa, Yesu kanjia humuḍe chumbani kamugija mukono huyuḍe mwanamuke, nae kasumama!

²⁶Ndookomu maagu dzuu yeḍihiḍi dzambo yad̯achaa hihiiḍe ḍanda yonse.

²⁷Yesu epfonuka akwakuchiani, kaḍabva kuuḅwa ni ntumbu matso wawii. Hawa ntumbu matso wekimuḅaiya madzwi wakyamba, “E Mwana jwa D̯aud̯i,[45] ad̯o hufwiye t̯ei!”

²⁸Wagija kumuuḅa na nyuma hat̯a wenda wanjia humuḍe nyumbani emoakikaa. Ndookomu Yesu kawauza kawamba, “Muhikiza kwamba mimi naweza kumuhendeza muone?” Nao wamwambukuya wamwamba, “Ee, huhikiza Ḅwana!”

²⁹Nae Yesu kawahora haya matso yao na kawamba, “Ḅasi navimuhendekeye dza muhikiziyevyo!”

³⁰Nao pfapfo waḍabva kuona! Makisa Yesu kawaseresa vyumuni kawamba, “Manyani mutsevimwambia muntu yuḍejwonse!”

³¹Ela wakidzawakinuka wavid̯achasa kula pfantu hihiiḍe sehemu, wakisumwiiya wantu dzuu ya hayaḍe ya Yesu eyoakihenda.

³²Hawaḍe wantu wepfowakiyawa, wantu wangine wamuyehea Yesu muntu eyekuwa na mpepfo nzuka zimuhendeyezo ḅuḅwi.

³³Yesu epfoiyavya hiḍe mpepfo nzuka t̯u, huyuḍe muntu kaḍabva kunena. Wantu wamaka na waḍabva kunena wakyamba, “Hachi ntahudzaona mambo dzayahaya yahendeke pfaḍepfonse hi hii nsi ya Isiraeli!”

³⁴Ela hawa Mafarisayo wamba, “Kakuyavyani mpepfo nzuka kwa uwezo wa Shaat̯ani, mukuu jwa mpepfo nzuka zonse.”

³⁵D̯ubva Yesu kenda midzi yonse na vidzidzi vye hiḍe ḍanda, akiyongweeza masunagogini na kusumwiiya haya *Maagu Mema dzuu ya Uhaju wa Mbinguni. Na pia kawapfonya wantu wenji na wenji weokuwa na majwazi na nd̯wari za kula namuna.

³⁶Epfoona hivi vit̯aro vya wantu vivyovikimwendea, kawasikit̯ikia muno. Koro kawaona dza mbuzi zisizokuwa na mut̯unga. Kawaona kwamba wekihangaika na ntaweewa na madzikwat̯yo yaḍeyonse.

³⁷Ndookomu kawamba hawa wanafund̯iwe, “Haya mavuno ni menji, ela hawa wa kuyavuna ni wachuchu.

³⁸D̯ubva muyombeni huyu Ḅwana jwa haya mavuno ongeze wantu wa kuyavuna.”