Read pokomo Marko 4 Bible Online

Marko 4 - pokomo bible

Marko 4

¹Yesu kaḍabva kuyongweeza kawii geri ya ziwa. Kwiwa t̯ut̯a nkuu na nkuu ya wantu hat̯a kaona kwamba heri anjie chomboni. Epfonjia kakaa chihako, na hawa wantu wakaa na hapfaḍe gubani.

²Kawayongweeza mambo menji na menji kwa mainganyo. Kawamba,

³“T̯asikiani! Kwiwa na muntu mumodza endeye kushat̯ani mbeju.

⁴Epfoakishat̯a, mbeju zingine zigwa njiani na ziḍigwa ni nsongo.

⁵Mbeju zingine zigwa maweni kusikokuwa na mutsanga mwinji, na zimea haraka.

⁶Ela kwa kwamba hi mitse ntaiwa na mizi yendeyeyo nsii, ipfobigwa ni dzuwa inyuuka ifwa.

⁷Zingine zigwa miwani na hi miwa nayo ikuya iishumpanya hi mimea na ntaikuvyaa kintu.

⁸Ela mbeju zingine zigwa kuntu kwa mutsanga munono. Zimea, zikuya na zivyaa chima cha nseensee miyongo mihahu zaid̯i ya hiviḍe zishat̯ijwevyo. Zingine zivyaa chima cha miyongo mihandahu na zingine gana, zaid̯i ya hiviḍe zishat̯ijwevyo.”

⁹Kisa Yesu kawamba, “D̯ubva huyuḍe eye na masikio nasikiye!”

¹⁰Yesu epfosaa jeje na wanafund̯iwe kumi na wawii na wantu wangine weowakimuuḅa, wamuuza dzuu ya haya mainganyo.

¹¹Nae kawambukuya kawamba, “Nywinywi muḍyaalijwa kuimanya hi siri ya Uhaju wa Muungu. Ela wangine wanayambijwa ḅasi kimafumbo.

¹²Ndookomu, ‘Kuona wanaona, ela ntawahambuye kintu. Kupfindiiya wanapfindiiya, ela ntawaimuke kintu. Koro t̯ambere si hivyo, wandemuperukia Muungu nae andewapfonya.’ ”

¹³Kisa Yesu kawauza kawamba, “Yani hat̯a hiḍi hiḍi inganyo ntamukuḍiimuka hat̯a? Mani d̯ubva munaweza kuimuka inganyo ḍingine ḍiḍeḍyonse?

¹⁴Mushat̯a ni huyu eyenashat̯a chuuwo cha Muungu.

¹⁵Wantu wangine waa dza hizi mbeju zigwiyezo njiani. Wanakisikia hichi chuuwo, ela iyo saa Shaat̯ani anakudza akachiwapfoka myojoni mwao.

¹⁶Na wantu wangine waa dza hiziḍe mbeju zigwiyezo maweni. Wanakisikiiya hichi chuuwo cha Muungu na iyo saa wakachipfokea na tsekea muno.

¹⁷Ela kwa kwamba hichi chuuwo ntachikungora myojoni mwao, faro yao ntaiwe na nguvu. Wakipatwa ni mad̯ina kwa dzambo ḍye chuuwo, iyo saa wanaziyekeza faro zao.

¹⁸Wantu wangine waa dza hizi mbeju zigwiyezo miwani. Wanakipfokea hichi chuuwo,

¹⁹ela mirumiru za huju lumwengu na makulekule ya ujabva na t̯amaa nyinji, zinawalinga na kukishumpanya hichi chuuwo. Ndookomu hichi chuuwo ntakivyae matunda yaḍeyonse maishani mwao.

²⁰Na hiziḍe mbeju zigwiyezo kwiiko na mutsanga munono, ni dza hawaḍe wantu weonakisikiiya hichi chuuwo na wakachigija na mojo mumodza. Maisha yao yanamuvyaiya Muungu matunda dza hiviḍe vya muhi wivyonavyaa mumpaka ukaara gomba.”

²¹Yesu kongeza kunena kamba, “Kuna muntu eyenagiza tsaa kisa akaifinikiza na pishi ambu akaingiza t̯at̯ani kuzimu, ḅad̯ala ya kuipfatsika pfantu dzuu?

²²Koro kula kifitsikiyecho kidzayawiya wekeani tswee na kula chicho sirini kidzamanyikana.

²³D̯ubva awee na masikio nasikiye!”

²⁴Kisa kawamba, “Yapfindiiyeni muno hayaḍe mwiyonasikia! Hikiḍe kipimo mwichonapimia nacho wenzenu, ndicho mudzechopimijwa hat̯a na kufwachaa.

²⁵Koro huyuḍe eye na kintu na akikitumia, huyo anakwongezejwa. Ela huyuḍe asiye na kintu, ḅasi hat̯a hakaḍe kachuchu ekonako pia anakapfokwa.”[9]

²⁶Yesu kongeza kunena kamba, “Uhaju wa Muungu nauinganya na muntu mwenye nkonde endeye akishat̯a mbejuze.

²⁷Siku ukifika anayaa na nsi ikicha anayamuka. Azo hizi mbeju zinatsembuya na zinaḍabva kumea pfasipfo jeje kumanya kwamba vyakuhendekanidze.

²⁸Hu mutsanga ndiwo wiwonakuzya mumea. D̯ura kunatsembuza gomba, kisa kunapfatsika hiḍi suke, na mwiso hiḍi suke ḍinangiza chakuḍya.

²⁹Hi bvaro ikimawivwa, huyu muntu anaḍabva kuikekenta, kwa kwamba ngera ya mavuno ifika.”

³⁰Kawii Yesu kamba, “Uhaju wa Muungu hundeuinganya na kintu ga? Ambu hundeweleza na inganyo ga?

³¹Waa dza mbeju ya tsare[10] imeeyeyo nkondeni. Gula ndiyo mbeju ndoḍo ya mwiso kahi ya mbeju zonse.

³²Ela ikimea inawa muhi mukuu kuchia mihi ingine yonse ya nkondeni. Mahambiye yanawa makuu na hat̯a nyuni nao wanakudza na kudzielekanyia vitsanza humu mahambini.”

³³Yesu kawasumwiiya wantu chuuwo na mainganyo yangine menji dzayahaya. Kawasumwiiya chima wawezeyecho kusikiiya.

³⁴Yesu nkakunena na hawa wantu kiḍechonse pfasipfo mainganyo. Ela epfokuwa ndiye jeje na wanafund̯iwe wao heket̯u, ekiwaimusya maana ya haya mainganyo.

³⁵Iiḍe nsiku na mioro, Yesu kawamba wanafund̯iwe, “Nahuvukeni hiḍi ziwa hwende huḍoombe.”

³⁶D̯ubva waiyatsa hi t̯ut̯a ya wantu, wanjia humu chomboni mwa Yesu emokuwa na waḍabva kuvuka hiḍi ziwa. Vyombo vingine navyo viwauḅa na nyuma.

³⁷Wepfowakivuka, kuḍabva kubiga vut̯o kali na haya mawimbi yakibiga hichi chombo hat̯a kiḍabva kunjia madzi.

³⁸Ae huku Yesu ewa ka nsezi ye chombo, katsagamia mut̯o ekiyaa. D̯ubva wanafund̯iwe wamuyamusa wamwamba, “Mwaalimu, ntavikwakukumud̯ani hat̯a kwamba hwakuhihimiani?”

³⁹Yesu epfoyamuka, kaḍibusa hiḍi vut̯o na kayaamuru haya mawimbi kayamba, “Ingamaa! Ḍunda mya!” Na pfapfo hiḍi vut̯o ḍinyamaa na ziwa ḍyonse ḍiḍunda mya!

⁴⁰Kisa Yesu kawamba wanafund̯iwe, “Kut̯i mu woga dza hivi? Amaale ntamu faro hat̯a?”

⁴¹Nao myojo iwanjia oga zaid̯i na waḍabva kuuzana wao na wao wakyamba, “Huyu huyu ni muntu aweedze, jwa kwamba hat̯a vut̯o na mawimbi navyo vinamut̯ii?”