Read pokomo Luka 1 Bible Online

Luka 1 - pokomo bible

Luka 1

¹Kwa mutsakwa Tofilo: Wantu wenji waḍema kwora dzuu ya hayaḍe mambo yahendekeeyo kahi yehu.

²Wora dza hiviḍe husumwiijwevyo ni hawaḍe wayaoneyeo haya mambo yakwakuhendekani hangu ḍabvu. Hawaḍe wayaoneyeo ndiwo wawaḍe wantu wadziyeo wakilalabva haya maagu.

³Ndookomu, Muhilwa Tofilo, kwa dzambo ḍya kwamba niiyachimiza haya mambo yonse urembo hangu yepfoḍabva, na kuwauza wantu weokuwapfo yepfohendeka, niḍiona t̯aro dzema kwora urembo mambo yahendekeeyo.

⁴Nikworea hivi ili upate maagu ya hachi dzuu ya kula kintu uyongweezejwecho.

⁵Ngera za *Herod̯e epfokuwa haju jwa nsi ya Yud̯aya, kwiwapfo *mukohani mumodza eyeakihanwa Zakaria, ayawiye kit̯aro cha Ukohani cha Abiya. Ewa na muke eyeakihanwa Elizabeti, ayawiye yukoo jwa Mukohani mukuu Haroni.

⁶Wowii wewa wantu wahachi na wamutsakiza Muungu, wakiuḅa amuri na sharia zonse za Ḅwana.

⁷Wewa majarisa, ela ntawakuwa na wana koro Elizabeti ewa nd̯at̯a.

⁸Nsiku modza Zakaria ekihenda kazi ya Ukohani, koro iwa maro ya kit̯aro cha Abiya,

⁹dza ivyokuwa adha ya wakohani kubiga kura kumutsana huyuḍe jwa kufukiza vumba humu *Hekaluni. Maro imugwiya Zakaria nae kanjia kufukizani vumba humu Hekaluni.

¹⁰Epfoakifukiza hiḍi vumba, huku nze t̯ut̯a ya wantu iwa yakuyombani.

¹¹Iyo saa malaika jwa Ḅwana kamut̯upukia Zakaria, na kasumama mukono kuyume wa haya *madhabahu ya kufukizia vumba.

¹²Zakaria epfomuona, mojo umuḅaika na kanjijwa ni oga.

¹³Ela huyu malaika kamwamba, “Zakaria, nkudzoshooge! Muungu kasikia mayombo yako, na mukaziwo Elizabeti kadzakuvyaiya mwanamuyume nawe kudzamuhana Yohana.

¹⁴Wewe na wangine wenji, mudzawa na tsekea iyodze huyu mwana adzepfovyajwa!

¹⁵Yohana kadzawa muntu mukuu usoni kwa Ḅwana. Nkakudzanwa tembo wala kiḍechonse chichonarumisa. Hangu kuvyajwani kwakwe kadzadzazwa na Ruhu Mudheru.

¹⁶Na kadzawahendeza wenji wa wantu wa Isiraeli wamugalie Ḅwana Muungu jwao.

¹⁷Yohana kadzayongowa usoni ya Ḅwana amuelekanyie machiyo yakwe na Ruhu na nguvu dze za Eliya. Kadzawatsanganya wababa na wana wao pfamodza kawii. Kadzawakengeuya wasiomuhikiza Ḅwana kuwa wantu wahachi na kadzawaelekanya wantu t̯ayari kumukaraḅisha Ḅwana.”

¹⁸Zakaria kamuuza huyu malaika kamwamba, “Ni kintu ga cha kunimpa kuhikiza kuvyajwa kwa huyu mwana? Koro ami na mukazangu hujara muno.”

¹⁹Huyu malaika kamwambukuya kamwamba, “Mimi ni Gabrieli niyenasumama usoni kwa Muungu. Kanihuma nikuyeheye haya maagu mema.

²⁰Ela t̯ayowa, kwa kwamba nkukuhikiza hi ḍaamisa ya hachi nikwambiiyeyo, nawe unawa ḅuḅwi, nkukudzaweza kunena hat̯a yadzepfot̯imia.”

²¹Hiḍe t̯ut̯a ya wantu imuinda Zakaria huku wakimamat̯a kwamba chichokumuwekani amuḍe *Hekaluni ni kintu ga.

²²Epfoyawa huku nze, nkakuweza kut̯amuka chuuwo anene nao. Ishinu kanena nao kwa kuwabigia peni. Ndookomu wahambuya kwamba kat̯ongana na dzambo.

²³Maro ya Zakaria ya kuhenda kazi Hekaluni ipfosiya, kauja nyumbani kwakwe.

²⁴Ntakikuchia kit̯emo kiyeya, Elizabeti mukaza Zakaria kamiha. Kadzifitsa nyumbani myezi mitsano pfasipfo kuyawa nze.

²⁵Makisa kamba, “Ni t̯ei ga ya Muungu eyonayo kwangu hat̯a anihendeze nipate mwana? Hiḍi ni dzambo ḍya wantu weḍyowakinibalifa naḍyo muno, koro niwa sidzavyaa mwana!”

²⁶Ipfofika mwezi wa handahu wa mimba ya Elizabeti, malaika Gabrieli kahumwa ni Muungu ende mudzi wa Nazareti wiwo nsi ya Galilaya.

²⁷Humuḍe mudzini kwiwapfo mwanamuke galit̯ama eyeakihanwa Maria. Maria ewa kamanyana na muntu eyeakihanwa Yusufu ayawiye sindo wa haju D̯aud̯i.

²⁸Malaika akimudzia kamwamba, “Kwa naghea nto muvodhyegwa! Ḅwana ka pfamodza nawe.”

²⁹Hi kedhya ya malaika imuhusya Maria muno hat̯a kaḍabva kumamat̯a maanaye.

³⁰Kenge malaika kamwamba, “Nkudzoshooge Maria, koro Muungu katsakizwa nawe.

³¹Ndookomu kudzamiha, na kudzavyaa mwanamuyume na sariḍye kudzamuhana Yesu.

³²Kadzawa mukuu na kadzahanwa Mwana jwa Muungu awee dzuu. Ḅwana Muungu kadzamumpa uhaju dza wa bibijwe D̯aud̯i.

³³Kadzawa haju jwa wantu wa Isiraeli maishi na uhajuwe ntaukudzasia.”

³⁴Maria kamwambukuya huyu malaika kamwamba, “Mimi ni mwanamuke galit̯ama. D̯ubva haya haya yanawadze, nami sidzi muyume?”

³⁵Huyu malaika kamwambukuya kamwamba, “Ruhu Mudheru kadzakusukia, na nguvu za Muungu awee dzuu zinakufinikiza dza kivwii. Na huyu mwana adzeyevyajwa anawa mudheru, na anahanwa Mwana jwa Muungu.

³⁶T̯ayowa, hat̯a mwenziwo Elizabeti ahanijwee nd̯at̯a hi hii saasambi ana mimba ujarisumeani mwakwe. Na hu ni mwezi wakwe wa handahu.

³⁷Koro kwa Muungu ntaku kisichowezekana.”

³⁸Ndookomu Maria kamba, “Mimi ni kikitu jwa Ḅwana, nayanihendekeye dza uneneyevyo.” Maria epfokwisa kunena hivyo huyuḍe malaika kagonzowa.

³⁹D̯ubva Maria kanuka na rebvu kwenda mudzi wa mirimani wiwokuwa nsi ya Yud̯aya.

⁴⁰Epfofika kanjia nyumbani mwa Zakaria na kamukedhya Elizabeti.

⁴¹Mweedha Elizabeti epfosikia kedhya ya Maria, huyu mwana humu humboni katsumpa. Nae Elizabeti kadzazwa Ruhu Mudheru,

⁴²na kaḍabva kunena na idzwi kuu kamba, “Muungu kakuvodhya kuchia wake wonse, na huyu mwana udzeyevyaa nae pia kavodhyegwa!

⁴³Ami ni ga, hat̯a mama jwa Ḅwana jwangu anidzie mimi?

⁴⁴Koro nipfosikia kedhya yako t̯u, huyu mwana katsumpa na tsaiko mahumboni mwangu.

⁴⁵Tsekea nzako, awe userefat̯ie kwamba haya wambiijweyo ni Ḅwana yadzat̯imia ḍugha!”

⁴⁶Maria kanena kamba, “Mojo wangu unamukuzya Ḅwana,

⁴⁷na ruhu yangu itsaika. Nina tsekea kwa dzambo ḍya Muungu mupfonya jwangu,

⁴⁸kwa dzambo ḍya kwamba kanivodhya, mimi niiye kikituche kachuchu. Koro hangu hi hii saasambi, vivyazi vyonse wadzanihana, ‘Muvodhyegwa.’

⁴⁹Koro Muungu mwenye nguvu kanihendea makuu, na jeje nka mwenziwe eyenaingana nae.

⁵⁰Nansoye inawa kwao wonse weonamushooga, hangu kivyazi hat̯a kivyazi.

⁵¹Kahenda mambo makuu na mukonowe, kawad̯achasa hawaḍe weonadziona kwa dzambo ḍya haya weyokumamat̯ani myojoni mwao.

⁵²Kawanuya mahaju wenye nguvu uhajuni mwao, na kawakuzya hawaḍe weo wachuchu.

⁵³Weo nzaani kawakusya na mambo mema mema, na majabva kawayavya mikono mihupfu.

⁵⁴Muungu kat̯imiza ḍamanoḍye kwa wabibi zehu, na kamumpa ugijo Isiraeli muhumisi jwakwe.

⁵⁵Kakumbuka nansoye kwa Iburahimu na kivyazi chakwe chonse mumpaka mwiso dza evyowambia wabibi zehu hangu kae.”

⁵⁶Makisa Maria kakaa hafufi myezi mihahu kwa Elizabeti, ndipfo akigala nyumbani kwakwe.

⁵⁷Ipfofika nsiku ya kudzifunguya, Elizabeti kavyaa mwanamuyume.

⁵⁸Wantu wa hafufi na wa sindowe wepfopata haya maagu ya kuvyajwa huyu mwana, wonse watsekea nae. Waiona nanso ya Muungu kwakwe.

⁵⁹Ipfofika nsiku ya nane hangu kuvyajwani, wantu wadza kumuhinya. Wetsaka kumuhuna sari ḍya babajwe, Zakaria.

⁶⁰Ela mamajwe kawambukuya kawamba, “Sivyo! Ni kuhanwa Yohana.”

⁶¹Hawaḍe wantu wamwamba, “Ela ntaku yuḍejwonse sindoni mwenu awee na sari ḍya Yohana!”

⁶²Makisa wamuuza na vihambwiizo babajwe, wakilacha kumanya atsakiyevyo kumuhana huyu mwana.

⁶³Ndookomu Zakaria kaḍama kiḅao cha kworea na kora kwamba, “Sariḍye ni Yohana.” Na wonse wamaka.

⁶⁴Iyo saa kaḅajwa kanwake, jwiimijwe jufunguka na kaḍabva kumushad̯a Muungu.

⁶⁵Wantu weoishi hafufi wonse washooga. Na maagu ya mambo haya yahendekeeyo yad̯achaa midzi iyo mirimani mwa Yud̯aya yonse.

⁶⁶Wonse wayasikiiyeo haya wayamamat̯a, wakidziuza wakyamba, “Ayu mwana kadzawadze?” Koro Ḅwana ewa nae.

⁶⁷Zakaria, babajwe Yohana kadzazwa Ruhu Mudheru na kanena hayaḍe ya Muungu eyotsaka anene. Kamba,

⁶⁸“Ḅwana Muungu jwa Isiraeli ashad̯we, koro kadzia kuhugija swiswi hwiwo wantuwe.

⁶⁹Kahuyehea mupfonya eye jangina, ayawiye nyumba ya D̯aud̯i muhumisi jwakwe.

⁷⁰Dza aneneevyo hangu kae kuchiiya na kwa manabii wakwe.

⁷¹Kwamba anahupfonya kuyawana na nyabva wehu, na wantu wonse wahukeveyeo.

⁷²Kamba anahuyanga nansoye kwa wabibi zehu, na anat̯imiza ḍamano ḍyakwe ahendeyeḍyo nao.

⁷³Kamuyapfia bibi jwehu Iburahimu,

⁷⁴kwamba anahupfonya kuyawa kwa nyabva wehu, na ahupfe kumuhumikia pfasipfo oga wa nyabva wehu.

⁷⁵Kanena hivi ili huweze kuishi na Muungu maishi, na hudziyavye kwakwe kwa kuhenda miroye.

⁷⁶Nawe mwanangu, unahanwa *nabii jwa Muungu awee dzuu. Unamuyongowa Ḅwana kuimuelekanyia njiaye.

⁷⁷Kudzawambia wantuwe kwamba Muungu anawayatsia nabvise zao, koro ndivyo adzevyowapfonya.

⁷⁸Koro Muungu jwehu ni mumpowe na munanso. Anahuyeheya mupfonya adzeewa dza dzuwa, ḍiḍyokutsembuzani kwehu.

⁷⁹Ḍiwayangaiye wantu wonse, waringijweo ni kiza cha kufwa, ili ahuyongowe kwiko machiyo ya naghea.”

⁸⁰Ndookomu huyu mwana kakuya na kenjipfa na nguvu za kimwii na za kiruhu. Kakaa yuwandani hat̯a nsiku adzeyoakidzihambwiiza kwa wantu wa Isiraeli na kuwasumwiiya chuuwo cha Ḅwana.