Read pokomo Luka 17 Bible Online

Luka 17 - pokomo bible

Luka 17

¹Yesu kawamba wanafund̯iwe, “Saa zonse kuna maḍemo ya kungiza wantu nabviseni, ela kadzawa na d̯ina iyodze muntu adzeeyeha haya haya maḍemo!

²Vindeewa urembo t̯ambere huyo huyo muntu andefungwa iwe ḍya kupaazia ot̯ini na angukijwe ḅaharini kuliko, kuyatswa ahendeze mumodza jwa hawa wachuchu hawa agwe nabviseni.

³D̯ubva dzit̯unzeni! Ndugujo akikutsowea mweere, na akigwa matsowa, muyatsie.

⁴Hat̯a akikutsowea myeedha mifungahe kwa nsiku modza, na kula mweedha akikuujia akikwamba, ‘Nitsowa.’ Ni had̯i umuyatsie.”

⁵Makisa hawa *ntumi wamwamba Yesu, “Ḅwana, hwongeze faro yehu.”

⁶Ela Yesu kawambukuya kawamba, “T̯ambere mundeewa na faro hat̯a iyo ndoḍo dza mbeju ya tsare, mundeweza kuwambia hu mukuju huu, ‘Kuka na mizini na ukameye ḅaharini!’ Nao undemusikia.”

⁷Yesu kongeza kunena na wanafund̯iwe kamba, “Ikiwa kwamba mumodza jwenu ana muhumisi awee kuimani ambu kut̯ikisani mbuzi, akiuja na nkondeni ambu mat̯ungoni, anamwamba arebve aḍye nguzi chakuḍyache?

⁸Hat̯a! Ishinu, anamwamba, ‘Nielekanyia chakuḍya, na udzifunge kunihumikia ninkiwa kuḍyani na kunwa. Kisa nawe uḍye chakuḍyacho.’

⁹Ayu ḅwana anamuyaviza asant̯a ayu muhumisi kwa kuhenda aya amwambiyeo ahende?

¹⁰Dza vivyo nanywi mukihenda mwambiijweyo, ambani, ‘Hangu d̯ura hu wahumwa, na huhenda haya yahumaliyeo kuhenda t̯u.’ ”

¹¹Yesu epfokuwa charoni kwenda Yerusalemi, kavuka na mumpakani mwa Galilaya na Samaria.

¹²Epfokuwa hafufi kunjia mudzi mumodza, Yesu kat̯ongana na wantu kumi weokuwa na kwanga. Wasumama na jwa kuye

¹³na wamukulisa wamwamba, “Yesu, Ḅwana, hufwiye t̯ei!”

¹⁴Yesu kawayowa makisa kawamba, “Endani mukadziyanganye kwa wakohani.” Wepfowakyenda kwa wakohani, wadziona kwamba wadhereka na ntawa kwanga kawii.

¹⁵Mumodza jwao epfodzihambuya kwamba kapfonywa, kauja kwa Yesu, huku akimushad̯a Muungu na idzwi kuu.

¹⁶Kamugwiya Yesu maguuni kamuyavia ḍuḍa. Huyu huyu muntu ewa Musamaria.

¹⁷Makisa Yesu kamba, “Kwiwa wantu kumi wapfonyejweo, awa kenda wendaa?

¹⁸Kut̯i ni huyu mugeni jeje heket̯u aujie kumuyaviza Muungu ḍuḍa?”

¹⁹Ndookomu Yesu kamwamba, “Nuka wende, faroyo ikupfonya.”

²⁰*Mafarisayo wangine wamuuza Yesu kwamba Uhaju wa Muungu unakudza ari. Nae kawambukuya kawamba, “Uhaju wa Muungu ntonakudza na njia ya kuonekana na matso hat̯a.

²¹Na wala ntaku jwa kwamba, ‘T̯ayowa, hu Uhaju wa Muungu huuno hapfa!’ Ambu ambe, ‘Huuḍe hapfaḍe!’ Koro Uhaju wa Muungu wa kahi yenu.”

²²Makisa Yesu kawambia wanafund̯iwe, “Ngera zidzakudza, mudzepfot̯amani kuniona mimi *Mwana jwa Ad̯amu, ela ntamukudzaniona.

²³Kudzawa hawaḍe wadzeomwamba, ‘T̯ayowa, huyuḍe hapfaḍe!’ Ambu wamwambe, ‘T̯ayowa huyuno hapfa!’ Ela namutsehikiza muyawe kunilachani.

²⁴Koro dza hiviḍe vya yupfepfe jwivyonamwala jukayangaza lumwengu yuzima, ndivyo vidzevyowa, mimi Mwana jwa Ad̯amu nidzepfokudza.

²⁵Ela d̯ura had̯i nguzi nioneswe tsungu muno na kudzizwa ni wantu wa hizi hizi nsiku.

²⁶Ngera ya kudza kwa Mwana jwa Ad̯amu, wantu wadzahendeka dza hiviḍe wevyohendeka ngera ye zuruwa ya Nuhu.

²⁷Wantu wewa wakaiya raha ya lumwengu: Kuḍya na kunwa, kuhwaa wake na kuyoza wanawake wao, mumpaka hiḍe nsiku ya Nuhu anjiiyeyo humuḍe Safinani, na zuruwa ikidza ikiwayaga wonse.

²⁸Vivyo, vidzahendeka dzeziḍe ngera za Loti. Kula muntu ewa kagija kuḍya na kunwa, kuguya na kuguza, kuhodza na kumbaka.

²⁹Ela nsiku ya Loti ayawiyeo Sod̯oma, Muungu kasusya moho, uhikiyeo dza mvuya ya mawe kuyawa mbinguni na uwayaga tswee.

³⁰Hivyo ndivyo vya wantu wadzevyohenda hat̯a nsiku yangu mimi Mwana jwa Ad̯amu nidzepfokudza.

³¹Hiyo hiyo nsiku, huyuḍe adzeewa paani[37] dzuu, natsesuka anjie nyumbani akahwae vijavye. Dza vivyo, muntu awee nkondeni natseuja nyumbani.

³²Kumbukani yamuhendekeeyo mukaza Loti!

³³Yuḍejwonse alachie kuyapfonya maishaye, anadzitsovya maisha ya kuunga na yuungo. Ela huyuḍe eye t̯ayari kudzitsovya maishaye ya lumwenguni, anadziwekea maisha ya kuunga na yuungo.

³⁴Nyakumwambiani, siku huo, kunawa wantu wawii weokuyaani t̯at̯a modza, mumodza anahwajwa na yungine anahafa.

³⁵Wake wawii wadzawa kupaazani pfamodza. Mumodza kadzahwajwa na huyu yungine kadzayatswa. [

³⁶Wayume wawii wadzawa kuimani nkondeni, mumodza anahwajwa, na yungine anayatswa.]”[38]

³⁷Makisa wanafund̯iwe wamuuza wamwamba, “Yanahendeka ku, Ḅwana?” Yesu kawambukuya kawamba, “Kula kwipfo na kivimba, makutsu yanaundukizika hapfo hapfo.”