Read pokomo Luka 4 Bible Online

Luka 4 - pokomo bible

Luka 4

¹Yesu epfokwisa kut̯opyegwa kagala kuyawa tsana ya Yorod̯ani akiwa kadzaa Ruhu. Kayongojwa ni Ruhu Mudheru

²hat̯a yuwandani endeyeko akikaa kwa nsiku miyongo mine, akiḍemegwa ni Shaat̯ani. Kwa hizo hizo nsiku zonse, Yesu nkakuḍya kiḍechonse. Ndookomu hizo nsiku zipfosia kagijwa ni nzaa.

³Shaat̯ani kamwamba, “Ikiwa kwamba wewe u mwana jwa Muungu ḍugha, ḍiamuru hiḍi iwe hiḍi ḍiwe mukahe.”

⁴Ela Yesu kamwambukuya kamwamba, “Vyoregwa matsoroni kwamba, ‘Mwanaad̯amu nkanaishi kwa chakuḍya[5] t̯u.’ ”

⁵Makisa Shaat̯ani kamuhwaa Yesu kenda kamuyanga nsi zonse za lumwengu dza kupfesa.

⁶Kisa kamwamba Yesu, “Ukinivunzia nkuhi mimi, nakupfa mawezo na uhaju wa nsi zonse hizi na maremboye. Koro nizipfegwa mimi na nina mawezo ya kuzimumpa yuḍejwonse nitsakiyee.”

⁸Ela Yesu kamwambukuya kamwamba, “Vyoregwa matsoroni kwamba, ‘Umuhile Ḅwana Muungujo na umuhumikie jeje heket̯u!’ ”

⁹Makisa Shaat̯ani kamupfiika Yesu hat̯a Yerusalemi, na kamusumamisa hapfaḍe pfantu pfepfo dzuu pfa mwiso pfe *Hekalu. Kisa kamwamba, “Ikiwa kwamba wewe u Mwana jwa Muungu ḍugha, dzyanguse nsi kuyawa hapfa dzuu.

¹⁰Koro vyoregwa kwamba, ‘Muungu anawaamuru malaikawe wakwamiye,

¹¹na wakutsukuye dzuu dzuu, utsekudzakolasika na iwe hat̯a modza.’ ”

¹²Yesu kamwambukuya kamwamba, “Haya matsoro yamba, ‘Nkudzomuḍeme Ḅwana Muungujo!’ ”

¹³Ndookomu Shaat̯ani epfokwisa kumuḍema Yesu kwa kula njia, kamuyatsa nguzi.

¹⁴Makisa Yesu kagala ḍyimbo ḍya Galilaya akiwa na nguvu za Ruhu Mudheru. Maagu dzuu yakwe yad̯achaa nsi yonse ya Galilaya.

¹⁵Kayongweeza masunagogini, na wonse wamushad̯a kwa mayongweezoye.

¹⁶Makisa Yesu kenda Nazareti, mudzi ayeejweo. Nsiku ya *Sabato kanjia *sunagogini dza abarat̯iyevyo. Epfokuwa humuḍe kuzimu, kasumama asome haya matsoro madheru.

¹⁷D̯ubva kapfegwa chuo cha *nabii Isaya. Kachipfenuya pfantu pforejwepfo pfakyamba,

¹⁸“Ruhu jwa Ḅwana ka dzuu yangu, ndookomu kanitsana niwasumwiiye makowesa *Maagu Mema. Kanihuma niwalalabviye wafungwa kufungujwa kwao, na kuona kawii kwa ntumbu matso, na kuwahendeza weokuonejwani watseonejwa kawii.

¹⁹Muungu kanihuma kuulalabva mwaka wa Ḅwana wa kuwapfonya wantuwe.”

²⁰Yesu epfokwisa kusoma kachimugalichiza hichi chuo huyuḍe muhumisi, makisa kakaa chihako. Wantu wonse weokuwa humuḍe sunagogini wamud̯eḍea gu!

²¹D̯ubva Yesu kaḍabva kuwambia hawa wantu, akyamba, “Hivi vya haya matsoro yaneneyevyo, yeo visakut̯imiya.”

²²Ndookomu wantu wonse weokuwapfo watsakizwa nae na wamaka muno kwa vyuuwo vyema awambiiyevyo. Makisa wantu wangine wamba, “Ae huyu huyu si mwana jwa Yusufu!”

²³Yesu kawamba, “Hachi mudzanyambia inganyo hiḍi, ‘Muriit̯a, dziriit̯e mwenye.’ Koro mudzanyambia nihende mambo hapfa mudzini dza hayaḍe musikiiyeo kwamba nihenda Kaperinaumi.

²⁴Koro hachi nyakumwambiani, nabii nkapfegwe hila mudzini kwao.

²⁵Na nyakumwambiani, ni ḍugha kwamba kwiwa wake wachiwa wenji wa Kiyahud̯i ngera za Eliya, kwipfokuwa ntaku mvuya kwa myaka mihahu na myezi mihandahu, na kwipfokuwa na nzaa nkuu nsi yonse ya Isiraeli.

²⁶Ela Muungu nkakumuhuma Eliya kwa yuḍejwonse kahi yao, kenge kamuhuma kwa muke muchiwa aishiye Sareputa, mudzi wa Sidoni.

²⁷Hat̯a masiku ya nabii Elisha, kwiwa Waisiraeli wenji weokuwa na kwanga. Ela ntakukuwa hat̯a mumodza jwao adheresejwe, ishinu kudhereswa muntu jwa Siria ahanijwe Namani.”

²⁸Vyuuwo hivi viwarejesa wantu wonse weokuwapfo sunagogini.

²⁹Ndookomu wanuka, wamuyavya Yesu nze ya mudzi na wenda nae hat̯a dzuu ya murima wiwombakigwa hu mudzi wao wakitsaka kumwangukia nsi ya murima.

³⁰Ela Yesu kachia na humu kit̯aroni, kagonzowa.

³¹Makisa Yesu kenda Kaperinaumi, mudzi wiwo ḍyimbo ḍya Galilaya. Na kula nsiku ya Sabato ekyenda sunagogini na kuwayongweeza wantu.

³²Na wonse weowakimusikiiya wamaka muno kwa namuna ayongweezeyevyo. Koro jeje kayongweeza na mamulaka.

³³Na humuḍe sunagogini, kwiwa muntu eyekuwa na mpepfo nzuka. Hiḍe mpepfo nzuka imuhendeza kaḅaa idzwi kuu kamba,

³⁴“Unaswini, e Yesu jwa Nazareti? Munamba kumakudzia kuhunanga? Nikumanya tswee kwamba u ga! Wewe u Mutsanwa jwa Muungu.”

³⁵Ela Yesu kaibusa hiḍe mpepfo nzuka kayamba, “Nyamaa na umuyawe muntu huyu!” Ndookomu hi mpepfo nzuka imugisa huyu muntu usoni ya wantu, makisa imuyawa. Ela ntaikumukukamisa.

³⁶Wantu wonse wamaka hat̯a waḍabva kuuzana wao na wao wakyamba, “Haya haya nayo ni mambo ga? Munamba huyu huyu muntu ana mamulaka na nguvu ziizodze, za kwamba akiamuru t̯u mpepfo nzuka zimuyawe muntu nazo zinamuyawa ḍugha?”

³⁷Ndookomu maagu dzuu ya mahendo ya Yesu yad̯achaa ḍanda zonse za Galilaya.

³⁸Yesu epfoyawa na humu sunagogini, kenda hat̯a nyumbani mwa Simioni. Kamut̯onga mukwanguwe muke Simioni ana kanat̯a nkali, ndookomu waḅamuzwe wamuyomba Yesu amupfonye.

³⁹Yesu kamwinamia hapfa t̯at̯ani na kaiamuru hi kanat̯a imuyatse. Hi kanat̯a imuyatsa, na iyo saa kanuka kaḍabva kuwawekea chakuḍya.

⁴⁰Dzuwa ḍikwakutswani,[6] wantu wonse weokuwa na wajwazi wa nd̯wari garagara wawamuyehea Yesu. Nae kawawekea mikono kawapfoza wonse.

⁴¹Kayavya wantu mpepfo nzuka nyinji. Hizi mpepfo nzuka zipfozikiwayawa wantu zikiḅaa madzwi zikyamba, “Wewe u Mwana jwa Muungu!” Ela Yesu kazibusa na nkakuziruhusu zinene chuuwo kiḍechonse, koro ziwa zimanya kwamba jeje ndiye huyu *Kirist̯o.

⁴²Magura mapfema chamukoche, Yesu kenda pfantu chit̯u. Wantu wenji wa humuḍe mudzini wenda na kumulacha kula pfantu. Ndookomu wepfomuona, wamuyomba akae nao.

⁴³Ela Yesu kawambukuya kawamba, “Ni had̯i nikasumwiiye na midzi ingine haya *Maagu Mema ya Uhaju wa Muungu, koro ndivyo nihumijwevyo kudzahenda.”

⁴⁴Ndookomu Yesu kenda nsi yonse ya Yud̯aya akisumwiiya masunagogini.