Read pokomo Luka 2 Bible Online

Luka 2 - pokomo bible

Luka 2

¹Ngera za uḍyana wa Yohana, kwiwapfo haju at̯awaliye nsi ya Rumi na nsi zingine nyinji. Haju huyo ekihanwa *Kaisari Agust̯o. Kayavya amuri ya kut̯aligwa wantu wa nsi zonse at̯awaliyezo.

²Kut̯aligwa huku kwiwa nkwa d̯ura ngera ya Kirenio epfokuwa liwali jwa Siria.[1]

³Ndookomu kula muntu kenda kworegwani mudzini kwao.

⁴Yusufu kanuka kuyawa mudzi wa Nazareti wiwo Galilaya, kenda mudzi wa Betilehemu wiwo Yud̯aya, ekovyajwa haju D̯aud̯i. Yusufu kenda hukuḍe, koro ewa jwa sindo na yukoo jwa D̯aud̯i.

⁵Kenda akoregwe pfamodza na Maria, huyu mwanamuke amanyananiye nae, eyekuwa muziho.

⁶Ndookomu, wepfokuwa Betilehemu amaale, nsiku zakwe za kudzifunguya zifika.

⁷Maria kavyaa mwanamuyume hangafa. Kamulinga-linga na vit̯ani na kamut̯ambaarya t̯orani mwa kuḍiya ngombe chakuḍya. Koro ntakukuwa namfasi nyumbani mwa wageni.

⁸Hafufi na Betilehemu, kwiwapfo wat̯unga weowakyamia mbuzi zao nasiku makondeni.

⁹Iyo saa malaika jwa Ḅwana kawat̯upukia, na marembo ya Muungu yawayangaiya tswee, nao wanjijwa ni oga muno.

¹⁰Ela huyu malaika kawamba, “Namutseshooga, koro nimuyeheya maagu mema, yadzeyoyeha tsekea nkuu kwa wantu wonse.

¹¹Koro yeo, mudzini mwa D̯aud̯i, mumavyaijwa mupfonya, ndiye *Kirist̯o Ḅwana.

¹²Na kihambwiizo chenu ni hichi: Mudzaona mwana kalelehea alingijwe na vit̯ani na at̯ambarisijwe t̯orani mwa kuḍia ngombe.”

¹³Iyo saa kit̯aro cha malaika kuyawa mbinguni kitsanganika pfamodza na huyuḍe malaika na waḍabva kumushad̯a Muungu wakyamba,

¹⁴“Shad̯u nza Muungu awee dzuu mbinguni, na naghea iwe lumwenguni, kwa wantu atsakizijweo nao!”

¹⁵Makisa hawa malaika wawayatsa hawa wat̯unga na wapfaa mbinguni. Ndookomu hawa wat̯unga wanena wao na wao wakyamba, “Hwendeni Betilehemu hukaḍiyowe hiḍi dzambo ḍihendekeyeḍyo ḍya Ḅwana ahwambiiyeḍyo.”

¹⁶Ndookomu hawa wat̯unga wanuka na rebvu, wenda wamuona Maria na Yusufu, noyu mwana eyet̯ambaariswa t̯orani mwa kuḍiya ngombe.

¹⁷Wakisa kumuona huyu mwana, hawaḍe wat̯unga wawasumwiiya hawa wantu hayaḍe yonse ya malaika awambiiyeyo dzuu ya huyu mwana.

¹⁸Na wonse wasikiiyeo haya wambiijweyo ni hawa wat̯unga wamaka.

¹⁹Ela Maria kaviweka vyuuwo hivi mojoni mwakwe na kuvimamat̯a.

²⁰Makisa hawa wat̯unga wagala huku wakimushad̯a Muungu kwa yonse wasikiiyeyo na waoneyeyo. Koro wamuona huyu mwana dza viviḍe wambiijwevyo ni malaika.

²¹Huyu mwana epfofikisa nsiku nane hangu epfovyajwa, kangizwa harusini na kapfegwa sari. Kahanwa Yesu, dza viviḍe vya huyu malaika evyonena kaḅila Maria nkadzamumiha.

²²Vyoregwa Shariani mwa Musa kwamba, kwa Wayahud̯i, kula muke adzifungwiiye mwanamuyume, anakaa nsiku miyongo mine asidzadhereswa. Na ili aweze kudhereswa, imumala kuyavijwa mvuugiya ya vikwe viwii ambu wana ndiwa wawii. Na pia vyoregwa kwamba, kula mwanamuyume hangafa, ni had̯i at̯olegwe kwa Ḅwana. D̯ubva nsiku miyongo mine zipfosia hangu nsiku ya Yesu avyaijweyo, Maria na Yusufu wenda pfamodza na huyu mwana *Hekaluni Yerusalemi, kumuyavya kwa Ḅwana.

²³

²⁴

²⁵Ngera hiziḍe kwiwa muntu eyeakihanigwa Simioni, eyeakikaa Yerusalemi. Ewa muntu muhachi na eyeakimuhila Muungu. Ruhu Mudheru ewa dzuuye, na ekiindiya mupfonya jwa Waisiraeli.

²⁶Ruhu jwa Muungu kamuyanga Simioni kwamba asidzafwa kadzamuona Mupfonya adzeehumwa ni Muungu.

²⁷Akiyongojwa ni Ruhu Mudheru, Simioni kenda Hekaluni. Na iyo saa Yusufu na Maria wepfokudza na Yesu kumuhendea adha za kisharia,

²⁸Simioni kamuhwaa huyu mwana mikononi mwakwe na kamushad̯a Muungu kamba,

²⁹“Ḅwana, sasa kumaḍit̯imiza ḍamano ḍyako, d̯ubva muyatse muhumwao ende na naghea.

³⁰Koro nimamuona mimi mwenye, huyu mupfonya jwa wantuwo,

³¹umuelekanyiyee ili wantu wonse wamuone.

³²Kadzawa dza muyanga wa kuyangazia vyeet̯i miroyo na kadzawa hila nkuu kwa wantuwo wa Isiraeli!”

³³Ise na nina huyu mwana wamakiswa ni vyuuwo vinenejwevyo ni Simioni dzuuye.

³⁴Makisa Simioni kawavodhya kisa kamwambia Maria, “Huyu mwana huyu kadzawahendeza wenji wa wantu wa Isiraeli wapfonyegwe na wangine waare. Kadzawa kihambwiizo cha Muungu, ela wantu wenji wadzamudziza.

³⁵Ndookomu mat̯aro ya siri ya wantu wenji yadzayangaa wekeani. Nawe kudzapata ngiru, iyo nkali dza kisu, idzeyokusimika mojowo.”

³⁶Kwiwa *nabii muke jarisa, eyeakihanwa Hana. Ewa mwanamuke jwa Fanueli, jwa kyeet̯i cha Aseri. Kahwajwa, na ḅaad̯a ya myaka mifungahe muumewe kafwa.

³⁷Na hat̯a epfofikisa myaka miyongo minane na mine ewa amaale ni muke muchiwa. Ekyenda Hekaluni kumuyomba Muungu na kufunga siku na musikahi.

³⁸Simioni epfoakinena na Maria na Yusufu, Hana kadza. Nae kaḍabva kumushad̯a Muungu na kusumwiiya dzuu ya huyu mwana kwa kula eyeakimuyoweeya Muungu aikombowe Yerusalemi.

³⁹Ndookomu Maria na Yusufu wepfot̯imiza yonse ya hi sharia ya Ḅwana iyoikitsaka wahende, wauja Nazareti ya Galilaya.

⁴⁰Huyu mwana kakuya na kawa na nguvu. Kadzaa karo, koro Muungu ewa katsakizwa nae.

⁴¹Kula mwaka wavyaziwe Yesu wekyenda Yerusalemi kwa jila ya Pasaka.[2]

⁴²Yesu epfofika myaka kumi na miwii[3] wenda nae kwe jila.

⁴³Hi jila ipfosiya, ise na nina waḍabva kugala nyumbani. Ela ntawakumanya ya kwamba Yesu kahafa Yerusalemi.

⁴⁴Wao wat̯ara kwamba ewa pfamodza na wantu wao wayawiyeo Yerusalemi. D̯ubva mioroye ise na nina waḍabva kumulacha kwa waḅamu zao na wantu wa sindoni mwao.

⁴⁵Wakitsamuona, wauja Yerusalemi wakamulache.

⁴⁶Wamulacha hat̯a nsiku ya hahu hangu wepfonuka Yerusalemi, ndipfo wakimuona. Wamuona kakaa Hekaluni na waalimu wa *Sharia, akiwapfindiiya na kuwauza vyuuwo.

⁴⁷Wonse wamusikiiyeo Yesu akwakwambukuyani urembo hayaḍe eyoakiuzwa wamaka kwa karowe.

⁴⁸Mambo hayo yamumakisa ise na nina muno. Makisa mamajwe kamuuza, kamwamba, “Mwanangu, maana ya kuhuhenda hivi hivi ni? T̯ayowa, ami na babajo hwikikulacha na d̯ina kula pfantu, katsi kwapfahapfa!”

⁴⁹Yesu kawambukuya kawamba, “Anywi munilachia? Munamba ntamukumanya hat̯a kwamba ni had̯i niwepfo nyumbani mwa Baba?”

⁵⁰Ela wao ntawakuimuka kwambukuyakwe.

⁵¹D̯ubva Yesu kagijana nao, wauja Nazareti na nkakuyatsa kuwat̯ii. Maria kayaweka haya yonse mojoni mwakwe.

⁵²Yesu kagija kukuya na chimo na kenjipfa na karo. Na Muungu na wanaad̯amu wagija kutsakizwa nae.