Read pokomo Marko 3 Bible Online

Marko 3 - pokomo bible

Marko 3

¹Nsiku ingine ya *Sabato, Yesu kanjia kawii *sunagogini. Na humuḍe kuzimu kwiwa muntu mumodza ahinamfiye mukono.

²Na pia kwiwa na *Mafarisayo weowakilacha dzambo ḍya kumusit̯aki naḍyo Yesu. D̯ubva wekimuchimiza waone kwamba anamupfonya huyu muntu na nsiku ya Sabato ambu hat̯a.

³Yesu kamuhana huyuḍe muntu ahinamfiye hu mukono kamwamba, “Nzoo hapfa usoni.”

⁴Kisa kawauza hawa Mafarisayo kawamba, “Dze, ai *Sharia yehu inahumala kuhenda kintu ga na nsiku ya Sabato? Kuhenda dzambo dzema ambu kuhenda dzambo zuka? Kupfonya ambu kuyaga?” Ela wad̯urura mya!

⁵Yesu kawahaaza na dzitso ḍya ngoro, koro kasikit̯iswa ni myojo yao myumu. Kisa kamwamba huyuḍe muntu ahinamfiye, “Ugonzowe hu mukonowo!” Huyuḍe muntu kaugonzowa na upfowa pfapfo.

⁶Iyo saa hawa Mafarisayo wayawa nze. Kisa wao na wangine weonamuunga mukono *Herod̯e wenda waḍabva kuhenda mashauri ya kumuyaga Yesu.

⁷Kisa Yesu pfamodza na wanafund̯iwe, wanuka wenda geri ya ziwa ḍya Galilaya. Na wantu wenji na wenji waḍabva kumuuḅa. Wangine wewa wayawa Galilaya, na wangine wayawa ḍyimbo ḍya Yud̯aya.

⁸Wangine wayawa Yerusalemi na ḍyimbo ḍya Idumea. Na wangine wao wewa wayawa yombe jwa pfii jwa tsana ya Yorod̯ani na hat̯a ḍanda za midzi ya Turo na Sidoni. Wonse wamwendea Yesu kwa kwamba wesikia haya eyoakihenda.

⁹Na kwa kwamba Yesu ewa kapfoza wantu wenji na wenji, wajwazi wonse wekikunduyana ili nangaa wamuhore t̯u. D̯ubva Yesu epfoona hivyo, kawamba wanafund̯iwe wamut̯ayarishie chombo kiḍoḍo, ili hi t̯ut̯a ya wantu itsekudzamuminya.

¹¹Na hawaḍe weokuwa na mpepfo nzuka, kula wepfowakimuona Yesu, wekidzigisa nsii usoni yakwe na kuḅaa madzwi wakyamba, “Wewe u Mwana jwa Muungu!”

¹²Ela Yesu kawaseresa vyumuni watseenena kwa wantu kwamba jeje ni ga.

¹³Nyumae, Yesu kapfaa murimani dzuu na kahana hawaḍe atsakiyeo jeje, nao wamwendeya.

¹⁴Katsana wantu kumi na wawii ahaniyeo, “*Ntumi,” wakae pfamodza nae na awahume nze kwendasumwiiya

¹⁵na wawe na uwezo wa kuyavya mpepfo nzuka.

¹⁶D̯ubva hawa kumi na wawii atsaniyeo ni hawa: Simioni amumpiye sari ḍya Pet̯ero,

¹⁷Yakobo na Yohana wana wa Zebed̯ayo, awapfiyeo sari ḍya Boanage, yani wana wa ḅaḅat̯u.

¹⁸Wangine ni aḍe And̯erea na Filipo, Bat̯olomayo, Matayo, Tomasi, Yakobo mwana jwa Alifayo, Tadayo, Simioni eyeakihanwa Jangina[8] na

¹⁹Yud̯a Isikariota, huyu adzeyeakimuḍawanya Yesu.

²⁰Kisa Yesu na wanafund̯iwe wanjia nyumbani. Na kawii kut̯uut̯aa t̯ut̯a nkuu na nkuu ya wantu hat̯a Yesu na wanafund̯iwe ntawakupata namfasi ya kuḍya chakuḍya.

²¹D̯ubva wantuwe wepfovipata maagu, wenda wakamuhwae koro wekit̯ara kwamba kakuyawani kitswa.

²²Kwiwa na waalimu wa Sharia weoyawa Yerusalemi. Nao wamba, “Huyu kanjijwa ni *Belizebuli, mukuu jwa mashaat̯ani. Na ndiye eyenamumpa nguvu za kuyavya wantu mpepfo nzuka.”

²³D̯ubva Yesu kawamba hawa wantu wadzikuntie hafufi nae, na kanena nao na mainganyo kawamba, “Shaat̯ani anaweza kumuyavya Shaat̯ani?

²⁴Uhaju uḍewonse ukigawika vit̯aro vya kupfingana vivyo kwa vivyo, uhaju dzao ntauwezi kusumama.

²⁵Na nyumba igawikiyeyo vit̯aro vya kupfingana vivyo kwa vivyo, nyumba dzayo ntaiwezi kusumama.

²⁶Ndookomu ikiwa kwamba Shaat̯ani kaḍabva kudzipfinga jeje mwenye, hu uhajuwe unawa kwamba ugawika, na ntauwezi kusumama, unagwa.

²⁷Ntaku eyenaweza kuvunza nyumba ya muntu mwenye nguvu aheke maliye pfasipfo nguzi kumufunga-funga huyu mwenye kisa rhefu, aheke maliye.

²⁸Hachi nyakumwambiani, nabvise zonse za wanaad̯amu na kukufuru kwao wanaweza kuyatsijwa.

²⁹Ela yuḍejwonse adzeyemukufuru Ruhu Mudheru, nkawezi kuyatsijwa meshi. Huyo anawa kwamba ana nabvise ya maishi.”

³⁰Yesu kanena dza hivi kwa kwamba wangine wekyamba ana mpepfo nzuka.

³¹Kisa wanduguzwe Yesu na mama jwao wenda hapfaḍe epfoakiyongweeza. Wasumama nze ye nyumba na wamuhumia muntu amuhane.

³²Yesu ewa karingwa ni t̯ut̯a ya wantu wakaiyeo chihako. Nao wamwamba, “Ḅwana, mamajo na wanduguzo wa hapfo nze wanatsaka kunena nawe.”

³³Ela Yesu kawambukuya kawamba, “Mama na wandugu zangu ni wa?”

³⁴Kahea matso kawayowa hawaḍe wamuringiyeo kisa kamba, “T̯ayowani, mama na wandugu zangu ni hawa!

³⁵Koro yuḍejwonse eyenahenda miro ya Muungu, huyo ndiye mama, ndiye ndugu yangu na ndiye imbu ḍyangu.”