Read pokomo Luka 24 Bible Online

Luka 24 - pokomo bible

Luka 24

¹Nsiku ya d̯ura ya ḍyuma, magura mapfema, hawaḍe wake wenda mbeerani. Watsukuya haya manunkanto weyoelekanya.

²Wepfofika, waḍiona hiḍi iwe ḍiperujwa-perujwa na hapfa mbeerani.

³Ndookomu wanjia. Ela ntawakuuona hu mwii wa Ḅwana Yesu.

⁴Hawaḍe wake wepfoḍanganika amaale, iyo saa wat̯upukijwa ni wantu wawii usoni yao, wavwaiyeo nguo nyeupe pee.

⁵Hawa wake wanjijwa ni oga muno na wagisa matso mutsangani. Hawaḍe wantu wawauza wawamba, “Kut̯i mwakumulachani kahi ya wafu muntu eye mojo?

⁶Hapfa nkapfo, kafufuka. Kumbukani hivi evyomwambia epfokuwa Galilaya.

⁷Kamwamba, ‘Ni had̯i *Mwana jwa Ad̯amu angizwe mikononi mwa wanabvise, apfatsikwe na nsiku ya hahu afufuke.’ ”

⁸Ndookomu hivi vyuuwo vya Yesu viwadzia hawaḍe wake ḅwaa!

⁹Wauja na wenda wawasumwiiya hawaḍe wanafund̯i kumi na mumodza, na wangine wonse haya mambo yonse yahendekeeyo.

¹⁰Hawa wake wewa ni Maria jwa mudzi wa Magid̯ala, Yoana na Maria mamajwe Yakobo. Wao na wake wangine wawasumwiiya hawa *ntumi haya mambo.

¹¹Ela hawa ntumi ntawakuhikiza haya wambiijweyo ni hawa wake, koro weyaona dza upuudhi.

¹²Ela Pet̯ero kanuka kad̯arama mumpaka mbeerani. Na epfot̯ulama akitsungia, kaona hi sand̯a ya Yesu azikijweyo nayo t̯u. Ndookomu kauja nyumbani akiwa kumamat̯ani haya yahendekeeyo.

¹³Iyo nsiku, wanafund̯i wawii wa Yesu wewa kwendani mudzi wa Emausi. Wiwa hat̯uwa ya jwenendo jwa masaa mawii kuyawa Yerusalemi.

¹⁴Wewa kusumwiiyanani dzuu ya haya mambo yonse yahendekeeyo.

¹⁵Wepfowakiḍaat̯iana amaale, Yesu kawafika hafufi na kagijana nao.

¹⁶Wamuona ela ntawakumuhambuya kwamba ni ga!

¹⁷Yesu kawauza kawamba, “Mwakunenani kintu ga mukiwa kwenendani?” Ao wasumama wakiyanga maso ya masikit̯iko.

¹⁸Mumodza jwao ahanijwe Kileopa, kamwambukuya kamwamba, “Ndiwe muntu wewe heket̯u jwa Yerusalemi asimanya mambo yahendekeeyo hizi nsiku za nyuma?”

¹⁹Yesu kamuuza kamwamba, “Ni mambo ga?” Wamwambukuya wamwamba, “Mambo yamuhendekeeyo Yesu jwa Nazareti. Ewa *nabii mukuu. Kanena na kuhenda mambo makuu usoni ya Muungu na wanaad̯amu. Hat̯a wantu wonse wewa wamuhikiza.

²⁰Ela wakohani wakuu na wakuu wehu, wamuyavya ayagwe, na kapfatsikwa.

²¹Aswi hwiidzikwat̯ya kwamba ndiye adzeewapfonya wantu wa Isiraeli. Si t̯uu, yeo ni nsiku ya hahu hangu mambo haya yepfohendeka.

²²Hawa wake wangine wa hichi kit̯aro chehu, wahumakisa. Wenda mbeerani magura mapfema,

²³ela ntawakuuona hu mwiiwe. Ishinu wauja na wamba waona malaika wawambiyeo kwamba Yesu ka mojo.

²⁴Wangine wehu wenda hukuḍe mbeerani na waona dza viviḍe vya hawa wake waneneyevyo, ela jeje ntawakumuona.”

²⁵Makisa Yesu kawamba, “Nywinywi munaimuka ari? Mu wampompowe mwiwodze wa kuhikiza vyonse vya manabii waneneyevyo!

²⁶Ntaikumala hat̯a kwamba ayu *Masiya aoneswe tsungu asidzanjia maremboni mwakwe?”

²⁷Na Yesu kaweleza yonse yorejweyo matsoroni dzuu yakwe. Kaḍabva na hangu vyuo vya Musa mumpaka matsoro yonse ya manabii wangine.

²⁸Wepfofika hafufi na Emausi, Yesu kadzihendeza dza kwamba kakuchiani usoni zaid̯i.

²⁹Ela hawaḍe wantu wamuyomba wamwamba, “Ikaa naswi koro dzuwa ḍimaatswa na imaawa mioro muno.” Ndookomu kawauḅa.

³⁰Wepfokaa kuḍyani, Yesu kauhwaa hu mukahe, kamushad̯a Muungu, makisa kauvunza na kawapfa hawaḍe wantu.

³¹Makisa mama zao ziwapfenuka na pfapfo wamuhambuya kwamba ni Yesu. Ela iyo saa kawaaria matsoni.

³²Nao wambana, “Myojo yehu ntaikutsambauka epfoakinena naswi humu njiani na kuhweleza aya matsoro?”

³³Mweedha mumodza wanuka na wauja Yerusalemi. Wenda wawat̯onga hawa wanafund̯i kumi na mumodza na wantu wangine weowakimuuḅa Yesu, wat̯ut̯aa pfantu pfamodza

³⁴wakyamba, “Ḅwana kafufuka ḍugha! Kamut̯upukia Simioni!”

³⁵Makisa hawa wowii wawasumwiiya haya yahendekeeyo humu njiani na hiviḍe wamuhambwiiyevyo Yesu epfouvunza hu mukahe.

³⁶Wepfowakiwasumwiiya haya, iyo saa Yesu jeje mwenye kasumama kahi yao na kawamba, “Naghea iwe nanywi!”

³⁷Wahuka, wat̯ara kwamba waona nkoma.

³⁸Ela Yesu kawamba, “Kut̯i mwakuḍanganikani na kuwa na chichu?

³⁹Niyowani hi mikono na maguu yangu, na munamanya kwamba ndimi haswa. Nihorani, nanywi munanihambuya, koro nkoma nka mifufa na nyama dza hizi nizonazo mimi.”

⁴⁰Epfonena hivi kawayanga haya maguuye na mikonoye.

⁴¹Ela amaale ntawakuhikiza kwa tsekea na kimako wechokuwa nacho. Ndookomu kawauza kawamba, “Muna kantu kaḍekonse hapfa hapfa?”

⁴²Nao wamumpa nofu ḍya nswi imbikijweyo.

⁴³Kaḍihwaa, na kaḍiḍya wakiwa kumuyowani.

⁴⁴Makisa kawamba, “Haya ndiyo mambo niyomwambia nipfokuwa pfamodza nanywi amaale. Niimwamba, yonse yorejweyo dzuu yangu Shariani mwa Musa, kwa matsoro ya manabii, na kwa chuo cha Zaburi, ni had̯i yat̯imiye.”

⁴⁵Makisa Yesu kawapfenuya mat̯aro yao waimuke haya yorejweyo matsoroni.

⁴⁶Kawamba, “Haya ndiyo yorejweyo: ‘Huyu Masiya ni had̯i afwe na nsiku ya hahu afufuke kuyawa kwa wafu.’

⁴⁷Na kwa sariḍye, haya Maagu ni had̯i yasumwiijwe kwa vyeet̯i vyonse vya lumwengu, yakiḍabva na Yerusalemi. Na haya maagu ni kwamba, wantu wapfyehuze mama na Muungu anawayatsia nabvise zao.

⁴⁸Nywinywi mu mashaahiḍi wa haya haya mambo yonse.

⁴⁹Nami mwenye namuhumia huyu Ruhu Mudheru jwa Baba amuahid̯iyee. Ela ikaani humu mudzini hat̯a mudzepfopfegwa nguvu kuyawa mbinguni.”

⁵⁰Makisa Yesu kawayongowa hawaḍe wamuuḅiyeo, wauyawa hu mudzi wa Yerusalemi, wenda hat̯a hafufi na Betania. Wepfofika huko, Yesu kanuya mikonoye dzuu na kawavodhya.

⁵¹Epfoakiwavodhya, kat̯ana nao huku akiwa kuhwajwani kwenda mbinguni dzuu.

⁵²Makisa wamuvunzia nkuhi na wauja Yerusalemi na tsekea nkuu.

⁵³Ndookomu wekyenda *Hekaluni kut̯wa na kumushad̯a Muungu.