Read pokomo Marko 5 Bible Online

Marko 5 - pokomo bible

Marko 5

¹Yesu na wanafund̯iwe wepfovuka hiḍi ziwa ḍya Galilaya, wenda wojeka nsi ya Wagerasa.

²Yesu epfoyawa nomu chomboni, kat̯angerwa ni muntu ayawiye maḅeerani eyekuwa na mpepfo nzuka.

³Huyu muntu ekikaa maḅeerani. Ntaku awezeye kumumiza hat̯a kwa kumufunga na minyoro.

⁴Ekikaa na kufungwa maguu na mikono kut̯wa, ela kula buwa ekiihuna-huna hi minyoro na hizi mpingu akazivunza-vunza. Ndookomu ntakwiwa na muntu eyekuwa na nguvu za kumumiza.

⁵Siku na musikahi ekizunguuka humu maḅeerani na mirimani akiḅaa madzwi na kudziḅaa-ḅaa na mawe.

⁶D̯ubva epfomuona Yesu na jwa kuye, kamud̯aramia na kenda kamugwiya maguuni.

⁷Yesu kamwamba, “Wewe mpepfo nzuka, muyawe muntu huyu!” Na huyuḍe muntu kaḅaa idzwi kuu kamba, “Unamini Yesu Mwana jwa Muungu awee dzuu? Nakuyomba kwa sari ḍya Muungu, utsenikuntisa d̯ina!”

⁹Makisa Yesu kamuuza kamwamba, “Sariḍyo ndiwe ga?” Nae kamwambukuya kamwamba, “Sari ḍyangu ndimi ‘Ḍyeshi,’ koro hu wenji.”

¹⁰Kisa kamuyomba Yesu muno atsezipfiika hizi mpepfo nzuka nze ya hiḍe nsi.

¹¹Hafufi na hapfaḍe, kwiwa gwolu nkuu ya nguyuwe iyoikiisa karimani dzuu.

¹²Na hizi mpepfo nzuka zimuyomba Yesu zimwamba, “Huyatse hukawanjie hawaḍe nguyuwe hawaḍe.”

¹³Yesu kaziruhusu, nazo zimuyawa huyuḍe muntu zyenda ziwanjia hawa nguyuwe. Gwolu yonse ya nguyuwe id̯arama kuyawa hapfa yukukani yenda igwa ḅaharini. Na nguyuwe wonse chima cha elefu mbii wafwa madzi tswee!

¹⁴D̯ubva hawa wat̯unga[11] wa hawaḍe nguyuwe kudzaona hivyo, wad̯arama wapfiika maagu mudzini na makondeni. Na wantu wahika kwendayowa haya yahendekeeyo.

¹⁵Wepfofika hapfaḍe pfa Yesu epfokuwa, wamuona huyuḍe muntu eyekuwa na mpepfo nzuka nyinji na nyinji. Wamuona kakaa chihako, kavwaa nguoze na ndiye na akilize nzima! Ndookomu nao wanjijwa ni oga.

¹⁶Kula aoneye haya mafara yahendekeeyo kwa huyuḍe muntu na hawa nguyuwe, kavisumwiiya mwenziwe.

¹⁷Ndookomu hawa wantu waḍabva kumuyomba Yesu ayawe d̯aid̯oni mwao.

¹⁸Yesu akwakunjiani chomboni agonzowe, huyuḍe muntu ayavijwe mpepfo nzuka kamuyomba agijane nae.

¹⁹Ela Yesu kadziza. Ishinu kamwamba, “Uja nyumbani ukawasumwiiye waḅamuzo hayaḍe yonse ya Muungu akuhendeeyeyo na namuna akufwiiyevyo t̯ei.”

²⁰Nae huyuḍe muntu kenda hiḍe ḍanda iyonahanwa “Midzi Kumi,” kendakaḍabva kusumwiiya wantu hivi vya Yesu amuhendeeyevyo. Na wantu wonse wamaka.

²¹Yesu kanjia chomboni kavuka kawii hiḍi ziwa kauja huyombe ayawiyejo. Epfokwojeka, kut̯uut̯aa t̯ut̯a nkuu na nkuu ya wantu imuringiyeo geri ya hiḍi ziwa.

²²Na hapfo kudza mukuu mumodza jwa *sunagogi eyeakihanwa Yairo. Epfomuona Yesu kamugwiya maguuni.

²³Kamuriria kamwamba, “Mwanamuke wangu muḍoḍo ka d̯uru ḍya mwiso! Nakuyomba ukamuweke mikono apate kupfona na aishi.”

²⁴Ndookomu Yesu kanuka pfamodza na Yairo. Na t̯ut̯a nkuu na nkuu ya wantu imuuḅa. Wamuminya na kula ḍanda.

²⁵Humuḍe mwe t̯ut̯a, kwiwa muke eyekuwa na ujwazi wa kukakanyika mwazi. Hu huu ujwazi ewa kamakaa nao kwa myaka kumi na miwii.

²⁶Ewa kasumbuka muno kwenda huku na huku kwa waganga. Jabvawe wonse kawisiya ugangani, ela nkakuhenda weya. Ishinu haliye ihamat̯a kuwa nzuka.

²⁷Hat̯a vivyo, huyu muke ewa kapata maagu dzuu ya Yesu. Ndookomu kamudzia Yesu na nyuma, akiḅaa wantu huku akit̯ara na mojoni akyamba, “Amaa hat̯a nikiḍihora eḍi lot̯aḍye saapfowa?” Na epfomuhora Yesu ḍugha,

²⁹hu mwazi eoakikakanyika ut̯uma pfapfo na kadzisikia kwamba kapfowa!

³⁰Iyo saa Yesu kadzisikia kwamba kayawigwa ni nguvu. Nae kaiperukia hi t̯ut̯a ya wantu na kawauza kawamba, “Ni ga aihoreye e nkanzu yangu?”

³¹Hawa wanafund̯iwe wamwambukuya wamwamba, “Ḅwana nkukwakuonani namuna ya wantu wevyokukuminyani na kula ḍanda? Unakwambadze, ‘Ni ga anihoreye?’ ”

³²Ela Yesu kagija kuyowa-yowa huku na huku amuone huyuḍe amuhoreye.

³³Huyu muke kudzahambuya hivi vimuhendekeeyevyo kadziyavya. Kenda kwa Yesu huku akihehema na oga. Kamugwiya maguuni na kamusumwiiya vyonse vihendekeyevyo.

³⁴Nae Yesu kamwamba, “Maama, faroyo ikupfonya. Enda na naghea, kwisa kupfowa nd̯wariyo!”

³⁵Yesu asidzakwisa kunena, kudza wantu kuyawa nyumbani kwa Yairo na wamwamba Yairo, “Huyu mwanamukeo kesakufwa. Amaale ayu Mwaalimu unamusumbwiiya ḍi?”

³⁶Ela hat̯a pfasipfo kuvifwanya hivi wevyowakinena, Yesu kamwamba Yairo, “Nkudzouwe na shaka, wewe hikiza t̯u!”

³⁷Na akwakwendani kwa Yairo, nkakuyatsa muntu yungine yuḍejwonse amuuḅe, lamud̯a Pet̯ero, Yakobo na Yohana ndugujwe Yakobo.

³⁸Wepfofika nyumbani kwa Yairo, Yesu kat̯onga vilele vya viiyo na kukikintika.

³⁹Kanjia humu nyumbani na kawauza hawa wantu kawamba, “Avi vilele vyonse vya viiyo mvya? Huyu mwanamuke nkakufwa, kakuyaani t̯u!”

⁴⁰Ela wao wamutseka. Yesu kawayavya nze wonse. Makisa kamuhwaa babajwe na mamajwe huyu mwanamuke na wanafund̯iwe wohahu, wanjia humu chumbani mwa huyu mwanamuke emokuwa.

⁴¹Kisa kamugija mukono huyuḍe mwana na kanena nae chikwao kamwamba, “Talitha kumi,” maanaye, “Mwanamuke, yamuka!”

⁴²Iyo saa huyuḍe mwanamuke kanuka, na kaḍabva kudzyenendea. (Huyu mwanamuke ewa na myaka kumi na miwii). Wantu kudzaona hivyo wamaka kuchia chima.

⁴³Yesu kawaseresa watsevimwambia yuḍejwonse hivi vihendekeyevyo. Kisa kawamba wamumpe huyu mwanamuke kintu cha kuḍya.