Read pokomo Yohana 16 Bible Online

Yohana 16 - pokomo bible

Yohana 16

¹Nyakumwambiani haya haya yonse ili mutsekudzaiyekeza hi faro yenu.

²Nywinywi mudzayavigwa masunagogini, na kudzafika ngera ya wantu kumuyaga wakit̯ara ya kwamba kwa kuhenda hivyo, wakumuhumikiani Muungu.

³Wao wanamuhendea dza hivyo, kwa kwamba ntawanidzi mimi wala Baba.

⁴Mimi niyamwambia haya haya yonse, ili yadzepfohendeka, mukumbuke kwamba niiyamwambia d̯ura.” Yesu kagija kunena kamba, “Haya haya sikuyamwambia hangu pfapfaḍe ḍabvu, nipfoḍabva kuyongweeza, kwa kwamba niwa nya pfamodza nanywi.

⁵Ela sasa nyakuujani kwa huyu anihumiye. Nanywi ntaku hat̯a mumodza jwenu eyekuniuzani kwamba nyekea!

⁶Nywinywi mukaiya kusikit̯ika t̯u kwa dzambo ḍya hivi nimwambiiyevyo.

⁷Ela hachi nyakumwambiani, kugonzowa kwangu ni kwa faiḍa yenu nywinywi. Koro nikitsagonzowa, huyu Mugijiija nkawezi kudza kwenu. Ela nikigonzowa, namuhuma adze kwenu.

⁸Na adzepfokudza, kadzajuyanga huju lumwengu hi ya hachi dzuu ya nabvise, na dzuu ya kut̯alijwa hachi usoni kwa Muungu na dzuu ya hukumu.

⁹Huyu Ruhu kadzajuyanga lumwengu kwamba, nabvise yao ni hivi wadziziyevyo kunihikiza mimi.

¹⁰Wadzaona kwamba Baba kanit̯ala kuwa muntu muhachi kwa kwamba nyakwendani kwakwe. Nanywi ntamukudzaniona kawii.

¹¹Wantu wadzaona hakika ya kwamba hukumu yakudzani, kwa kwamba huyu haju jwa huju lumwengu kesakuhukumigwa.

¹²Bo! Nina menji na menji ya kumwambia, ela kwehii saasambi ntamuyawezi.

¹³Ela huyu Ruhu jwa kuiyanga hi hachi adzepfokudza, anamuyanga kula dzambo ḍiḍyo ḍya hachi muḍimanye. Jeje nkanene yakwe mwenye, ela anamwambia hayaḍe yonse eyonasikia kuyawa kwangu. Anamwambia dzuu ya haya yadzeyohendeka.

¹⁴Anayamupfenwiiya nywinywi hayaḍe yonse niyonanena, na kwehii njia mimi napata kumanyikana namuna niivyo mukuu.

¹⁵Vyonse vya Baba evyonavyo, nami pia mvyangu. Ndiyo maana nyambiyeyo kwamba, huyu Ruhu anahwaa hayaḍe yangu niyonanena, anayamupfenwiiya nywinywi.”

¹⁶Yesu kagija kunena na wanafund̯iwe kawamba, “Ḅaad̯a ya muḍa ntamukudzaniona, ela ḅaad̯a ya kit̯emo kifufi mudzaniona kawii.”

¹⁷Hawa wanafund̯i waḍabva kuuzana wao na wao wakyamba, “Akwakwambani, ḅaad̯a ya muḍa ntahukudzamuona, na ḅaad̯a ya kit̯emo kifufi hudzamuona kawii, maanaye ni? Ambu akyamba kakwendani kwa Babajwe, ana maana ga?

¹⁸Na akyamba, ‘Ḅaad̯a ya muḍa,’ maanaye ni? Ntahukwakuimukani echokunenani t̯i!”

¹⁹Yesu kahambuya kwamba hawa wanafund̯iwe wekitsaka kumuuza maana ya hivi aneneyevyo, ndookomu nae kawamba, “Mwakuuzanani maana yangu nyambiyeyo, ‘Ḅaad̯a ya muḍa ntamukudzaniona, ela ḅaad̯a ya kit̯emo kifufi mudzaniona kawii?’

²⁰Hachi nyakumwambiani, mudzaiya na kusikit̯ika, ela lumwengu judzatsekea. Mudzasikit̯ika, ela sikit̯iko ḍyenu ḍidzaperuka ḍiwe tsekea.

²¹Hat̯a muke akinukijwa, anaumwa muno. Ela akisakudzifunguya, hu tsungu anawaarerwa kwa dzambo ḍya tsekea ya kupata mwana.

²²Na hat̯a nanywi, hi hii saasambi muna masikit̯iko. Ela nidzamuona kawii na mudzawa na tsekea muno, na wala ntakuwe jwa kuimutsovya hiyo hiyo tsekea.

²³Hiyo hiyo ngera ikifika, ntamuwe na haḍya ya kuniyomba kiḍechonse. Koro hachi nyakumwambiani, kiḍechonse mudzechomuyomba Baba kwa sari ḍyangu, jeje anakimuhendea.

²⁴Mumpaka saambi, ntamudzayomba kiḍechonse kwa sari ḍyangu. Nywinywi yombani, nanywi munapfegwa ili myojo yenu ipate kudzaa tsekea.

²⁵Haya haya mambo niyamwambia na mainganyo, ela kudzafika ngera ya kwamba sikudzanena nanywi na mainganyo kawii. Nidzanena nanywi na lugha ya kuimukika tswee dzuu ya Baba.

²⁶Hiyo hiyo ngera ikifika, munamuyomba Baba kwa sari ḍyangu. Ela sikwakunenani kwamba ni had̯i nimuyombeye mimi kwa Baba hat̯a.

²⁷Koro Baba jeje mwenye, kamutsaka kwa dzambo ḍya kwamba, nywinywi munitsaka mimi na muhikiza ya kwamba mimi nihumigwa ni Baba.

²⁸Mimi niyawa kwa Baba nidza lumwenguni, na nyakunukani lumwenguni niuje kwa Baba.”

²⁹Hawa wanafund̯iwe wamwamba, “Ehe, sasa kwakunenani lugha ya kuimukika, nkukwakunenani na mainganyo kawii.

³⁰Sasa humanya ya kwamba katsi wewe nku dzambo usiḍyoḍimanya. Ndookomu ntaku haḍya ya muntu kukuuḅa-uḅa na maswali yaḍeyonse. Na kwa dzambo ḍyevyohivyo, huhikiza ya kwamba wewe kuyawa kwa Muungu ḍugha.”

³¹Yesu kawambukuya kawamba, “Sasa muhikiza?

³²Ela ngera zakudzani, na hat̯a zimaafika haswa, ambapfo nywinywi mudzat̯amisaa na kula mumodza ende kwakwe. Mudzanifat̯ula mimi heket̯u, ela mimi sikwaa mimi heket̯u, koro Baba ka pfamodza nami.

³³Nimwambia haya haya mambo yonse, ili mupate kuingamaa myojo kwa dzambo ḍya kuwa na uharia nami. Gula huju lumwengu junamukuntisa d̯ina, ela namutseefwa mojo, mimi nijushinda lumwengu.”