Read pokomo Luka 21 Bible Online

Luka 21 - pokomo bible

Luka 21

¹Yesu epfokuwa *Hekaluni amaale, kaona wantu majabva wakwakungizani mvuugiya zao kwa hiḍi sand̯uku ḍya mvuugiya.

²Kaona na muke muchiwa kowesa, akwakungizani nd̯ururu mbii.

³Ndookomu kamba, “Hachi nyakumwambiani, huyu muke muchiwa kowesa huyu, kayavya vinji kuchiya hawa wangine wonse.

⁴Koro hawa wangine wonse, watsonta mvuugiya wayaviyezo kuyawa kwa jabva wao weo nao. Ela huyu muke muchiwa huyu, na umasikini wakwe wonse, kayavya vyonse evyokuwa navyo.”

⁵Wantu wangine wekinenea namuna ya Hekalu ikaiyevyo urembo na mawe iyombakwa nayo na mapamboye yayavijweyo dza mvuugiya kwa Muungu. Ela Yesu kawamba,

⁶“Ngera zakudzani, za kwamba haya yonse mwiyokuyaonani mema yadzanangwa-nangwa tswee. Ntakukudzasaa iwe hat̯a modza dzuu ya iwe ḍingine!”

⁷Makisa wamuuza wamwamba, “Mwaalimu, haya haya mambo uneneyeo yadzahendeka ari? Kunawa kihambwiizo ga cha kuyanga kwamba ngera ya haya haya mambo kuhendeka imaafika?”

⁸Yesu kawambukuya kawamba, “Manyani muntu atsekudzamwaarya. Koro wenji wadzadzifwariza kudza kwa sari ḍyangu wakyamba, ‘Mimi ndimi huyu *Masiya,’ na ‘Ngera ya mwiso ifika!’ Ela namutsewahikiza.

⁹Mudzepfosikia maagu ya viha na misukosuko mikuu, namutsehuka. Koro haya haya ni had̯i yahendeke d̯ura, ela si maana ya kwamba mwiso umaafika.”

¹⁰Yesu kongeza kunena kamba, “Nsi zidzanuka kujwana na nsi zingine, na uhaju udzajwana na uhaju ungine.

¹¹Kudzawa mihehemo mikuu ya nsi, nzaa na vipfupfu kuntu garagara. Kudzawa na mambo ya kuhusya na vihambwiizo vikuu humu yuwinguni.

¹²Ela yonse haya yasidzahendeka, mudzagijwa na kukuntiswa d̯ina. Mudzahukumigwa masunagogini na kungizwa magerenzani. Na kwa dzambo ḍyangu, mudzasit̯akigwa usoni ya mahaju na wat̯awala wangine.

¹³Na hii idzawa namfasi yenu ya kuyavya ushuhuḍa dzuu yangu kwao.

¹⁴Mukwakupfiikwani hukumuni, namutsekaiya kuhangaika na mat̯aro kwamba mwendanena kintu ga.

¹⁵Koro nidzamumpa ud̯ubat̯a na karo wa kwamba hat̯a wazuka wenu ntawakudzaweza kuvidziza ambu kuvikana hivi mudzevyonena.

¹⁶Mudzaḍawanywa ni wavyazi wenu, ndugu zenu, wantu wa sindoni mwenu na waḅamu zenu. Na wangine wenu mudzayagwa.

¹⁷Na wantu wenji wadzamukeva kwa dzambo ḍyangu.

¹⁸Ela hat̯a yunywii yumodza jwa vitswa vyenu ntajukudzakwaara.

¹⁹Mukiit̯isa munapata maisha ya kuunga na yuungo.”

²⁰Yesu kongeza kunena kawii kawamba, “Mudzepfoiona Yerusalemi iringwa ni vit̯aro vya asikari, d̯ubva munamanya kwamba ntaikwakunangwa hat̯a kae.

²¹D̯ubva wantu weo ḍyimbo ḍya Yud̯aya nawad̯aramiye mirimani. Weo Yerusalemi nawauyawe hu mudzi. Na hawaḍe weo nze yo mudzi, nawatseuja mudzini kawii.

²²Koro hiyo idzawa ngera ya hukumu ya Muungu, dza vya matsoro yaneneyevyo.

²³Hizo hizo ngera, wake weo waziho na weokwamusani wadzakunta d̯ina muno! Wantu wa huju lumwengu wadzawa na d̯ina nkuu. Muungu kadzawa na ngoro na hawa wantu na kadzawahukumu.

²⁴Wangine wadzayagwa vihani na wangine wadzawa maheka wa nsi zonse. Na hawa wantu wa vyeet̯i wadzaikaa Yerusalemi hat̯a nsiku zao zidzepfosia.”

²⁵Yesu kanena kawii na wanafund̯iwe kawamba, “Mwiso wa lumwengu udzamanyikana na hiviḍe vya hiḍi dzuwa, mwezi na nyoha vidzevyokaa. Wantu wa nsi nyinji wadzaḍanganika ḍya kuhenda ambu kwa kwenda kwa dzambo ḍya vumo ḍya ḅahari na mawimbi makuu.

²⁶Wantu wadzavurika kwa oga wakihambuya haya yadzeyohendeka humu lumwenguni, koro mbingu zidzanjia sukuso.

²⁷Makisa wantu wadzaniona mimi *Mwana jwa Ad̯amu nikidza mawinguni na nguvu na marembo makuu.

²⁸Mudzepfoona mambo haya yaḍabva kuhendeka, wani na tsekea koro mupfonyo wenu wa hapfa nkumbi na matso.”

²⁹Makisa Yesu kawambia wanafund̯iwe inganyo kawamba, “Dziyongweezeni na mutini ambu muhi ungine uḍewonse.

³⁰Mukiona uḍabva kuḅaa magomba mapfya, munahambuya kwamba mwaka umaawa hafufi.

³¹Dza vivyo, mudzepfoyaona haya mambo nimwambiiyeyo yamaḍabva kuhendeka, ḅasi ni mumanye kwamba Uhaju wa Muungu umaawa hafufi kudza.

³²Hachi nyakumwambiani, hichi hichi kivyazi[44] ntakinasia chonse kaḅila haya haya yonse nimwambiiyeyo ntayadzahendeka.

³³Mbingu na nsi vinasia, ela vyuuwo vyangu ntavinasia meshi.

³⁴D̯ubva manyani mutsehekwa ni kuḍya kwinji na kuruma, wala mirumiru za maisha ya lumwengu huju, ili hiyo hiyo nsiku itsemudzia na ḅwikira.

³⁵Koro nsiku hiyo idzakudza dza kichale kwa wantu wonse lumwenguni.

³⁶Mirani na kuyomba muno mupate nguvu za kuyachia na naghea haya haya mambo yonse yadzeyohendeka, ili mudze musumame usoni yangu mimi Mwana jwa Ad̯amu.”

³⁷Ndookomu kula nsiku, Yesu ekiyongweeza na musikahi humuḍe Hekaluni, na siku ukinaa ekyenda Murima wa mihi ya Mizeituni na kuyaa.

³⁸Kula magura mapfema wantu wenji wekyenda Hekaluni kumusikiiya.