Read pokomo Luka 22 Bible Online

Luka 22 - pokomo bible

Luka 22

¹Jila ya mikahe isiyongizwa hamira iwa imaawa hafufi. Hi hii jila pia ikihanigwa *Pasaka.

²Wakohani wakuu na waalimu wa *Sharia walacha njia ya kumuyaga Yesu na siri, koro wekiwashooga hawa wantu.

³D̯ubva Shaat̯ani kamunjia Yud̯a, eyeakihanwa Isikariota, eyekuwa mumodza jwa hawa wanafund̯i kumi na wawii wa Yesu.

⁴Kenda kashauriana na hawa wakohani wakuu na wamia wa *Hekalu namuna ya kumuḍawanya Yesu kwao.

⁵Hawa wakohani wakuu wepfosikia hivi vya Yud̯a adziiyevyo kuhenda watsekea muno na wamuahid̯i kumumpa fwedha.

⁶Yud̯a kakuḅali, na kaḍabva kulacha namfasi nyema ya kumuḍawanya Yesu kwao pfasipfo wantu kuvimanya.

⁷Nsiku ya jila ya mikahe isiyongizwa hamira ifika. Iwa ndiyo nsiku ya kutsinzwa kwa mwana mbuzi jwa Pasaka.

⁸Ndookomu Yesu kamuhuma Pet̯ero na Yohana kawamba, “Endani mukaihuelekanyize Pasaka hudze huiḍye.”

⁹Wamuuza wamwamba, “Unatsaka hukaielekanye ku?”

¹⁰Yesu kawambukuya kamba, “Endani, na mukwakunjiani mudzini, munat̯ongana na muntu atsukwiiye nyungu ya madzi. Muuḅeni mumpaka kwa hi nyumba adzeyonjia.

¹¹Mwambeni huyu mwenye, ‘Mwaalimu kamba, e chumbache cha kuḍya e jila ya Pasaka pfamodza na wanafund̯iwe ni chi?’

¹²Nae anamuyanga chumba chikuu d̯arini dzuu, chicho na kula kintu t̯ayari. Ndiko mudzekoielekanya hi Pasaka.”

¹³D̯ubva hawa wanafund̯i wowii wanuka wenda mudzini na waona kula kintu dza viviḍe vya Yesu awambiiyevyo. Nao wakielekanya hichi chakuḍya cha Pasaka.

¹⁴Saa ya jila ipfofika, Yesu na hawa *ntumi wakaa kuḍyani.

¹⁵Yesu kawamba wanafund̯iwe, “Ninkit̯amani muno kuḍya nanywi hi hii Pasaka nisidzaḍabva kukuntiswa d̯ina.

¹⁶Koro nyakumwambiani, sikudzaiḍya kawii hat̯a maanaye kindindi yadzepfot̯imia Uhajuni mwa Muungu.”

¹⁷Makisa Yesu kahwaa chikombe cha mvinyo kamushad̯a Muungu, na kawamba wanafund̯iwe, “Hwaani hichi chikombe munwe nyonse.

¹⁸Koro hachi nyakumwambiani, hangu hi hii saasambi, sikwakunwa kawii hi mvinyo mumpaka Uhaju wa Muungu udzepfokudza.”

¹⁹Makisa kahwaa mukahe, kamushad̯a Muungu, kauvunza na kawapfa wanafund̯iwe, kawamba, “Huu ni mwii wangu, udzeoyavigwa kwa dzambo ḍyenu. Hendani hivi kwa kunikumbuka.”

²⁰Dza vivyo, kahwaa na hichi chikombe che mvinyo kachiwapfa wakisa kuḍya, kawamba, “Hichi ni chikombe cha ḍamano ipfya ḍya Muungu, ḍidzeḍyot̯imizwa ni mwazi wangu, mwazi udzeohigwa kwa dzambo ḍyenu.”

²¹Yesu kawambia hawa ntumiwe, “Ela manyani! Huyu jwa kuniḍawanya kakuḍyani pfamodza nami hapfa mezani.

²²Mimi *Mwana jwa Ad̯amu nidzafwa dza vya Muungu atsakiyevyo. Ela huyu adzeeniḍawanya kadzakunta d̯ina nkuu muno!”

²³Ndookomu hawa ntumi waḍabva kuuzana wao na wao wakyamba, “Eyekutsakani kuhenda hivi hivi ni ga?”

²⁴Makisa hawaḍe ntumi waḍabva kuḍaat̯iana wao na wao dzuu ya huyuḍe adzeewa mukuu jwao wonse.

²⁵Wepfowakiḍaat̯iana, Yesu kawamba, “Mahaju ya lumwengu yanawat̯awala kinguvu-nguvu wantu wao na kuwakaiya chihako. Na huku wanadzihana ‘Waḅamu wa wantu!’

²⁶Ela kwenu nywinywi naitseewa dza hivyo. Ishinu, huyuḍe mukuu jwa mwiso nawe dza muchuchu jwa mwiso. Na muyongozi nawe dza muhumisi.

²⁷Kahi ya huyuḍe eyenakaa chihako kuḍyani na huyuḍe eyenamuwekea chakuḍya, ni ga mukuu? Gula ni huyuḍe eyenakaa chihako kuḍyani mezani, ela mimi nya dza muhumisi kahi yenu.”

²⁸Na Yesu kongeza kunena nao kamba, “Muit̯isa nami maḍemoni mwangu mwonse.

²⁹D̯ubva dza vya Baba animpiyevyo uwezo wa kut̯awala, ndivyo nidzevyomuhendea nanywi.

³⁰Mudzaḍya na kunwa nami Uhajuni mwa Muungu, na mudzakaa viti vya kihaju mukihukumu vyeet̯i kumi na viwii vya Waisiraeli.”

³¹Makisa Yesu kamuhana Simioni Pet̯ero kamwamba, “Simioni, Simioni! Shaat̯ani kayatsigwa amuḍeme nyonse, dza vya muntu evyonapfepfenta nganu akait̯anya na mapfapfi.

³²Ela wewe Simioni, nikuyombea ili faroyo itsekwaara kaḅisa. Na udzepfoniujia mimi, wangize nguvu hawa wanduguzo.”

³³Pet̯ero kamwambukuya kamwamba, “Ḅwana, nya t̯ayari kungizwa gerenzani pfamodza nawe na hat̯a nifwe pfamodza nawe!”

³⁴Ela Yesu kamwamba, “Nyakukwambiani Pet̯ero, hu huu siku wa yeo, nkuku asidzawika, unanikana myeedha mihahu kwamba nkunidzi.”

³⁵Makisa Yesu kawauza wanafund̯iwe kawamba, “Nipfomuhuma pfasipfo fwedha, munkoḅa ambu nkoḅani, mwiipfungukijwa ni kiḍechonse?” Nao wamwambukuya wamwamba, “Hat̯a.”

³⁶Yesu kawamba, “Ela sasa, awee na fwedha ambu munkoḅa nauhwae. Na asi mundu naguze nkanzuye apate kuguya mundu.

³⁷Koro hachi nyakumwambiani, haya matsoro yambiyeyo, ‘Kawekwa kit̯aro kimodza na wanabvise,’ ni had̯i yat̯imiye. Ndookomu kula chorejwecho matsoroni dzuu yangu chakut̯imiani.”

³⁸Hawa wanafund̯iwe wamwamba, “T̯ayowa Ḅwana, hapfa huna myundu miwii!” Nae kawambukuya kawamba, “It̯osa!”

³⁹Yesu kauyawa hu mudzi na kenda Murima wa Mizeituni dza abarat̯iyevyo kuhenda. Na wanafund̯iwe wenda pfamodza nae.

⁴⁰Epfofika kawamba wanafund̯iwe, “Yombani mutsekudzanjia maḍemoni.”

⁴¹Makisa jeje kadzit̯anya na wanafund̯iwe, kenda hat̯uwa ya kwangukia gaga. Kavunza nkuhi na kayomba

⁴²kamba, “Baaba, ikiwa miroyo, kininwiiye hichi chikombe cha matsungu. Kenge si kwa miro yangu, ela miroyo naihendeke.”

⁴³Makisa kat̯upukijwa ni malaika kuyawa mbinguni amungiziyee nguvu.

⁴⁴Kayomba na hiḍu huku akiwa na tsungu mwinji hat̯a kahweka. Hwekaḍye ḍiiwa dza mahwente ya mwazi yeyoyakimont̯oka mutsangani.

⁴⁵Yesu epfokwisa kuyomba kawaujia hawa wanafund̯i wakwe. Kawat̯onga wakuyaani kwa matsofu ya sikit̯iko weḍyokuwa naḍyo.

⁴⁶D̯ubva Yesu kawamba, “Kut̯i mwakuyaani? Nukani muyombe, mutsekudzanjia maḍemoni.”

⁴⁷Yesu epfoakinena na wanafund̯iwe, kudza kit̯aro cha wantu. Na Yud̯a, mumodza jwa wanafund̯iwe kumi na wawii ewa kawayongowa. Kamudzia Yesu amunoneye.[45]

⁴⁸Ela Yesu kamuuza kamwamba, “Yud̯a, kwakuniḍawanyani mimi Mwana jwa Ad̯amu kwa kuninonea?”

⁴⁹Hawa Wanafund̯i weokuwa pfamodza na Yesu wepfoona yadzeyohendeka, wamuuza Yesu wamwamba, “Ḅwana, huwakente-kente na myundu?”

⁵⁰Iyo saa, mumodza jwao kamukenta huyu muhumisi jwa huyu *Mukohani Mukuu kamuhuna hiḍi sikio ḍya mukono kuyume.

⁵¹Ela Yesu kamba, “It̯osa!” Kisa kaḍihora hiḍi sikio ḍya huyu muntu, na kamupfonya.

⁵²Makisa Yesu kawambia wakohani wakuu na wamia wa Hekalu pfamodza na wazee wadziyeo kumugija, kawamba, “Munidzia na myundu na mambuku, dza kwamba mudzia kugija mwivi?

⁵³Niiwa nanywi Hekaluni kula na nsiku, ela ntamukunigija. Ela saa yenu imaafika, ngera ya nguvu za kiza kuhenda kazi.”

⁵⁴Makisa wamugija Yesu na wamuhwaa wenda nae nyumbani mwa Mukohani Mukuu. Pet̯ero nae kamuuḅa Yesu na jwa kuye.

⁵⁵Pet̯ero kenda hat̯a kanjia uani mwe nyumba ya huyu Mukohani Mukuu. Kwiwa kugizwa moho hapfaḍe kahi kahi, na Pet̯ero kenda katsanganika na hawaḍe weowakikoha moho.

⁵⁶Muhumisi mumodza jwa kike epfomuona Pet̯ero kakukohani moho, kamud̯eḍea kisa kamba, “Hat̯a huyu muntu huyu ewa pfamodza na Yesu!”

⁵⁷Ela Pet̯ero kakana kamba, “E Muke we, hat̯a simudzi.”

⁵⁸Kapfachu, muntu yungine kamuona Pet̯ero na kamwamba, “Hat̯a nawe u mumodza jwao!” Ela Pet̯ero kamwambukuya kamwamba, “E muntu we, mimi sikwaa mumodza jwao hat̯a!”

⁵⁹Kwipfochia kit̯emo cha saa nzima, muntu yungine kasindiiya kunena, kamba, “Hachi huyu muntu huyu ewa pfamodza na Yesu, koro hat̯a nae ni Mugalilaya!”

⁶⁰Ela Pet̯ero kakana kamba, “Kare sidzi wichokunenani t̯i!” Na iyo saa, hat̯a Pet̯ero asidzanena ese, nkuku kawika.

⁶¹Yesu kaperuka kamuyowa Pet̯ero. Na pfapfo Pet̯ero kakumbuka hiviḍe vya Yesu amwambiiyevyo, “Hu huu siku wa yeo, nkuku asidzawika, unanikana myeedha mihahu kwamba nkunidzi.”

⁶²Ndookomu Pet̯ero kayawa nze kenda kaiya na tsungu muno.

⁶³Hawaḍe wantu weowakimwamia Yesu wamubiga na kumubaladhaiya.

⁶⁴Makisa wamuvinga matso na wamuuza wamwamba, “Haya hakesa, ni ga akubigie?”

⁶⁵Na wamubaladhaiya na mambo yangine menji.

⁶⁶Nsi ipfocha, wazee wa gasa, wakohani wakuu, na waalimu wa Sharia wat̯ut̯aa pfamodza, na Yesu kayehegwa usoni ye gasa.

⁶⁷Hapfo waḍabva kumuuza wamwamba, “T̯ahwambiye, wewe ndiwe ayu *Kirist̯o?” Nae kawambukuya kawamba, “Hat̯a nikimwambia ntamukwakunihikiza.

⁶⁸Nikimuuza chuuwo, ntamukwakunyambukuya.

⁶⁹Ela hangu hi hii saasambi mimi Mwana jwa Ad̯amu nijwakukaa mukono kuyume wa Muungu mwenye nguvu.”

⁷⁰Wonse wamuholokea wamwamba, “Amevihivi unatsaka kunena kwamba wewe ndiwe ayu Mwana jwa Muungu?” Nae kawambukuya kawamba, “Nywinywi mwakunenani kwamba ndimi!”

⁷¹Ndookomu wambana, “Hwakulachani ushaahiḍi ga amaale? Naswi swiswi wenye huvisikia kuyawa kanwani mwakwe jeje mwenye!”