Read pokomo Yohana 14 Bible Online

Yohana 14 - pokomo bible

Yohana 14

¹Yesu kanena na wanafund̯iwe kawamba, “Namutsesukusika myojo! Nywinywi muserefat̯eni Muungu na muniserefat̯e nami.[23]

²Nyumbani mwa Baba kuna namfasi t̯ipu. Nami nyakwendani nikamuelekanyie makao. Na t̯ambere hivi nivyokumwambiani sivyo, sindevimwambia.

³Na nikimuelekanyia haya makao nikisa, nauja nidzenimuhwae, ili hapfaḍe nidzepfowa nanywi muwe hapfo hapfo.

⁴Nywinywi muimanya hi njia ya kwendea huku nikokwendani.”

⁵Ela Tomasi kamwamba, “Ḅwana, hunaimanyadze e njia na hali hat̯a huku wikokwendani swiswi ntahukudzi?”

⁶Yesu kamwamba, “Mimi ndimi njia, ndimi hachi na ndimi niyenawapfa wantu maisha ya kuunga na yuungo. Muntu nkawezi kwenda kwa Baba pfasipfo kuchiiya na kwangu.

⁷Kwa kwamba nywinywi munimanya mimi, mumumanya na Baba. Na hangu hi hii saasambi mwisakumuona na mumumanya.”[24]

⁸Nae Filipo kamwamba, “Ḅwana, ukimuhuyanga Babajo, swiswi ntahuwe na chuuwo kawii.”

⁹Yesu kamwambukuya kamwamba, “Filipo, azi nsiku zonse nikaiyezo nanywi azi, amaale nkunidzi kwamba mimi ni gani? Yuḍejwonse anioneye mimi kesakumuona Baba. Mani d̯ubva sasa unakwambadze kwamba nimumuyange Baba?

¹⁰Munamba nkudzahikiza hat̯a kwamba mimi na Baba hu kintu kimodza? Hivi nivyokunenani si vyuuwo vyangu mimi mwenye, ela mvya Baba eyekuishini kuzimuni mwangu. Jeje ndiye eyekuhendani haya haya mafara yonse niyokuhendani.

¹¹Nikimwamba mimi na Baba hu kintu kimodza, nywinywi serefat̯ani niyokumwambiani. Ela ikiwa kwamba ntamuwezi kuserefat̯a hat̯a hivi nivyokumwambiani, d̯ubva nangaa muniserefat̯e kwa dzambo ḍya haya niyokuhendani.

¹²Hachi nyakumwambiani, muntu akinihikiza mimi, anahenda mafara makuu ya kumakisa dza yayaḍe niyonahenda ambu hat̯a zaid̯i, koro mimi nyakuujani kwa Baba.

¹³Nywinywi yombani kiḍechonse kwa sari ḍyangu, nami nachimuhendea. Na kwehii namuna Baba anapata kumanyikana namuna aivyo mukuu kuchiiya na kwa huyu Mwanawe.

¹⁴Ndookomu mukiyomba kiḍechonse kwa sari ḍyangu, mimi nachimuhendea.”

¹⁵Yesu kawamba wanafund̯iwe, “Ikiwa kwamba nywinywi munitsaka, munahenda hivi nimuamuriyevyo.

¹⁶Nami namuyomba Baba nae anamuyehea Mugijiija yungine adzeyekaa nanywi maishi.

¹⁷Huyu huyu Mugijiija ni huyu Ruhu Mudheru eyenayanga wantu hi ya hachi. Ela huju lumwengu ntajuwezi kumupfokea, maanaye ntajumudzi na wala ntajukwakumuhambuyani. Nywinywi le mumumanya, kwa dzambo ḍya kwamba ka pfamodza nanywi na anawa kuzimuni mwenu.

¹⁸Siwezi kumuyatsa dza wana wachiwa. Nyakwendani kisa nauja kawii.

¹⁹Ḅaad̯a ya kit̯emo kifufi chichokudzani, huju lumwengu ntajukudzaniona kawii, ela nywinywi mudzaniona. Na kwa dzambo ḍya kwamba nawa nya mojo kawii, nanywi pia mudzawa mojo.

²⁰Na hiyo hiyo nsiku ikifika, ndipfo mudzepfomanya ya kwamba mimi na Baba hu kintu kimodza, nami nanywi hu kintu kimodza.

²¹Huyuḍe eyenahenda hayaḍe nimuamuriyeyo, huyo ndiye anitsakiye. Na kwa dzambo ḍya kwamba kanitsaka, Baba nae anamutsaka. Nami pia namutsaka, na nadziyanganya kwakwe.”

²²Kisa huyuḍe mwanafund̯i eyeakihanigwa Yud̯a (ela si Yud̯a Isikariota), kamuuza kamwamba, “Ḅwana, vinawadze kwamba udziyanganye kwehu ḅasi na utsedziyanganya kwa lumwengu yuzima?”

²³Yesu kamwambukuya kamwamba, “Muntu akinitsaka mimi, anayagija haya mayongweezo yangu. Na muntu dzae, Baba anamutsaka. Na mimi na Baba hunahenda makao yehu kwakwe.

²⁴Muntu asiyenitsaka nkawezi kuyagija haya mayongweezo yangu. Kenge kumbukani kwamba haya mayongweezo yangu si yangu mimi mwenye, ela yayawa kwa Baba, huyu anihumiye.

²⁵Haya haya mambo niyamwambia ninkiwa nya pfamodza nanywi amaale.

²⁶Ela huyu Mugijiija, yani huyu Ruhu Mudheru jwa Baba adzeyemumuhumia kwa sari ḍyangu, kadzamuyongweeza kula kintu. Jeje kadzamukumbusya hayaḍe yonse nimwambiiyeyo.

²⁷Nichokumuyatsiani ni naghea ya myojo. Na hi hii naghea niyonamumpa mimi siyo hi naghea ya lumwengu iyonaweza kumumpa. D̯ubva namutsesukusika myojo na wala namutseewa na oga.

²⁸Munisikia nikimwamba ya kwamba nyakwendani kisa nauja kawii. T̯ambere mundeewa munitsaka ḍugha, mundetsekea ya kwamba nyakuujani kwa Baba, koro Baba ni mukuu kunichia mimi.

²⁹Haya haya mambo nyakuyamwambiani d̯ura yasidzahendeka, ili yadzepfohendeka mupate kuhikiza hivi nineneyevyo.

³⁰Mimi si muḍa muyeya wa kukaiya kunena nanywi amaale, koro huyu haju jwa huju lumwengu kamaawa kudzani. Jeje nka uwezo uḍewonse dzuu yangu.

³¹Ela ni had̯i nihende kula cha Baba anyambiiyecho, ili lumwengu jupate kumanya ya kwamba nimutsaka Baba. Haya, nahunukeni hapfa sasa.”