Read pokomo Yohana 11 Bible Online

Yohana 11 - pokomo bible

Yohana 11

¹Kwiwa muntu mumodza eyeakihanwa Lazaro ahendeyee mujwazi hukuḍe Betania. Hukuḍe ekiishi na waimbuzwe wawii weowakihanwa Maria na Marit̯a.

²Huyu huyu Maria ndiye adzeyeakimuhiiya Ḅwana manunkanto humu maguuni kisa akimufuta na hizi nywiize. Na huyu ndugujwe ndiye eyekuwa mujwazi.

³D̯ubva hawa waimbuzwe Lazaro wamupfiikia ḍaamisa Yesu wamwamba, “Ḅwana, huyu ḅamujo umutsakiye ni mujwazi muuno.”

⁴Ela Yesu epfopata hi ḍaamisa kamba, “Hu ujwazi wa Lazaro ntauwezi kumuyehea kufwa. Udza ili upate kuyanga namuna ya nguvu za huyu Mwana ziivyo na Muungu apate kushad̯wa.”

⁵Hat̯a ingawa Yesu ewa kamutsaka Marit̯a, Maria na ndugu yao Lazaro,

⁶epfopata haya maagu ya kwamba Lazaro ni mujwazi, nkakunuka na yayo maguu ende. Ishinu kakaa hukuḍe ekokuwa kwa nsiku mbii zaid̯i.

⁷Kisa kawamba hawa wanafund̯i wakwe, “Sasa hwendeni Yud̯aya kawii.”

⁸Ela hawa wanafund̯iwe wamwamba, “Mwaalimu, hunakwendadze Yud̯aya kawii na hali si hat̯a kae hawa wantu wa Yud̯aya wekitsaka kukubiga na mawe wakuyage?”

⁹Yesu kawambukuya kawamba, “Nsiku nzima ntaikwaa na masaa kumi na mawii ya kuhenda kazi? Muntu akyenenda na musikahi nkawezi kukolasika kwa dzambo ḍya kwamba anauona hu muyanga wa huju lumwengu.

¹⁰Ela kula eyenakwenenda nasiku anakolasika kwa dzambo ḍya kwamba ntaku muyanga.”

¹¹Yesu epfonena hivi akisa, kongeza kamba, “Ḅamu jwehu Lazaro kamat̯ambaara, nami nyakwendani ninkamuyamuse.”

¹²Nao hawa wanafund̯iwe wamwamba, “Ḅwana, ikiwa kwamba kat̯ambaara kakuyaani, nka untu anapfowa.”

¹³Wao wekit̯ara ya kwamba Lazaro ewa kakuyaani ḍugha, ela cha Yesu echoakinena iwa ni kwamba Lazaro ewa kafwa.

¹⁴D̯ubva Yesu kawambia wazi tswee kawamba, “Lazaro kafwa.

¹⁵Na nina tsekea kwamba vipfohendeka siwapfo. Haya haya yonse yahendeka kwa dzambo ḍyenu, ili mupate kudziyongweeza kuniserefat̯a. Haya hwendeni!”

¹⁶D̯ubva Tomasi, eyeakihanwa Mwana Mpatsa, kawamba hawa wanafund̯i wenziwe, “Naswi hwendeni. Ikiwa kwamba ni kufwa hufwe pfamodza na huyu Mwaalimu.”

¹⁷Yesu epfofika Betania, Lazaro ewa kamazikwa na kamaawa na nsiku nee mbeerani.

¹⁸Mudzi wa Betania wiwa chima cha kilomita ntahu t̯u kuyawa Yerusalemi.

¹⁹Na wantu wenji wewa wenda wakamuingamaze Marit̯a na Maria kwa dzambo ḍya kufwijwa ni ndugu yao.

²⁰Marit̯a epfosikia kwamba Yesu kakudzani, kayawa ende akamut̯angere, ela Maria kahafa hukuḍe nyumbani.

²¹Marit̯a epfot̯ongana na Yesu kamwamba, “Ḅwana, t̯ambere wewe undeewa upfo hapfa, huyu ndugu yangu nkandeefwa.

²²Ela nimanya ya kwamba hat̯a saambi, ḍiḍeḍyonse udzeḍyoḍimuyomba Muungu, jeje anaḍikuhendea.”

²³Yesu kamwambukuya kamwamba, “Huyu ndugujo anafufuka.”

²⁴Nae Marit̯a kamwamba, “Ndivyo, nimanya kaḅisa kwamba nsiku ya mwiso anafufujwa anawa mojo kawii.”

²⁵Yesu kamwamba, “Mimi ndimi niyenafufuya wantu na kuwapfa maisha kawii. Muntu anihikiziyee mimi, hat̯a akifwa huyo anaishi kawii.

²⁶Na yuḍejwonse apatiye maisha ya ḍugha kwa dzambo ḍya kunihikiza mimi, huyo nkawezi kufwa meshi. Dze, Marit̯a, hayo hayo kuyahikiza?”

²⁷Marit̯a kamwambukuya kamwamba, “Ee Ḅwana. Nihikiza ya kwamba wewe ndiwe huyu *Masiya na ndiwe Mwana jwa Muungu udziye lumwenguni.”

²⁸Marit̯a epfonena hivi akyendaakisa, kenda kamukuntia geri Maria na kamwamba, “Mwaalimu kadza na kakukuhanani.”

²⁹Maria epfosikia hivi, kanuka haraka kamuḍaabvat̯a Yesu.

³⁰Yesu ewa amaale nkadzanjia humuḍe mudzini, ewa ka pfapfaḍe pfa Marit̯a at̯onganiyepfo nae.

³¹Hawa wantu weowakimuingamaza Maria humuḍe nyumbani, wepfomuona akiyawa haraka haraka, wat̯ara ya kwamba kakwendani hukuḍe mbeerani akaiye. Ndookomu nao wamuuḅa.

³²Maria kenda mumpaka hapfaḍe pfa Yesu epfokuwa. Epfofika akimuona, kamugwiya maguuni na kamwamba, “Ḅwana, t̯ambere wewe undeewa upfo hapfa, huyu ndugu yangu nkandeefwa.”

³³Yesu epfomuona Maria akwakuiyani na akidza akiona na namuna ya hawa wantu wangine weokuwa pfamodza nae wevyowakiiya, vimuhora hu mojo na vimungiza tsungu muno.

³⁴Nae kawauza kawamba, “Ayu afwiye mumuzika ku?” Nao wamwambukuya wamwamba, “Ḅwana, nzoo hukuyange.”

³⁵Yesu mitsozi iḍabva kumuhika.

³⁶Na wantu kudzaona hivi wamba, “T̯ayowani namuna amutsakiyevyo Lazaro!”

³⁷Ela wangine wao wamba, “Ikiwa kwamba ntumbu matso kawapfonya, kimut̯iidhiyecho kumuhendeza Lazaro atseefwa ni kintu ga?”

³⁸Yesu kanjijwa ni tsungu kawii na kenda hukuḍe mbeerani. Hi mbeera yenye iwa ni mpango iyofinikizwa na iwe hapfa pfa kunjiiya.

³⁹Yesu kawamba hawa wantu, “Ḍiperuyeni-peruyeni hiḍi iwe muḍinuye.” Ela Marit̯a kamwamba, “Ḅwana, ae e saasambi nkaawa kununkani fara? Hangu akizikwa yeo ni nsiku yane.”

⁴⁰Yesu kamwambukuya kamwamba, “Marit̯a, mimi sikukwambia ya kwamba ukihikiza unaona namuna ya uwezo wa Muungu uivyo?”

⁴¹Kisa hiḍi iwe ḍipfoperujwa-perujwa ḍikinujwa, Yesu kanuya matso dzuu mbinguni na kamba, “Baaba, ni asant̯a kwa kunisikia.

⁴²Nimanya ya kwamba unakaa na kunisikia kut̯wa. Ela ninena hivi kwa dzambo ḍya hawa wasumamiyeo hapfa, ili wapate kuhikiza kwamba wewe ndiwe unihumiye.”

⁴³Yesu epfoyomba dza hivi akisa, kamuhana Lazaro na idzwi kuu kamwamba, “Lazaro, yawa huku!”

⁴⁴Nae Lazaro kayawa na humu mbeerani akiwa kafungwa sand̯a hangu kitswani mumpaka nyajoni.[18] D̯ubva Yesu kawamba hawa wantu, “Mufunguyeni hi sand̯a mumuyatse huru!”

⁴⁵Wenji wa hawaḍe wantu weokwenda kumuingamaza Maria, wepfoona haya ya Yesu ahendeyeyo wamuhikiza.

⁴⁶Ela wangine wao wenda kwa hawa *Mafarisayo na wawasumwiiya haya ya Yesu ahendeeyo.

⁴⁷D̯ubva hawa Mafarisayo na wakohani wakuu wahana kikao cha hi gasa ya Wayahud̯i na waḍabva kuuzana wakyamba, “Haya, sasa huhendedze? Huyu muntu kakuhendani mafara ya kumakisa menji na menji!

⁴⁸Na hukimuyatsa agije kuhenda hivi, wantu wonse wanamuhikiza. Ndookomu nao hawa wat̯awala wa Kirumi, wanakudza wanainanga-nanga hi *Hekalu yehu na kyeet̯i chehu chonse wanakisa kafu.”

⁴⁹Mumodza jwa hawa weokuwa hapfaḍe gasani ewa ni Kayafa. Jeje ewa ndiye huyu *Mukohani Mukuu huhuuḍe mwaka. Nae kanena ne gasa kamba, “Munawezadze kuhenda uḍyura dzohuo?

⁵⁰Ntamukwakuonani hat̯a kwamba ni heri kufwe muntu mumodza kwa dzambo ḍya kyeet̯i chonse, kuliko kuyatsa kyeet̯i kizima kidzekinangwe-nangwe?”

⁵¹Kunena hiḍe ya hachi, hivi vyuuwo vya Kayafa aneneyevyo ntavikuyawa akilini mwakwe jeje mwenye. Ela kwa kwamba jeje ewa ndiye Mukohani Mukuu huhuuḍe mwaka, kat̯aḅiri kwamba Yesu anafwa kwa dzambo ḍya kyeet̯i kizima cha Wayahud̯i.

⁵²Na nkakut̯aḅiri kwamba Yesu anafwa kwa dzambo ḍya Wayahud̯i t̯u, ela pia kwa dzambo ḍya wana wa Muungu wonse wat̯amisaiyeo-t̯amisaiyeo ili awahendeze kuwa kintu kimodza.

⁵³Ndookomu hangu hiyo hiyo nsiku, hawa wakuu wa Kiyahud̯i waḍabva kuhenda mipango ya kumuyaga Yesu.

⁵⁴D̯ubva Yesu nae kayatsa kuzunguuka wekeani kahi ya hawa wantu. Kanuka kenda mudzi wa Efuraimu wiwokuwa hafufi na yuwanda na kakaa hukuhukuḍe jeje na wanafund̯iwe.

⁵⁵Jila ya *Pasaka ipfofika hafufi, wantu wenji wanuka na midzini kwao wenda Yerusalemi. Wenda mapfema ili wakadzidherese dza ivyowamala kaḅila hi jila ntaidzafika.

⁵⁶Wepfokuwa humuḍe Hekaluni waḍabva kumuyowa-yowa Yesu wamuone kwamba kaku. Kisa waḍabva kuuzana wao na wao wakyamba, “Munat̯ara ya kwamba huyu huyu njwakudza kwe nsikunkuu?”

⁵⁷Hawa wakohani wakuu na Mafarisayo wewa wawamba hawa wantu kwamba, muntu adzeemuona Yesu ni had̯i anene ili wapate kumugija.