Read pokomo Luka 15 Bible Online

Luka 15 - pokomo bible

Luka 15

¹Nsiku modza, *wahwaa kuwa wenji na wantu wanabvise wadza kusikiiya mayongweezo ya Yesu.

²*Mafarisayo na waalimu wa *Sharia waḍabva kuḅuguma-ḅuguma wakyamba, “Huyu muntu huyu anakaa na kuwakaraḅisha wanabvise na kuḍya hat̯a nao le!”

³D̯ubva Yesu kawasumwiiya inganyo kawamba,

⁴“Ikiwa kwamba mumodza jwenu ana mbuzi gana, na modza imwaaria, anahendadze? Nkanaziyatsa azi miyongo kenda na kenda yuwandani anakwendailacha ai mbuzi yaarieyo mumpaka aione?

⁵Akiiona anaipfaza kit̯uroni na tsekea,

⁶na anauja nayo. Akifika nyumbani anahana waḅamuzwe na ḍyiraniwe anawamba, ‘Tsekeani pfamodza nami koro hi mbuzi yangu iyokwaara niiona.’

⁷Vivyo, idzawa tsekea nkuu mbinguni kwa munabvise mumodza apfyehuziye mama kuliko kwa wahachi miyongo kenda na kenda wasioona kwamba iwamala kupfyehuza mama.”

⁸Yesu kongeza kunena kamba, “Ambu nahuhwaiye kwamba kuna muke eye na makuruḅembe[35] kumi ya fwedha. Akyaara kuruḅembe modza, anagiza tsaa, anaipfea nyumbaye na kuḍilacha mumpaka aḍione.

⁹Akiḍiona, anawahana waḅamuzwe na maḍyirani wakwe na anawamba, ‘Tsekeani pfamodza nami, koro niḍiona hiḍi kuruḅembe ḍyangu ḍya fwedha ḍiḍyonyaaria.’

¹⁰Dza vivyo, malaika wa Muungu wanatsekea kwa dzambo ḍya munabvise mumodza apfyehuziye mama.”

¹¹Yesu kongeza kunena amaale kamba, “Kwiwa muntu mumodza eyekuwa na wana wawii.

¹²Huyu mwana muḍoḍo kamwamba ise, ‘Baaba, nimpa sehemu yangu ya hu uḍalo wangu usidzafwa.’ Ndookomu muntu huyo kawagawiya wanawe maliye.

¹³Zipfochia nsiku kachuchu, huyuḍe mwana muḍoḍo kaguza uḍalowe, makisa kanuka kenda nsi ya kuye. Hukuḍe, kenda kananga-nanga maliye yonse.

¹⁴Epfotumia kula echokuwa nacho, hiḍe nsi yonse injijwa ni nzaa nkuu muno na hat̯a nae kaḍabva kufwa nzaa.

¹⁵Ndookomu kenda kadziyavya kumuhendea kazi muntu mumodza jwehiḍe nsi. Nae kamupfiika nkondeni, kwendat̯ikisa nguyuwe.

¹⁶Nzaa ipfomuhamat̯ia kat̯amani kuḍya hichi chakuḍya cha nguyuwe. Ela ntaku muntu amumpiye kiḍechonse.

¹⁷Akili zipfomupfenuka, kamamat̯a kamba, ‘Amaa ni wahumisi wengaa wa baba weokuḍyani na kusaza? Ami huku nyakudzifwiani nzaa ḅasi?

¹⁸Nakwenda kwa baba nikamwambe: Baaba, nihenda nabvise kwa Muungu na kwako.

¹⁹Sinamala hat̯a kuhanwa mwanao kawii. Nihwaa dza mumodza jwa wahumisiwo.’

²⁰D̯ubva kanuka kuuja kwa babajwe. Asidzafika hafufi na nyumbani, babajwe kamuona na jwa kuye. Kamufwiya t̯ei muno. Kamud̯aramia kenda kamurhampika na kamunonea.

²¹Huyuḍe mwana kamwamba, ‘Baaba, nihenda nabvise kwa Muungu na kwako pia. Sinamala hat̯a kuhanwa mwanao kawii.’

²²Ela ise kawamba wahumisiwe, ‘Rebvani haraka mukaḍiyehe hiḍiḍe lot̯a dzema ḍya mwiso, muḍimuvwike. Muvwikeni na t̯ele ḍoweni mwakwe na mumuvwike na viyahu maguuni mwakwe.

²³Kisa yehani mwanangombe munono mumutsinze, na huḍye hutsaike.

²⁴Koro huyu mwanangu ewa kafwa, ela sasa kafufuka. Ewa kaara, ela sasa kaonekana.’ D̯ubva jila iḍabva.

²⁵Haya yonse yahendeka huku mwanawe hangafa akiwa ka nkondeni. Galichumea yakwe, epfofika hafufi na nyumbani kasikia misindo ya ngoma na kuvina.

²⁶D̯ubva kahana mumodza jwa hawa wahumisi kamuuza kamwamba, ‘Munamba kuna?’

²⁷Nae kamwamba, ‘Huyu ndugujo kauja nyumbani, d̯ubva babajo kamutsinzia mwanangombe munono, kwa kwamba kagala akiwa muzima.’

²⁸Huyuḍe mwana hangafa kareja hat̯a nkakutsaka kunjia nyumbani. Ndookomu babajwe kayawa na kanena nae anjie.

²⁹Kenge jeje kamwambukuya ise kamwamba, ‘T̯ayowa myaka yonse hii nikuhumikia dza muhumwa, na sikukutsowea na kiḍechonse. Ela nkukunimpa hat̯a mwana mbuzi, nipate kutsekea na waḅamu zangu.

³⁰Ela huyu mwanao anangie-nangie maliyo na mashudha makisa akiuja nyumbani, kumutsinzia huyu mwanangombe munono!’

³¹Ise kamwamba, ‘Mwanangu, wewe kwa pfamodza nami nsiku zonse, na vyonse nivyonavyo, mvyako.

³²Ni hachi kuhenda jila na kutsekea, koro niit̯ara ya kwamba huyu ndugujo ewa kafwa, ela katsi ka mojo. Ewa kaara ela sasa kaonekana.’ ”