Read pokomo Luka 16 Bible Online

Luka 16 - pokomo bible

Luka 16

¹Kawii Yesu kawamba wanafund̯iwe, “Kwiwa muntu jabva mumodza eyekuwa na musumamizi jwa maliye. Huyu muntu kapata mfunyenye kwamba musumamizi jwakwe kakunangani-nangani maliye.

²D̯ubva kamuhana kamwamba, ‘Aya ya wantu weyokunenani dzuuyo ni ḍugha? Natsaka uyange namuna wivyoukiyasumamia haya mali yangu, koro nkunamala kuwa musumamizi jwangu kawii.’

³Huyu musumamizi kamamat̯a mojoni mwakwe kamba, ‘Sasa nihendedze nae huyu Ḅwana jwangu njwakuniyavya kazini? Ninkidziyowa, kuima siwezi na kuyomba naona yutswa.

⁴Sasa nimanya vya kuhenda, ili nidzepfoyavigwa kazini, niwe na waḅamu wadzeonihana makwao.’

⁵Ndookomu kawahana wantu wonse weokuwa na marando kwa huyu ḅwana jwakwe. Kamuuza jwa d̯ura kamwamba, ‘Una rando ḍya chima ga kwa ḅwana jwangu?’

⁶Jwa d̯ura kamwambukuya kamwamba, ‘Mad̯aḅa gana ya mafuha.’ Huyu musumamizi kamwamba, ‘Hwaa chet̯i chako, rebva ukae chihako na ora kwamba una rando ḍya mad̯aḅa miyongo mitsano ya mafuha.’

⁷Makisa kauza yungine, ‘Ehe nawe, una rando ḍya chima ga?’ Nae kamwambukuya kamwamba, ‘Mizigo gana ya nganu.’ Huyuḍe musumamizi kamwamba, ‘Chet̯icho hichi, ora mizigo miyongo minane ya nganu.’

⁸Ndookomu huyuḍe muntu jabva kamushad̯a kwa karowe ahendeyeo. Koro wantu wa lumwengu huju ni makaro kwa kuhenda mambo yao, kuliko wantu wa Muungu waivyo kwa kuhenda mambo ya Muungu.”

⁹Makisa Yesu kongeza kunena kamba, “Nyakumwambiani, dzilachieni waḅamu na fwedha za lumwengu huju, ili zidzepfomusiiya muhanwe makaoni mwa maishi.

¹⁰Yuḍejwonse eyenahikizika na mambo maḍoḍo maḍoḍo anahikizika hat̯a na mambo makuu makuu. Na yuḍejwonse asihikizika na mambo maḍoḍo maḍoḍo, nkanahikizika na mambo makuu makuu.

¹¹D̯ubva ikiwa kwamba ntamunahikizika na ujabva wa lumwengu huju, munahikizikadze na ujabva wa ḍugha wa Muungu eonapfa wantu?

¹²Na mukitsahikizika na ujabva wa muntu yungine, adzeemumpa yeyo yenu ni ga?”

¹³Yesu kagija kuyongweeza kamba, “Ntaku muhumwa eyenaweza kuhumikia maḅwana wawii kwa mweedha mumodza. Koro anamutsaka mumodza, na anamukeva huyu yungine. Ambu anamuhumikia mumodza na mojowe wonse, ela anamunyira huyu yungine. Ndookomu nichokunenani ni kwamba, nkuwezi kumuhumikia Muungu na kuhumikia fwedha.”

¹⁴*Mafarisayo wepfosikia haya yonse, wamubalifa, koro wewa wantu watsakiyeo fwedha.

¹⁵Ela Yesu kawamba, “Ndinywi mwiwonadzihendeza kuwa wahachi usoni ya wantu, ela Muungu kamumanya hat̯a myojo yenu. Koro cha wantu wechonahwaa dza kintu chikuu, ni t̯ukio usoni kwa Muungu.”

¹⁶Yesu kongeza kunena kamba, “Zisidzafika ngera za Yohana Mut̯opya, *Sharia ya Musa na matsoro ya manabii ndiyo yeyoyakisumwiijwa. Na hangu hizihiziḍe ngera haya *Maagu Mema ya Uhaju wa Muungu yakusumwiijwani, na wantu wenji na wenji wakungizani hiḍu kunjia Uhajuni.

¹⁷Ni vivodho kwa mbingu na nsi kusia, kuliko hat̯a katsoro kamodza ka hi Sharia kwaara.

¹⁸Kula amuyatsiyee mukaziwe na akihwaa muke yungine, huyo anawa kwamba kanjia rangani. Na yuḍejwonse ahwaiye muke ayatsijwee ni muumewe, nae pia anawa kwamba kanjia rangani.”

¹⁹Yesu kongeza kunena amaale kamba, “Kwiwa muntu jabva mumodza atsakiye kuvwaa nguo ghali ghali. Muntu huyu kaishi kimad̯aha kula nsiku.

²⁰Kwiwa na muntu mumodza kowesa eyeakihanwa Lazaro. Huyu ekijwaa virango mwii muzima. Na jeje ekikaa na kupfiikwa muḍyangoni mwa huyu muntu jabva,

²¹kuyoweeya kupata muharachao wa chakuḍya cha huyuḍe muntu jabva. Hat̯a chughe nazo zikidza na kumulamba-lamba hivi virangovye.

²²Mwiso huyuḍe kowesa kafwa. Malaika wamupfiika kukaani pfamodza na Iburahimu. Makisa huyuḍe muntu jabva nae kafwa na kazikwa.

²³Epfoakioneswa tsungu mukali hukuḍe wahira,[36] kanuya matso dzuu na kamuona Iburahimu na kuye na Lazaro akiwa geri yakwe.

²⁴D̯ubva kahana kamba, ‘Ee baba Iburahimu, nifwiya t̯ei. Muhume Lazaro, at̯opye nsa ya ḍoweḍye madzini, anipfoze jwiimi jwangu, koro nyakuoneswani tsungu muno humu mohoni.’

²⁵Ela Iburahimu kamwamba, ‘Mwanangu, kumbuka kwamba wewe kupfegwa memayo yonse maishani mwako, huku Lazaro akipata mazuka menji. Ela sasa jeje kakuingamazwani huku awe ukioneswa tsungu.

²⁶Kwongezeya hayo yonse, kuna pfangapfanga kuu kahi yehu nanywi. Ndookomu watsakiyeo kuvuka kudza kwenu ntawawezi, na yuḍejwonse atsakiye kuvuka kuyawa huko kwenu adze kwehu nkawezi.’

²⁷Huyuḍe muntu kamwamba, ‘D̯ubva nakuyomba, baba Iburahimu, umuhume Lazaro nyumbani mwa baba,

²⁸kwiko na wandugu zangu watsano. Awasumwiiye watsekudza huku kuntu kwa tsungu huku.’

²⁹Iburahimu kamwamba, ‘Wanduguzo wana Sharia za Musa na matsoro ya manabii wangine. D̯ubva nawayagije hayo hayo.’

³⁰Huyuḍe muntu jabva kamwambukuya kamba, ‘Moro baba Iburahimu, hivyo ntavit̯ose. Ela wakihumijwa muntu kuyawa wafuni, wanapfyehuza mama.’

³¹Kenge Iburahimu kamwamba, ‘Wakitsahikiza vyuuwo vya Musa na manabii wangine, ntawawezi kupfyehuza mama hat̯a ikiwa kwamba kufufuka muntu kuyawa kwa wafu.’ ”