Read pokomo Luka 18 Bible Online

Luka 18 - pokomo bible

Luka 18

¹Makisa Yesu kawambia wanafund̯iwe inganyo ḍya kuwayongweeza kuyomba meshi pfasipfo kudhimwa.

²Kawamba, “Kwiwa t̯oibi jwa mudzi mumodza asimushooga Muungu, nolawe kumuḍyali muntu.

³Na mumo mudzini kwiwa muke muchiwa eyesindiiya kumwendea huyu t̯oibi akilacha hachiye, akimwamba, ‘Nipfonya na huyu muntu niiye na d̯ubi nae.’

⁴Huyuḍe t̯oibi kadziza kwa muḍa muyeya, ela mwisowe kamamat̯a mojoni mwakwe, kamba, ‘Hat̯a ninkitsamuḍyali Muungu ambu muntu yuḍejwonse,

⁵had̯i nimuhendeye hachi huyu muke huyu kwa kwamba kakunisumbuwani muno. Na ninkitsahenda hivyo, ananitsovya nsoho.’ ”

⁶Makisa Yesu kongeza kuwambia wanafund̯iwe, kamba, “Avi vya ayu t̯oibi muzuka aneneyevyo muviimuka urembo?

⁷Jeje t̯u akihenda dzavyo, ehe fat̯i Muungu, nkanawahendea hachi hat̯a awa wantuwe weonamuyomba siku na musikahi? Anawa mumpompowe kwambukuya viiyo vyao?

⁸Hachi nyakumwambiani, anawalachia hachi pfasipfo kuḍaḍamaa. Ela mimi *Mwana jwa Ad̯amu nidzepfokudza lumwenguni, nidzat̯onga wantu weo na faro?”

⁹Makisa Yesu kawambia na inganyo wantu wadziserefat̯iyeo kwamba ni wahachi, na wabalifiyeo wangine.

¹⁰Kamba, “Kwiwa wantu wawii wendeyeo *Hekaluni kuyomba. Mumodza ewa Mufarisayo, na yungine ewa *muhwaa kuwa.

¹¹Huyu Mufarisayo kasumama kadziyombea na mojoni kamba, ‘E Muungu, nina asant̯a kwamba mimi sikwaa dza wantu wangine wevi, weonakaiya wantu chihako na wavunza ukwe. Nina asant̯a kwamba sikwaa hat̯a dza huyu muhwaa kuwa huyu.

¹²Mimi nakaa na kufunga myeedha miwii kwa ḍyuma, na kuyavya fungu ḍya kumi kwa kula nichonapata.’

¹³Ela huyu muhwaa kuwa kasumama na jwa kuye na nkakuweza hat̯a kunuya matsoye dzuu yuwinguni. Kadzibiga-biga ḅagwini kwa kudziut̯i na kayomba kamba, ‘E Muungu nifwiya t̯ei, mimi ni munabvise!’ ”

¹⁴Makisa Yesu kamba, “Nyakumwambiani, huyu endeyee nyumbani akiwa kayatsijwa nabviseze, ni huyuḍe muhwaa kuwa na wala si huyuḍe Mufarisayo. Koro kula adzikuziye anasuswa na kula adzisusiye anakuzwa.”

¹⁵Nsiku modza, Yesu kayehejwa wana vichuchu ili awapfaze mikono awavodhye. Ela hawa wanafund̯iwe wepfowaona, wawavingira hawaḍe wawayeheyeo.

¹⁶Ela Yesu kawahana hawa wana na kawambia wanafund̯iwe, “Wayatseni hao wana wadze kwangu. Namutsewavingira, koro Uhaju wa Muungu mbwa wantu weo dzao.

¹⁷Hachi nyakumwambiani, yuḍejwonse asiyeupfokea Uhaju wa Muungu dza mwana kachuchu, huyo nkawezi kuunjia meshi.”

¹⁸Nsiku modza, muyongozi mumodza jwa Kiyahud̯i kamuuza Yesu kamwamba, “Mwaalimu mwema, inanimala nihende kintu ga, ili niweze kuwa na maisha ya kuunga na yuungo?”

¹⁹Yesu kamuuza kamwamba, “Kut̯i kwakunihanani mwema? Ntaku eye mwema lamud̯a Muungu jeje heket̯u!

²⁰Ezi amuri za Muungu nkukuzimanya? Zyamba, ‘Nkudzonjie rangani, nkudzoyage, nkudzokwiwe, nkudzomuneneye mwenziwo nsuwe, muhile babajo na mamajo.’ ”

²¹Huyuḍe muntu kambukuya kamba, “Hayo yonse niyagija hangu ninkiwa mwana.”

²²Yesu epfosikia haya, kamwamba, “Kusaa na dzambo modza zaid̯i ḍya kuhenda. Guza vyonse wivyonavyo na hizi fwedha uwapfe makowesa. Ukihenda hivyo kudzawa na nkandi mbinguni. Makisa nzoo uniuḅe.”

²³Huyuḍe muntu epfosikia hivi, kanjijwa ni ngiru na kagonzowa, koro ewa ni jabva muno.

²⁴Yesu kamuyowa huyuḍe muntu kisa kamba, “Ni vyumu muno kwa muntu jabva kuunjia Uhaju wa Muungu!

²⁵Koro ni vivodho muno kwa ngamia kuchia na kwa anga ḍya lilima, kuliko kwa muntu jabva kuunjia Uhaju wa Muungu.”

²⁶Hawaḍe wantu weowakimusikiiya wamuuza wamwamba, “D̯ubva ikiwa kwamba ni dzevihivi mani ni ga jwa kupfona?”

²⁷Yesu kawambukuya kawamba, “Ḍisiḍyowezekana kwa mwanaad̯amu, kwa Muungu ḍinawezekana.”

²⁸Makisa Pet̯ero kamwamba Yesu, “T̯ayowa Ḅwana, swiswi huyatsa makwehu, hukuuḅa wewe.”

²⁹Nae kamwamba, “Hachi nyakumwambiani, kula ayatsie nyumbaye, mukaziwe, wanduguzwe, wavyaziwe ambu wanawe kwa dzambo ḍya Uhaju wa Muungu,

³⁰Muungu anamuujiza menji zaid̯i hizi hizi ngera na kumumpa maisha ya kuunga na yuungo ngera zizokudzani.”

³¹Makisa Yesu kawakuntia geri hawa wanafund̯iwe kumi na wawii na kawamba, “T̯asikiani, humaawa kwendani Yerusalemi, kudzekot̯imizwa kula kintu chorejwecho ni manabii dzuu yangu mimi Mwana jwa Ad̯amu.

³²Nidzayavigwa kwa wantu wa vyeet̯i, nao wadzanibaladhaiya, wadzanihendea mambo ya kinyaya na kunikamia mahe.

³³Wadzanibiga malucha makisa wadzaniyaga. Ela nsiku ya hahu, nidzafufuka kuyawa kwa wafu.”

³⁴Ela wanafund̯iwe ntawakuimuka chuuwo hat̯a kimodza cha Yesu na wala maana ya hivi vyuuwovye koro viiwa mfitsoni.

³⁵Wepfofika hafufi na Yeriko, waona ntumbu matso akaiye chihako geri ya njia akiyomba-yomba.

³⁶Epfosikia hoisa ya kit̯aro chichochikichia na hapfaḍe, kauza kamba, “Munamba kunani?”

³⁷Wamwambukuya wamwamba, “Ni Yesu jwa Nazareti kakuchiani.”

³⁸Ndookomu kamukelelea kamwamba, “E Yesu *mwana jwa D̯aud̯i[39] nifwiya t̯ei!”

³⁹Hawaḍe wantu wayongoweyeo wamupfohosa wamwamba anyamae. Ela huyuḍe ntumbu matso kongeza kuḅaa madzwi akyamba, “Mwana jwa D̯aud̯i ad̯o nifwiya t̯ei!”

⁴⁰Yesu kasumama na kaamuru kwamba huyu ntumbu matso apfiikwe. Epfokwenda hafufi, Yesu kamuuza kamwamba,

⁴¹“Unatsaka nikuhendeye kintu ga?” Nae kamwambukuya kamwamba, “Ḅwana natsaka kuona.”

⁴²Na Yesu kamwamba, “D̯ubva ona! Faroyo ikupfonya.”

⁴³Nae pfapfo kaḍabva kuona. Ndookomu kamuuḅa Yesu, huku akimushad̯a Muungu. Na wantu wonse wayaoneyeo haya haya mafara wamushad̯a Muungu.