Read pokomo Luka 8 Bible Online

Luka 8 - pokomo bible

Luka 8

¹Makisa Yesu kanjia charo cha kwenda midzini na vidzidzini akisumwiiya *Maagu Mema ya Uhaju wa Muungu. Epfoakyenda ekigijana na hawa wanafund̯iwe kumi na wawii.

²Wake wangine eopfonya nd̯wari na kuwayavya mpepfo nzuka nao wamuuḅa. Kahi yao weewa Maria jwa kuyawa Magid̯ala, eeyavigwa mpepfo nzuka mfungahe ni Yesu,

³Yoana, muke jwa muhenda kazi mukuu jwa *Herod̯e ahanijwe Kuza, na Susana, pfamodza na wake wangine wenji wawahumikiiyeo na malit̯e yao, Yesu na wanafund̯iwe.

⁴Wantu wagija kumudzia Yesu kuyawa mudzi hat̯a mudzi. Na wepfot̯ut̯aa kit̯aro kikuu, Yesu kawayongweeza na mainganyo kawamba,

⁵“Kwiwa na muntu mumodza endeye kushat̯ani mbeju. Epfoakishat̯a, mbeju zingine zigwa njiani zirangwa-rangwa na ziḍigwa ni nsongo.

⁶Mbeju zingine zigwa maweni. Na kwa kwamba hu mutsanga ntawiiwa na madzi, hizi mbeju zipfotsembuya zinyuuka zifwa.

⁷Zingine zigwa miwani na hi miwa nayo ikuya iishumpanya hi mimea na iiyaga.

⁸Ela mbeju zingine zigwa kuntu kwa mutsanga munono na zivyaa chima cha nseensee gana zaid̯i ya hiviḍe zishat̯ijwevyo.” Yesu epfokwisa kunena hivi, kawalalabvia hawa wantu kawamba, “D̯ubva huyuḍe eye na masikio nasikiye!”

⁹Hawa wanafund̯i wamuuza Yesu wamwamba, “Maana ya hiḍi hiḍi inganyo ni?”

¹⁰Nae kawambukuya kawamba, “Nywinywi muḍyaalijwa kuimanya hi siri ya Uhaju wa Muungu. Ela wangine wanayambijwa ḅasi kimafumbo. Ndookomu kuona wanaona, ela ntawahambuye kintu. Kusikiiya wanasikiiya, ela ntawaimuke kintu.”

¹¹Makisa Yesu kawamba, “Maana ya hiḍi inganyo ni haya. Hizi mbeju ni chuuwo cha Muungu.

¹²Hizi mbeju zigwiyezo njiani, ni dza hawaḍe weonasikiiya chuuwo cha Muungu, ela Shaat̯ani akadza na kuchiwapfoka myojoni mwao, ili watseepata kuhikiza wapfonyegwe.

¹³Mbeju zigwiyezo maweni ni dza hawaḍe weonakisikiiya chuuwo cha Muungu na wakachipfokea na tsekea. Ela kwa kwamba hichi chuuwo ntachikungora myojoni mwao, wanahikiza kwa mweedha t̯u. Na wakipatwa ni maḍemo, iyo saa wanaziyekeza faro zao.

¹⁴Hiziḍe mbeju zigwiyezo miwani ni dza hawaḍe weonayasikiiya haya maagu, ela mirumiru za maisha na makulekule ya ujabva wa lumwengu huju vinawashumpanya. Ndookomu faro zao ntaziwezi kungora.

¹⁵Na hiziḍe mbeju zigwiyezo kwiiko na mutsanga munono, ni dza hawaḍe wantu weonakisikiiya hichi chuuwo na wakachigija na mojo mumodza na kuwa na faro kwa Muungu. Kwa kuit̯isa kwao, maisha yao yanamuvyaiya Muungu matunda dza hiviḍe vya muhi wivyonavyaa mumpaka ukaara gomba.”

¹⁶Yesu kongeza kunena nao kamba, “Ntaku muntu eyenagiza tsaa kisa akaifinikiza na kija ambu akaingiza t̯at̯ani kuzimu. Ishinu anaipfatsika dzuu ili hawaḍe weokunjiani humuḍe nyumbani wapate kuona.

¹⁷Koro kula kifitsijwecho kidzayavigwa wekeani, na kula chicho sirini kidzayavigwa muyangani.

¹⁸D̯ubva manyani mwivyonasikiiya, koro huyuḍe eye na kintu na akikitumia, huyo anakwongezejwa. Ela huyuḍe at̯ariyee kwamba ana kachuchu na akitsakatumia, ḅasi hat̯a hakaḍe kachuchu ekonako pia anakapfokwa.”[17]

¹⁹Nsiku modza Yesu epfoakisumwiiya, wanduguzwe na mamajwe wamwendea, ela kwa dzambo ḍye t̯ut̯a ya wantu, ntawakuweza kumufikia hafufi.

²⁰Muntu mumodza kamwamba, “Ḅwana, mamajo na wanduguzo wasumama hapfo nze wanatsaka kunena nawe.”

²¹Ela Yesu kambukuya kamba, “Mama na wandugu zangu ni hawaḍe weonasikiiya chuuwo cha Muungu na kuchigija.”

²²Nsiku modza Yesu kawamba wanafund̯iwe, “Nahuvukeni hiḍi ziwa hwende huḍoombe.” Ndookomu wanjia chomboni wagonzowa.

²³Wepfowakivuka Yesu kanjia sinzizini. Iyo saa kuḍabva kubiga vut̯o humu ziwani, na haya mawimbi yakibiga hichi chombo na kiḍabva kunjia madzi hat̯a kisaa kuhihimia.

²⁴D̯ubva hawa wanafund̯i wamwendea Yesu na wamuyamusa wamwamba, “Ḅwana, Ḅwana, hwakuhihimiani!” Ndookomu kayamuka, kaḍibusa hiḍi vut̯o na haya mawimbi yanyamaa. Ziwa ḍyonse ḍiḍunda mya!

²⁵Makisa Yesu kawauza wanafund̯iwe kawamba, “Faro yenu yaku?” Ela wao wamaka na wanjijwa ni oga, na wauzana wao na wao wakyamba, “Huyu huyu ni muntu aweedze, jwa kwamba anaamuru hat̯a vut̯o na mawimbi, navyo vikamut̯ii?”

²⁶Yesu na wanafund̯iwe wenda wojeka nsi ya Wagerasa, iyokuwa yombe jwa pfii ya ziwa ḍya Galilaya.

²⁷Yesu epfoyawa na humu chomboni, kat̯angerwa ni muntu jwa humuḍe mudzini eyekuwa na mpepfo nzuka kwa muḍa muyeya. Nkekivwaa nguo na wala nkekikaa nyumbani, ela ekiishi maḅeerani.

²⁸Epfomuona Yesu, kaḅaa idzwi kuu. Kamugwiya maguuni na kanena na idzwi kuu kamba, “Unamini Yesu Mwana jwa Muungu awee dzuu? Nakuyomba utsenikuntisa d̯ina!”

²⁹Kanena dza hivi koro Yesu ewa kaiamuru hi mpepfo nzuka iyoikimusumbuwa nsiku nyinji imuyawe. Hat̯a akyamijwa na kufungwa na minyoro maguuni na mikononi, anaihuna hi minyoro na kupfiikwa yuwandani ni mpepfo nzuka.

³⁰Makisa Yesu kamuuza, kamwamba, “Sariḍyo ndiwe ga?” Ae kamwambukuya kamwamba, “Sari ḍyangu ndimi ‘Ḍyeshi.’ ” Kanena hivi koro ewa kanjijwa ni mpepfo nzuka nyinji na nyinji.

³¹Hizi mpepfo nzuka zimuyomba Yesu muno atseziamuru kwenda kwa hiḍi simo ḍisiḍyo mwiso.[18]

³²Hafufi na hapfaḍe, kwiwa gwolu nkuu ya nguyuwe iyoikiisa karimani dzuu. Ndookomu hizi mpepfo nzuka zimuyomba Yesu aziruhusu kuwanjia hawaḍe nguyuwe, nae kaziruhusu.

³³D̯ubva hizi mpepfo nzuka zimuyawa huyuḍe muntu na ziwanjia hawa nguyuwe. Gwolu yonse ya nguyuwe id̯arama yenda igwa ziwani. Na nguyuwe wonse wafwa madzi tswee!

³⁴D̯ubva hawa wat̯unga[19] wa hawaḍe nguyuwe kudzaona hivyo, wad̯arama wapfiika maagu midzini na makondeni.

³⁵Ndookomu wantu wahika kwendayowa haya yahendekeeyo. Wepfofika hapfaḍe pfa Yesu epfokuwa, wamuona huyuḍe muntu ayavijwe hizi mpepfo nzuka. Ewa kakaa chihako hafufi na Yesu akiwa kavwaa nguoze na ndiye na akilize nzima! Ndookomu nao wanjijwa ni oga.

³⁶Na kula aoneye haya mafara yahendekeeyo, kavisumwiiya mwenziwe namuna ya huyuḍe muntu apfonyejwevyo.

³⁷Wagerasa wonse wepfoyasikia haya yahendekeeyo, wanjijwa ni oga mukuu. Ndookomu wamuyomba Yesu anuke nsini mwao. D̯ubva Yesu kanjia chomboni kuuja.

³⁸Huyuḍe muntu ayavijwe mpepfo nzuka kamuyomba Yesu amuruhusu agijane nae. Ela Yesu kamugonzoza akimwamba,

³⁹“Uja nyumbani ukasumwiiye haya ya Muungu akuhendeeyo.” Nae huyuḍe muntu kendakaḍabva kuvisumwiiya mudzi muzima hivi vya Yesu amuhendeeyevyo.

⁴⁰Yesu epfouja hi ḍanda ingine yeḍi ziwa, kat̯angerwa ni t̯ut̯a ya wantu, koro wonse wekimuinda.

⁴¹Makisa kudza muntu eyeakihanigwa Yairo, eyekuwa mumodza jwa wakuu wa *sunagogi. Kenda kamugwiya Yesu maguuni na kamuyomba ende nyumbani kwakwe.

⁴²Koro ewa na mwanamuke madiani jwa myaka kumi na miwii nae ewa hafufi kufwa. Yesu epfokuwa kwendani, wantu wamuminya ḍanda zonse.

⁴³Kahi yao kwiwa na muke eyekuwa na ujwazi wa kukakanyika mwazi. Hu huu ujwazi ewa kamakaa nao kwa myaka kumi na miwii, ela ntaku muntu awezee kumupfoza.

⁴⁴D̯ubva kenda na nyuma kenda kauhora hu mutse wa hiḍi lot̯a ḍya Yesu. Na iyo saa hu mwazi eoakikakanyika ut̯uma!

⁴⁵Yesu kawauza hawa wantu kawamba, “Ni ga anihoreye?” Kula muntu kakana. Pet̯ero kamwamba Yesu, “Ḅwana, ae wantu ntawakukuzunguuka na wakukukunduyani na kula ḍanda?”

⁴⁶Ela Yesu kamba, “Kuna muntu anihoreye. Koro nidzisikia kwamba kuna nguvu ziniyawiyezo zikipfonya muntu.”

⁴⁷Huyu muke akiona kwamba kahambujwa, kenda kwa Yesu huku akihehema na oga. Kamugwiya maguuni na kamusumwiiya kacha ya wantu maana amuhoreyeo na namuna apfonyejwevyo.

⁴⁸Yesu kamwamba, “Maama, faroyo ikupfonya. Enda na naghea.”

⁴⁹Yesu asidzakwisa kunena, kudza muntu kuyawa nyumbani kwa Yairo na kamwamba Yairo, “Huyu mwanamukeo kesakufwa, nkudzomusumbuwe Mwaalimu amaale.”

⁵⁰Ela Yesu kavisikia na kamwamba Yairo, “Nkudzouwe na shaka, wewe hikiza t̯u, nae anapfona.”

⁵¹Wepfofika nyumbani kwa Yairo, Yesu kaamuru kwamba kutsenjia yuḍejwonse humu nyumbani, lamud̯a Pet̯ero, Yohana na Yakobo pfamodza na babajwe huyuḍe mwanamuke na mamajwe.

⁵²Kula mumodza hapfaḍe ewa kuiyani na kukikintika. Yesu kawamba, “Yatsani kuiya, koro huyu mwana nkakufwa, kakuyaani t̯u!”

⁵³Ela wao wamutseka, koro wemanya kwamba kafwa ḍugha.

⁵⁴Wepfonjia humuḍe chumbani mwa huyuḍe mwanamuke emokuwa, Yesu kamugija mukono, kamuhana kamwamba, “Mwanangu, nuka!”

⁵⁵Iyo saa ruhuye imugalia, na kanuka pfapfo. Na Yesu kaamuru kwamba wamumpe kintu cha kuḍya.

⁵⁶Hawa wavyazi wa huyuḍe mwanamuke wamaka muno, ela Yesu kawaseresa watsevimwambia yuḍejwonse hiviḍe vihendekeyevyo.