Read pokomo Luka 14 Bible Online

Luka 14 - pokomo bible

Luka 14

¹Nsiku modza ya *Sabato, Yesu kenda kuḍyani chakuḍya nyumbani mwa mumodza jwa wakuu wa *Mafarisayo. Na wantu wamuchimiza waone adzechohenda.

²Usoni pfa Yesu kwiwa muntu avimbie-vimbie hu mwii.

³Yesu kawauza Mafarisayo na waalimu wa *Sharia kawamba, “Sharia yehu ihuseresa kupfonya na nsiku ya Sabato ambu hat̯a?”

⁴Ela wao ntawakumwambukuya chuuwo. Ndookomu Yesu kamugija, kamupfonya, na kamugonzoza.

⁵Makisa kawaperukia kawamba, “Ikiwa kwamba mumodza jwenu ana mwana ambu ngombe igwiyeyo kisimani na nsiku ya Sabato, nkawezi kwenda akaiyavye kwa dzambo kakushoogani kuhenda kazi na nsiku ya Sabato?”

⁶Ela ntawakuweza hat̯a kumuḅaiya kanwa.

⁷Yesu epfowaona wageni wakwakutsanani kukaa viti vya usoni usoni, kawambia hiḍi inganyo hiḍi:

⁸“Ukihanigwa kwa jila ya harusi, nkudzokae kiti cha usoni. Koro kutseewa kwamba kuhanwa muntu mukuu kukuchia wewe,

⁹hat̯a huyuḍe amuhaniye nyowii adzeakwambe, ‘Muyatse huyu akae hapfa.’ D̯ubva unalacha pfantu pfa nyuma pfa kukaa usipfopfatsaka huku ukiwa na yutswa.

¹⁰Ishinu ukihanwa kwa jila ya harusi, enda ukakae nyuma, ili huyu akuhanie adzeakwambe, ‘Ḅamu, dzikuntie hapfaḍe usoni.’ Ndookomu kudzawa na hila usoni ya wageni wangine wonse.

¹¹Koro kula adzikuzie kadzasuswa nsi, na kula adzisusie nsi kadzakuzwa.”

¹²Makisa Yesu kamwambia huyuḍe muntu amuhaniye kamwamba, “Ukielekanya chakuḍya cha musikahi ambu cha mioro nkudzohane waḅamuzo, ambu wanduguzo ambu wantu wa sindowo nolawe wantu majabva mwiokukaani hafufi nao. Koro nao wanakuhana, na kukuipfa uwahendeyeo.

¹³Wipfonawa na jila, hana makowesa, virema, vihewi na ntumbu matso.

¹⁴Nawe unavodhyegwa, hat̯a ikiwa kwamba ntawa kintu cha kukuipfa. Koro Muungu kadzakuipfa nsiku ya kufufujwa hawaḍe wamuhikiziyeo.”

¹⁵Mumodza jwa hawaḍe wantu wakaiyeo kuḍyani epfosikia haya, kamwamba Yesu, “Wadzawa na tsekea nkuu muno hawaḍe wadzeokaa kuḍyani jila ya Uhaju wa Muungu.”

¹⁶Yesu kamwambukuya kamwamba, “Muntu mumodza kahenda jila nkuu, ahaniiyeo wantu wenji.

¹⁷Saa ya jila ipfofika, kahuma muhumisijwe kwendawamba wageni, ‘Nzoni jilani, koro kula kintu cha t̯ayari.’

¹⁸Ela wonse waḍabva kuyavya vipfangizo. Jwa d̯ura kamwamba huyuḍe muhumisi, ‘Niguya nkonde, nami ni had̯i nyende nikaid̯oye, ndookomu sipate kudza.’

¹⁹Yungine kamwamba, ‘Niguya ngombe kumi za kuimia, nami nyendaziḍema, sikwakupata kudza.’

²⁰Na yungine kamwamba, ‘Nihwaa muke si hat̯a kae, ndookomu sinaweza kudza.’

²¹D̯ubva huyuḍe muhumisi kauja kenda kamwambia ḅwana jwakwe hayo yonse. Mwenye nyumba kareja na kamwamba huyu muhumisijwe, ‘Rebva wende njia nkuu na ndoḍo za mudzi, ukawahane makowesa, virema, ntumbu matso na vihewi.’

²²Na kapfachu, huyu muhumisi kadza kamwamba, ‘Ḅwana, uneneeyo yesakuhendwa, ela amaale kuna namfasi.’

²³Ndookomu huyu ḅwana kamwambia kawii huyu muhumisi, ‘Enda njia zonse za mudzi na mipfakaye ukawasharut̯ise wantu wadze ili nyumba yangu idzae.

²⁴Koro nyakumwambiani kwamba ntaku hat̯a mumodza jwa hawa wageni weohanwa d̯ura adzeekit̯at̯a hichi chakuḍya changu.’ ”

²⁵Vit̯aro vikuu vya wantu viwa kumuuḅani Yesu. Nae kawaperukia kawamba,

²⁶“Yuḍejwonse atsakiye kuniuḅa na kuwa mwanafund̯i jwangu, ni had̯i anitsake mimi kuchia babajwe na mamajwe, mukaziwe na wanawe, wanduguzwe na waimbuzwe na hat̯a maishaye mwenye.

²⁷Yuḍejwonse asiyeutsukuya muhiwe wa mpatsa na kuniuḅa mimi, huyo nkawezi kuwa mwanafund̯i jwangu.

²⁸Ni ga kahi yenu eyenaweza kumbaka nyumba pfasipfo kukaa chihako nguzi, ayowe kwamba ana vija vya kut̯osa kumbakia?

²⁹Koro akitsahenda dzavyo, anaweza kuimbaka hi nyumba hat̯a ikifika kahikahi vija vya kumbakia vimusiiye nae atseweza kuisa. Na wantu wanaḍabva kumutsezea

³⁰wakyamba, ‘Muntu huyu kaḍabva kumbaka ela nkakuweza kwisa.’

³¹Ambu ni haju ga, awee kwendani kujwanani viha na haju yungine, asikaa chihako nguzi ayowe kwamba wantuwe elefu kumi wanawaweza wantu elefu miyongo miwii wa huyuḍe haju mwenziwe?

³²Akiona kwamba nkawezi, anamuhumia wantu wamut̯angere huyuḍe haju asidzafika hafufi, wahende mashauri ya kungiza naghea.

³³D̯ubva ntaku mumodza jwenu adzeeweza kuwa mwanafund̯i jwangu pfasipfo kujibat̯a yonse eyonayo.”

³⁴Yesu kongeza kunena kamba, “Munyu ni mwema. Ela munyu ukitsowa hukuḍe kutsama wikonamala kuwa nako, unahendegwadze ili upate kutsama dza munyu kawii?

³⁵Unawa kwamba ntaufae kwa kuhendea kiḍechonse, ndookomu unakwihigwa dhaka. D̯ubva awee na masikio ya kusikiiya, nasikiye!”