Read pokomo Marko 14 Bible Online

Marko 14 - pokomo bible

Marko 14

¹Kwiwa kuhafa nsiku mbii ifike jila ya *Pasaka na ya mikahe isiyongizwa hamira. Wakohani wakuu na waalimu wa *Sharia amaale wekilacha njia ya kumugija Yesu na siri na wamuyage.

²Ela wepfowakipanga wahuniyana kwamba watsevihenda ngera ye jila koro wekishoogea kwamba hawa wantu wanaweza kujumuya fuḍyo.

³Nsiku modza yapfo, Yesu ewa mudzi wa Betania nyumbani mwa muntu eyeakihanigwa Simioni. Huyu huyu muntu d̯ura ewa kajwaa ujwazi wa kwanga. D̯ubva Yesu epfokaa kuḍyani, kwenda muke mumodza eyetsukuya nt̯upa ya mafuha ghali ya manunkanto.[31] Kaifunguya hi nt̯upa kwa kuivunza hu muyomu, kisa kayamuhiiya Yesu humu kitswani.

⁴Wantu wangine weokuwapfo wepfoona hivi vya huyu muke ahendeyevyo, wareja na waḍabva kuuzana wao na wao wakyamba, “Kut̯i kakuyanangani-nangani haya manunkanto dzevihivi?

⁵Amaa t̯ambere yaguzijwe, ntakundeepatikana fwedha nyinji na nyinji[32] za kupfa masikini?” Ndookomu wamubaukia na tsungu muno.

⁶Ela Yesu kawamba, “Muyatseni! Mwakumusumbuiyani, na hali kanihendea dzambo dzema ḍya mafara?

⁷Wantu masikini munao na mujwakuwa nao nsiku zonse, na kula mutsakiyepfo munaweza kuwahendea mema. Ela mimi sikwakuwa pfamodza nanywi nsiku zonse.

⁸Jeje kanihendea hiviḍe awezeyevyo kuhenda. Kanihiiya mafuha kwa kuut̯ayarisha hu mwii wangu kwa mazishi.

⁹Na hachi nyakumwambiani, kula pfa haya haya *Maagu Mema yadzepfosumwiijwa humu lumwenguni, hivi vya huyu muke ahendeyevyo navyo pia vidzasumwiijwa kwa kumukumbuka.”

¹⁰Makisa Yud̯a Isikariota, eyekuwa mumodza jwa hawa wanafund̯i kumi na wawii, kenda kwa wakohani wakuu ili akamuḍawanye Yesu.

¹¹Hawa wakohani wakuu wepfosikia hivi vya Yud̯a adziiyevyo kuhenda watsekea muno na wamuahid̯i kumumpa fwedha. Ndookomu Yud̯a kaḍabva kulacha namfasi nyema ya kumuḍawanya Yesu kwao.

¹²D̯ubva ipfofika nsiku ya d̯ura ya hi jila ya mikahe isiyongizwa hamira, nsiku ya Wayahud̯i weyonatsinza mwana mbuzi jwa Pasaka, hawa wanafund̯i wamuuza Yesu wamwamba, “Ḅwana, e chakuḍya che jila ya Pasaka unatsaka hukachikuelekanyie ku?”

¹³Ndookomu nae kahuma wanafund̯iwe wawii kawamba, “Endani mudzini, na mukwakuunjiani hu mudzi munat̯ongana na muyume atsukwiiye nyungu ya madzi. Gijanani nae

¹⁴mumpaka kwe nyumba adzeyonjia. Kisa mwambeni huyu mwenye, ‘Mwaalimu kamba, e chumbache cha kuḍya e jila ya Pasaka pfamodza na wanafund̯iwe ni chi?’

¹⁵Nae anamuyanga chumba chikuu d̯arini dzuu, chicho na kula kintu t̯ayari. Kihuelekanyieni hichi chakuḍya cha Pasaka humo humo.”

¹⁶D̯ubva hawa wanafund̯i wanuka wenda humuḍe mudzini na waona kula kintu dza viviḍe vya Yesu awambiiyevyo. Nao wakielekanya hichi chakuḍya cha Pasaka.

¹⁷Ipfofika mioro, Yesu na wanafund̯iwe kumi na wawii wenda humuḍe mudzini.

¹⁸Wepfokaa kuḍyani, Yesu kawamba, “Hachi nyakumwambiani, mumodza jwenu eyekuḍyani pfamodza nami, njwakuniḍawanya.”

¹⁹Hawa wanafund̯i wepfosikia hivi wanjijwa ni ngiru na waḍabva kumuuza mumodza mumodza wakyamba, “Ḅwana, munamba ndimi?”

²⁰Yesu kawamba, “Ni mumodza jwenu nywinywi kumi na wawii. Ni huyuḍe eyekut̯opyani nami ḅaakuli modza.

²¹Mimi *Mwana jwa Ad̯amu ni had̯i nifwe, koro ndivyo vyorejwevyo. Ela huyu adzeeniḍawanya kadzakunta d̯ina nkuu muno! Hat̯a ni heri kwamba huyo huyo muntu nkandeevyajwa haswa!”

²²D̯ubva wepfowakiḍya, Yesu kahwaa mukahe kauvodhya, makisa kauvunza na kauwapfa wanafund̯iwe. Akwakuuwapfani kawamba, “Gijani hu mukahe huu muḍye, koro ni mwii wangu.”

²³Makisa kahwaa chikombe cha mvinyo, kachivodhya na kachiwapfa wanwa wonse.

²⁴Yesu kawamba, “Huu ni mwazi wangu wiwo dza hakikisho ḍya hiḍi ḍamano ḍya Muungu eḍyokuhendani na wantuwe. Ni mwazi wihijweo kwa dzambo ḍya wenji.

²⁵Hachi nyakumwambiani, sikwakunwa kawii hi mvinyo mumpaka hapfaḍe nidzepfonwa mvinyo mpya Uhajuni mwa Muungu.”

²⁶D̯ubva wepfoḍya wakisa, wakwimba wiya wa shad̯u makisa wenda Murima wa Mizeituni.

²⁷Wepfofika Murima wa Mizeituni, Yesu kawamba wanafund̯iwe, “Nyonse mujwakunid̯arama. Koro haya matsoro yamba, ‘Namubiga huyu mut̯unga, na hizi mbuzi zinat̯amisaa.’ ”

²⁸Yesu kongeza kunena kamba, “Ela nidzepfofufuka kuyawa kwa wafu, namuyongowa kwenda Galilaya.”

²⁹Pet̯ero kamwamba, “Ḅwana, hat̯a ikiwa kwamba wonse wakud̯arama, mimi siwezi kukuyatsa meshi.”

³⁰Ela Yesu kamwamba, “Hachi nyakukwambiani, hu huu siku wa yeo kaḅila nkuku nkadzawika myeedha miwii, unanikana myeedha mihahu.”

³¹Ela Pet̯ero kanena na muvuku kamba, “Ḅwana, mimi siwezi kukukana meshi! Nya t̯ayari hat̯a kufwa pfamodza nawe!” Ndookomu hawa wanafund̯i wangine wonse nao wamuyapfia Yesu dzevihivi.

³²Yesu na wanafund̯iwe wenda kwa nkonde ya mizeituni iyoikihanwa Getsemani. Wepfofika Yesu kawamba wanafund̯iwe, “Ikaani hapfa nikayombe.”

³³Akwakunukani kamuhwaa Pet̯ero, Yakobo na Yohana. Makisa Yesu kaḍabva kusikit̯ika na kuhangaika mojoni mwakwe.

³⁴Ndookomu kawamba wanafund̯iwe wohahu, “Mojo wangu uhenda muziho na sikit̯iko. Una tsungu wa kufwa! Ikaani hapfa mumire.”

³⁵Kisa kenda kausoni kachuchu, kadzigisa mutsangani na kayomba kwamba ikiwezekana hihiiḍe saa ya matsungu imwapfuke.

³⁶Kayomba kamba, “E Baba jwangu, kwako ntaku ḍisiḍyowezekana. Nakuyomba ikiwezekana ukininwiiye hichi chikombe cha tsungu wa haya mad̯ina nidzeyokunta. Kenge si kwa miro yangu, ela miroyo naihendeke.”

³⁷Makisa kauja kwa hawa wanafund̯iwe na kendakawat̯onga wakuyaani. D̯ubva kamwamba Pet̯ero, “Simioni, kwakuyaani? Yani nkuwezi kumira hat̯a nangaa kwa saa modza?

³⁸Mirani na kuyomba mutsekudzanjia maḍemoni. Koro hi ruhu inatsaka, ela hu mwii ni mudhaifu.”

³⁹Kisa Yesu kanuka akayombe kawii. Na kayomba na vyuuwo dza viviḍe vya d̯ura.

⁴⁰Makisa kauja kawii kwa hawa wanafund̯iwe na kendakawat̯onga wakuyaani, koro matso yao yewa yawazihopfa na sinzizi. Nao ntawakumanya cha kumwambukuya.

⁴¹Yesu kenda kawii akayombe. Na epfouja mweedha wa hahu kawauza kawamba, “Koro amaale mukaiya kuyaa na kuyavya hara? It̯osa! Saa isakufika, yangu mimi Mwana jwa Ad̯amu kuḍawanywa ningizwe mikononi mwa wanabvise.

⁴²Haya nukani hwende, koro huyu jwa kuniḍawanya kamaawa kudzani.”

⁴³Iyo saa, hali akwakunenani, mumodza jwa hawa wanafund̯iwe kumi na wawii eyeakihanigwa Yud̯a, kakumpuya na kit̯aro cha wantu watsukwiiyeo myundu na mbuku. Hawa hawa wantu wewa wahumigwa ni hawa wakohani wakuu, waalimu wa Sharia na wazee wangine.

⁴⁴Yud̯a, huyu muḍawanya ewa kawapfa kihambwiizo hawa wantu kawamba, “Huyuḍe nidzeemunonea ndiye huyu mwiyekulachani. Mugijeni mwende nae na mumwamie urembo.”

⁴⁵Yud̯a epfofika kafuudha mumpaka kwa Yesu na kamwamba, “Mwaalimu!” Makisa kamunonea.

⁴⁶Ndookomu hawaḍe wantu wangine wamunyant̯okea Yesu na wamugija.

⁴⁷Mumodza jwa hawa wantu weokuwa hapfaḍe katsoowa munduwe na kamukenta huyu muhumisi jwa huyu *Mukohani Mukuu kamuhuna hiḍi sikio.

⁴⁸Yesu kanena na hawaḍe wadziyeo kumugija kawamba, “Munidzia na myundu na mambuku, dza kwamba mudzia kugija mwivi?

⁴⁹Kula nsiku niiwa pfamodza nanywi nikiyongweeza humuḍe Hekaluni, na ntamukunigija. Ela yeo, haya yakuhendekani ili haya matsoro yat̯imiye.”

⁵⁰Hawa wanafund̯i wonse wad̯arama na wamuyatsa Yesu jeje heket̯u.

⁵¹Kwiwa na muurani mumodza eyeakimuuḅa Yesu na nyuma na ewa kavwaa mushuka t̯u. Hawaḍe wantu wepfomunyant̯okea wamugije

⁵²waiḅaa hi nguo nae kad̯arama vivi.

⁵³D̯ubva wamupfiika Yesu nyumbani kwa huyu mukuu jwa hawa wakohani wakuu. Hawa wakohani wakuu wangine wonse na waalimu wa Sharia na wazee wat̯ut̯aa humuhumuḍe nyumbani.

⁵⁴Pet̯ero ewa kamuuḅa Yesu na jwa kuye mumpaka kenda kanjia humuḍe uani mwa huyu Mukohani Mukuu. Epfonjia, kenda kakaa chihako na hawa asikari na kaḍabva kukoha moho.

⁵⁵Hawa wakohani wakuu pfamodza ne gasa yonse walacha mambo ya kumusit̯aki nayo Yesu ili waweze kumuyaga, ela ntawakudhumburya kintu.

⁵⁶Wenji waḍema kuyavya ushaahiḍi wa nsuwe dzuu ya Yesu, ela ushaahiḍi wao ntaukunjiiyana.

⁵⁷Mwiso kusumama wantu wangine nao wayavya ushaahiḍi wa nsuwe wamba,

⁵⁸“Swiswi wenye humusikia akinena akyamba, ‘Mimi nainanga hi *Hekalu hii imbakijweyo na mikono ya wanaad̯amu. Kisa kwa nsiku ntahu nambaka ingine isiyombakwa na mikono ya wanaad̯amu.’ ”

⁵⁹Ela hat̯a kwa hivi waneneyevyo, ushaahiḍi wao ntaukunjiiyana.

⁶⁰Makisa huyu Mukohani Mukuu kasumama kahi ya hawa wangine na kamuuza Yesu kamwamba, “Aya masit̯aki yonse wiyokusit̯akigwani, nku cha kudzihehea nacho hat̯a?”

⁶¹Ela Yesu kanyamaa mya, nkakwambukuya hat̯a chuuwo. Na huyu Mukohani Mukuu kamuuza kawii kamwamba, “T̯ahwambiye, wewe ndiwe ayu *Kirist̯o Mwana jwa Muungu?”[33]

⁶²Yesu kamwambukuya kamwamba, “Ee Ndimi. Kisa mudzaniona mimi Mwana jwa Ad̯amu nikaa mukono kuyume wa hila wa Muungu mwenye uwezo wonse. Na mudzaniona nikisuka na mawingu kuyawa mbinguni dzuu.”

⁶³Pfapfo huyu Mukohani Mukuu kaḍihararuya hiḍi vwaziḍye[34] kisa kamba, “Kuna haḍya ga ya mashaahiḍi amaale?

⁶⁴Nywinywi wenye mumusikia akwakukufuruni! D̯ubva mwambadze?” Na wonse wahuna kwamba anamala kuyagwa.

⁶⁵D̯ubva wangine waḍabva kumukamia mahe na wamufunga kit̯ambaa cha matso na wanjia kumubigani makonde. Kisa wamubaladhaiya wamwamba, “Haya, yavya unabii kwamba ni ga akubigie!” Hawa asikari nao wamuhwaa wamubiga mapfi.

⁶⁶Hiyo hiyo saa Pet̯ero amaale ewa kakaa chihako hukuḍe uani. Kwenda muhumisi mumodza jwa kike jwa huyu Mukohani Mukuu hapfaḍe wepfokuwa,

⁶⁷na kamuona Pet̯ero akwakukohani moho. Kamuchimiza urembo kisa kamuuza kamwamba, “Hat̯a nawe, nkwiwa pfamodza na huyuḍe Yesu jwa Nazareti?”

⁶⁸Ela Pet̯ero kakana kamba, “Mimi haswa? Hat̯a sividzi! Na wala sikwakuimukani kwamba kwakunenani kintu ga!” Makisa Pet̯ero kanuka kenda hapfaḍe muḍyangoni pfa kuyawiya.

⁶⁹Huyuḍe mwanamuke epfomuona kawii, kaḍabva kuwambia hawaḍe wantu wasumamiyeo kawamba, “Hachi huyu muntu huyu ni mumodza jwao!”

⁷⁰Ela Pet̯ero kakana kawii. Ḅaad̯a ya kat̯emo kachuchu, hawaḍe wantu weosumama hapfaḍe, nao wamwamba Pet̯ero, “Hakika wewe u mumodza jwao. Maana yakwe wewe u Mugalilaya t̯i!”

⁷¹Pet̯ero kayapfa kamba, “Hachi nayapfa usoni kwa Muungu kwamba, huyo huyo muntu mwiyekunenani simudzi! Na ikiwa kwamba nyakunenani nsuwe, ḅasi Muungu nanihukumu!”

⁷²Na iyo saa nkuku kawika mweedha wa pfii. Na pfapfo Pet̯ero kakumbuka hiviḍe vya Yesu amwambiiyevyo akimwamba, “Hu huu siku wa yeo, kaḅila nkuku nkadzawika myeedha miwii, unanikana myeedha mihahu.” Na epfovikumbuka hivi, kaiya na tsungu muno.